ວິທະຍຸກະຈາຍສຽງຫວຽດນາມລາຍງານ ໃນທ້າຍອາທິດຜ່ານມາວ່າ: ອາເມຣິກາ ແລະ ອິນເດຍ ຊຶ່ງແມ່ນສອງປະເທດທີ່ຂຶ້ນກັບກຸ່ມບັນດາພື້ນຖານເສດຖະກິດພັດທະນາ ແລະ ຫາກໍພົ້ນເດັ່ນຂຶ້ນແຖວໜ້າໂລກ (G20) ບັນລຸຄວາມຄືບໜ້າຫຼາຍດ້ານໃນການຫຼຸດຜ່ອນອາຍພິດກາກບອນ ນັບແຕ່ເມື່ອຂໍ້ຕົກລົງປາຣີ ປີ 2016.

ຂ່າວລະບຸວ່າ: ຕາມການຄົ້ນຄວ້າ Climate Action Tracker ຊຶ່ງເປັນໂຄງການຕິດຕາມການດຳເນີນງານຂອງລັດຖະບານເພື່ອຫຼຸດການປ່ອຍອາຍພິດ ຂອງໜັງສືພິມ Guardian ອັງກິດ, ໃນ 9 ປີຜ່ານມາ, ບັນດາປະເທດຂຶ້ນກັບ G20 ໄດ້ພ້ອມກັນວາງນະໂຍບາຍສາມາດຫຼຸດຜ່ອນອາຍພິດ CO2 ລົງເຫຼືອ 6,9 gigaton ໃນປີ 2030. ນະໂຍບາຍນີ້ລວມມີການລົງທຶນໃນພະລັງງານທົດແທນ ແລະ ລຶບລ້າງໂຮງງານໄຟຟ້າກໍ່ມົນລະພິດສູງ ຊຶ່ງແມ່ນສິ່ງທີ່ດີສົມຄວນເມື່ອທຽບໃສ່ການຄາດຄະເນໃນປີ 2015 ເປັນການສະແດງໃຫ້ເຫັນວ່າ ກອງປະຊຸມບັນດາຝ່າຍເຂົ້າຮ່ວມສົນທິສັນຍາຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP) ໄດ້ມີການຫຼຸດຜ່ອນໄພນາບຂູ່ຕໍ່ດິນຟ້າອາກາດຊຶ່ງໂລກພວມປະເຊີນໜ້າ.

ເຖິງຢ່າງໃດກໍຕາມ, ຜູ້ຊ່ຽວຊານມີຄຳເຕືອນວ່າ: ສິ່ງດັ່ງກ່າວຍັງບໍ່ທັນພຽງພໍເພື່ອຫຼີກລ່ຽງການກະທົບຢ່າງຮ້າຍແຮງຈາກດິນຟ້າອາກາດ, ເມື່ອປະລິມານການປ່ອຍອາຍພິດທົ່ວໂລກຍັງໄດ້ຮັບການຄາດຄະເນວ່າຈະເພີ່ມຂຶ້ນ 2,7 ອົງສາ ໃນທ້າຍສະຕະວັດ, ລື່ນກາຍຄາດໝາຍຂອງຂໍ້ຕົກລົງ ປາຣີ ແມ່ນຈຳກັດຄວາມອຸ່ນຂຶ້ນຢູ່ລະດັບ 1,5 ອົງສາ ຫຼື 2 ອົງສາ.