ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້ ຢູ່ນະຄອນຫຼວງຮ່າໂນ້ຍ, ສະຫະພັນແຮງງານ ຫວຽດນາມ ສົມທົບກັບສະຖາບັນການເມືອງແຫ່ງຊາດ ໂຮ່ຈິມິນ, ສະພາທິດສະດີສູນກາງ ໄດ້ຈັດກອງປະຊຸມສຳມະນາວິທະຍາສາດແຫ່ງຊາດ “ສ້າງຊົນຊັ້ນກຳມະກອນ ຫວຽດນາມ ທັນສະໄໝ, ເຕີບໃຫຍ່ເຂັ້ມແຂງ”.
ຂ່າວລະບຸວ່າ: ກ່າວຄຳເຫັນໃນກອງປະຊຸມ, ທ່ານ ສຈ.ປ.ອ ຫງວຽນຊັວນທັງ ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ ປະທານສະພາທິດສະດີສູນກາງ ໄດ້ເນັ້ນໜັກວ່າ: ພື້ນຖານການຜະລິດອຸດສາຫະກຳທັນສະໄໝ ຕິດພັນກັບບັນດາຜົນງານດ້ານວິທະຍາສາດ ເຕັນໂນໂລຊີໃໝ່, ດັ່ງນັ້ນ, ຜູ້ອອກແຮງງານຕ້ອງມີສະມັດຖະພາບການອອກແຮງງານ, ວິໄນແຮງງານ, ລະບົບແນວຄິດວິທະຍາສາດ ສອດຄ່ອງກັບບັນດາຂະແໜງການໃໝ່. ເພື່ອປະຕິບັດພາລະກິດຫັນເປັນອຸດສາຫະກຳສຳເລັດ, ຕ້ອງມີຖັນແຖວບັນດາກຳມະກອນ, ຜູ້ອອກແຮງງານມີຄວາມສາມາດ, ຄຸນສົມບັດຢ່າງພຽງພໍ ເພື່ອນຳໃຊ້ພື້ນຖານອຸດສາຫຳທັນສະໄໝນັ້ນ. ກຳມະກອນດີຈີຕອນ, ກຳມະກອນທັນສະໄໝ, ກຳມະກອນເຕີບໂຕເຂັ້ມແຂງຄືພວກເຮົາລໍຄອຍ. ພວກເຮົາຕ້ອງສວຍໃຊ້ທຸກໂອກາດ, ຜ່ານຜ່າທຸກສິ່ງທ້າທາຍ, ບາງເທື່ອສິ່ງທ້າທາຍແມ່ນໂອກາດເພື່ອພັດທະນາ. ເປັນເຈົ້າການໃນການເຊື່ອມໂຍງເຂົ້າກັບສາກົນຄືແນວໃດ ຕິດພັນກັບແຫຼ່ງກຳລັງພາຍໃນປະເທດ.
ໃນກອງປະຊຸມສຳມະນາ, ບັນດາຜູ້ຊ່ຽວຊານ, ນັກວິທະຍາສາດຖືວ່າ ການສ້າງຊົນຊັ້ນກຳມະກອນທັນສະໄໝ ແມ່ນຂອດກະກຽມຊັບພະຍາກອນໃຫ້ແກ່ໄລຍະຍູ້ແຮງການຫັນເປັນອຸດສາຫະກຳ, ທັນສະໄໝ, ຖືວິທະຍາສາດ, ເຕັກໂນໂລຊີ ແລະ ນະວັດຕະກຳ ເປັນກຳລັງໜູນແຫ່ງການພັດທະນາ.
