ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນສະພາທິດສະດີສູນກາງພັກກອມມູນິດຫວຽດນາມ ນໍາໂດຍ ສະຫາຍ ຫງວຽນ ຊວນ ຖັງ ກຳມະການກົມການເມືອງສູນກາງພັກກອມມູນິດຫວຽດນາມ ປະທານສະພາທິດສະດີສູນກາງພັກ ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ ພ້ອມດ້ວຍຄະນະ ໃນວັນທີ 26 ພະຈິກ ນີ້ ທີ່ຫ້ອງວ່າການສູນກາງພັກ ໃນໂອກາດທີ່ຄະນະດັ່ງກ່າວເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມສຳມະນາທິດສະດີສອງພັກ ລາວ - ຫວຽດນາມ ຄັ້ງທີ XI ໃນລະຫວ່າງວັນທີ 26 - 29 ພະຈິກນີ້.

ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ສະຫາຍ ຫງວຽນ ຊວນ ຖັງ ພ້ອມຄະນະ ແລະ ສະແດງຄວາມຊົມເຊີຍ ແລະ ຕີລາຄາສູງ ຕໍ່ການມາເຮັດວຽກຢູ່ ສປປ ລາວ ຂອງບັນດາສະຫາຍນັກທິດສະດີ, ນັກຄົ້ນຄວ້າວິທະຍາສາດໃນຄັ້ງນີ້ ຊຶ່ງນອກຈາກບັນດາສະຫາຍໄດ້ນຳເອົາບົດຮຽນອັນມີຄຸນຄ່າຂອງພັກກອມມູນິດຫວຽດນາມ ມາແລກປ່ຽນກັບພັກປະຊາຊົນປະຕິວັດລາວແລ້ວ ບັນດາສະຫາຍຍັງໄດ້ນໍາເອົາໄມຕີຈິດມິດຕະພາບອັນອົບອຸ່ນ, ຄວາມຮັກແພງ, ສາມັກຄີແບບໝົດຈິດໝົດໃຈຖານມິດສະຫາຍອ້າຍນ້ອງ ຂອງພັກ - ລັດ ແລະ ປະຊາຊົນຫວຽດນາມ ມາສູ່ພັກ - ລັດ ແລະ ປະຊາຊົນລາວບັນດາເຜົ່າ. ພ້ອມດຽວກັນນີ້, ກໍເປັນການຢັ້ງຢືນເຖິງສາຍພົວພັນມິດຕະພາບທີ່ບໍ່ປ່ຽນແປງ ໜຶ່ງບໍ່ມີສອງໃນໂລກ ທີ່ໄດ້ເນັ້ນມາຕະຫຼອດ.

ໃນໂອກາດນີ້, ສະຫາຍ ທອງລຸນ ສີສຸລິດ ຍັງໄດ້ຕີລາຄາສູງຕໍ່ ການສຳມະນາທິດສະດີ ສອງພັກລາວ-ຫວຽດນາມ ທີ່ໄດ້ຖືກຈັດຕັ້ງປະຕິບັດໃນແຕ່ລະປີຢ່າງຕໍ່ເນື່ອງ ແລະ ໄດ້ຮັບໝາກຜົນເປັນຢ່າງດີ, ສອງພັກໄດ້ແລກປ່ຽນບົດຮຽນນຳກັນມາຫຼາຍຄັ້ງ ແລະ ມີຫຼາຍເນື້ອໃນທີ່ອຸດົມສົມບູນ; ຜົນຂອງການປະຊຸມຮ່ວມກັນແຕ່ລະຄັ້ງ ກໍໄດ້ນໍາໄປເຜີຍແຜ່ໃຫ້ອົງການຈັດຕັ້ງທັງສູນກາງ ແລະ ທ້ອງຖິ່ນ. ສຳລັບການສຳມະນາທິດສະດີຄັ້ງນີ້ ເປັນຄັ້ງທີ XI ພາຍໃຕ້ຫົວຂໍ້: “ການສ້າງເສດຖະກິດເອກະລາດ ເປັນເຈົ້າຕົນເອງ, ບົດຮຽນລາວ ແລະ ຫວຽດນາມ”. ຊຶ່ງເປັນຫົວຂໍ້ສຳຄັນໃຫ້ແກ່ພັກປະຊາຊົນປະຕິວັດລາວ. ພ້ອມທັງແຈ້ງໃຫ້ຮູ້ວ່າພັກປະຊາຊົນປະຕິວັດລາວ ຖືວ່າການສ້າງເສດຖະກິດ ເອກະລາດ ເປັນເຈົ້າຕົນເອງ ແມ່ນພາກສ່ວນສໍາຄັນ ແລະ ເປັນປັດໄຈພື້ນຖານຄ້ໍາປະກັນຄວາມເປັນເອກະລາດ, ອໍານາດອະທິປະໄຕ ຂອງຊາດ.

ສະຫາຍ ຫງວຽນ ຊວນ ຖັງ ໄດ້ກ່າວສະແດງຄວາມຂອບໃຈຢ່າງຈິງໃຈ ຕໍ່ ສະຫາຍ ທອງລຸນ ສີສຸລິດ ທີ່ໄດ້ສະຫຼະເວລາໃຫ້ການຕ້ອນຮັບອັນອົບອຸ່ນຄັ້ງນີ້ ແລະ ໄດ້ລາຍງານຜົນຂອງການພົບປະລະຫວ່າງ ສະພາທິດສະດີສູນກາງພັກປະຊາຊົນປະຕິວັດລາວ ແລະ ສະພາທິດສະດີສູນກາງພັກກອມມູນິດຫວຽດນາມ; ພ້ອມກັນນີ້, ກໍໄດ້ລາຍງານກ່ຽວກັບການມາຢ້ຽມຢາມ ແລະ ເຂົ້າຮ່ວມກອງປະຊຸມສຳມະນາທິດສະດີສອງພັກ ລາວ - ຫວຽດນາມ ຄັ້ງທີ XI.

ສະຫາຍ ທອງລຸນ ສີສຸລິດ ກໍໄດ້ອວຍພອນແກ່ ສະຫາຍ ຫງວຽນ ຊວນ ຖັງ ພ້ອມຄະນະ ຈົ່ງປະສົບຜົນສຳເລັດໃນການມາ ສປປ ລາວ ໃນຄັ້ງນີ້; ພ້ອມທັງສະແດງຄວາມເຊື່ອໝັ້ນວ່າການສຳມະນາທິດສະດີສອງພັກໃນຄັ້ງນີ້ ຈະເປັນການປະກອບສ່ວນສ້າງຄວາມກະຈ່າງແຈ້ງທາງດ້ານທິດສະດີ ແລະ ພຶດຕິກຳ ໃຫ້ແກ່ການບູລະນະແນວທາງ, ແຜນນະໂຍບາຍຂອງພັກໃຫ້ມີຄວາມສົມບູນ. ເວທີສຳມະນານີ້ ທັງເປັນການເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມໃຫ້ນັບມື້ນັບແໜ້ນແຟ້ນ, ເລິກເຊິ່ງ ແລະ ເກີດດອກອອກຜົນຍິ່ງໆຂຶ້ນ.

(ຂ່າວ-ພາບ: ສຸກສະຫວັນ)