ໃນອາທິດຜ່ານມານີ້, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫຼວງນໍ້າ ໄດ້ຈັດຊຸດຝຶກອົບຮົມການບໍລິການ ພາກສ່ວນໜ້າ, ແມ່ເຮືອນ, ການບໍລິການອາຫານ ແລະ ເຄື່ອງດື່ມ ໃຫ້ຫົວໜ່ວຍທຸລະກິດ ບໍລິການໂຮງແຮມ, ເຮືອນພັກ, ຮ້ານອາຫານ ແລະ ຮ້ານກິນດື່ມ ຢູ່ທີ່ຫ້ອງປະຊຸມຊັ້ນສອງ ຫ້ອງວ່າການເມືອງນາແລ ແຂວງຫຼວງນໍ້າທາ ໂດຍມີ ທ່ານ ສີສຸພັນ ທໍາປັນຍາ ຫົວໜ້າພະແນກ ຖວທ ແຂວງ, ມີຂະແໜງການທີ່ກ່ຽວຂ້ອງ, ຜູ້ປະກອບການທຸລະກິດເຮືອນພັກ, ຮ້ານອາຫານ ທັງພາກລັດ ແລະ ເອກະຊົນເຂົ້າຮ່ວມ.
ການຝຶກອົບຮົມໃນຄັ້ງນີ້, ແມ່ນອີງຕາມທິດຟື້ນຟູການທ່ອງທ່ຽວໂດຍຖືກຕ້ອງສອດຄ່ອງ ກັບແຜນຍຸດທະສາດພັດທະນາການທ່ອງທ່ຽວ ຂອງກະຊວງ ຖວທ ວາງອອກ, ທັງເປັນການກຽມຄວາມພ້ອມໃຫ້ແກ່ທຸລະກິດໃນຂະແໜງການທ່ອງທ່ຽວ ເພື່ອຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເດີນທາງມາທ່ຽວເມືອງນາແລ, ຊຶ່ງຜູ້ເຂົ້າຮ່ວມຝືກອົບຮົມໄດ້ຮຽນຮູ້ ຄຸນນະພາບການບໍລິການ ແລະ ການເອົາໃຈໃສ່ລູກຄ້າ, ມີທັງພາກທິດສະດີ ແລະ ພາກປະຕິບັດຕົວຈິງ ພ້ອມທັງແລກປ່ຽນຄໍາຄິດເຫັນຢ່າງກົງໄປກົງມາ ເພື່ອນໍາເອົາບົດຮຽນໄປນໍາໃຊ້ເຂົ້າໃນການບໍລິການທຸລະກິດຂອງຕົນ ໃຫ້ສາມາດຕອບສະໜອງຄວາມຕ້ອງການ, ສ້າງຄວາມປະທັບໃຈ ແລະ ຄວາມເພິ່ງພໍໃຈໃຫ້ແກ່ນັກທ່ອງທ່ຽວ.
ໃນຕອນທ້າຍ, ທ່ານ ສີສຸພັນ ທໍາປັນຍາ ໄດ້ຍົກໃຫ້ເຫັນເຖິງຄວາມສໍາຄັນຂອງການຝຶກອົບຮົມຄັ້ງນີ້ ກໍເພື່ອເປັນການປັບປຸງ ແລະ ພັດທະນາການບໍລິການດ້ານຕ່າງໆ ໂດຍສະເພາະແມ່ນການພັດທະນາບຸກຄະລາກອນ ກໍຄື ຜູ້ປະກອບການໃນຂະແໜງທຸລະກິດການທ່ອງທ່ຽວພາຍໃນແຂວງຫຼວງນໍ້າທາ ໂດຍສະເພາະເມືອງນາແລ ໃຫ້ໄດ້ທັງດ້ານປະລິມານ ແລະ ຄຸນນະພາບດີ ໂດຍສະເພາະແມ່ນການບໍລິການທີ່ດີ, ການຮັບແຂກທີ່ດີ, ການເປັນແມ່ບ້ານທີ່ດີ ກໍຄື ການເປັນເຈົ້າພາບທີ່ດີໃນການຕ້ອນຮັບແຂກທັງພາຍໃນ ແລະ ຕ່າງປະເທດ.
(ຂ່າວ: ພອນທິບ ພິລາວັນ ຫ້ອງການ ຖວທ ເມືອງນາແລ)
