ຂ່າວສານຊີອາໄອ ລາຍງານ ຫວ່າງບໍ່ດົນມານີ້, ຄະນະກຳມະການສົ່ງເສີມການຄ້າສາກົນຈີນແຈ້ງໃຫ້ຮູ້ວ່າ: ໃນເດືອນຕຸລາຂອງປີນີ້, ລະບົບສົ່ງເສີມການຄ້າສາກົນໃນທົ່ວປະເທດຈີນໄດ້ອອກໃບຢັ້ງຢືນກິດຈະການທາງການຄ້າປະເພດຕ່າງໆ ເພີ່ມຂຶ້ນ 20.41% ເມື່ອທຽບໃສ່ໄລຍະດຽວກັນຂອງປີກາຍ. ຂະນະທີ່ການອອກໃບຢັ້ງຢືນແຫຼ່ງກຳເນີດສິນຄ້າຂອງ RCEP ມີມູນຄ່າບັນລຸເຖິງ 784 ລ້ານໂດລາ, ເພີ່ມຂຶ້ນ 26,4% ເມື່ອທຽບໃສ່ໄລຍະດຽວກັນຂອງປີກາຍ.

ການເຕີບໂຕດ້ານປະລິມານການອອກໃບຢັ້ງຢືນກິດຈະການທາງການຄ້າ ໄດ້ສ່ອງແສງໃຫ້ເຫັນວ່າ: ພາຍໃຕ້ສະພາບການທີ່ຈີນປະຕິບັດນະໂຍບາຍເພີ່ມຕື່ມຕ່າງໆ, ການຄ້າກັບຕ່າງປະເທດຂອງຈີນໄດ້ເຕີບໂຕຢ່າງໝັ້ນທ່ຽງ, ຂະໜາດການຄ້າໄດ້ເປີດກວ້າງອອກຢ່າງຕໍ່ເນື່ອງ ແລະ ໂຄງປະກອບໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ ຊຶ່ງທັງໝົດນີ້ໄດ້ສະແດງໃຫ້ເຫັນວ່າ: ຜ່ານການອົບຮົມ, ເຜີຍແຜ່ ແລະ ຈັດຕັ້ງປະຕິບັດຢ່າງຕັ້ງໜ້າຈາກບັນດາຝ່າຍ ຊຶ່ງລວມທັງຄະນະກຳມະການສົ່ງເສີມການຄ້າສາກົນຈີນ, ໄດ້ມີວິສາຫະກິດຈີນຫຼາຍກວ່າເກົ່າສາມາດນຳໃຊ້ນະໂຍບາຍທີ່ກ່ຽວຂ້ອງກັບ RCEP ເປັນຢ່າງດີເພື່ອໄດ້ຮັບຜົນປະໂຫຍດຕົວ ຈິງ, ເຮັດໃຫ້ວິສາຫະກິດສາມາດໄດ້ຮັບແຮງຂັບເຂື່ອນທີ່ເຂັ້ມແຂງກວ່າເກົ່າໃນການດຳເນີນທຸລະກິດການຄ້າກັບຕ່າງປະເທດ.