ວັນທີ 1 ທັນວາ 2024 ກົງກັບ ມື້ຂຶ້ນ 1 ຄໍ່າ ເດືອນ 1 ລາວ (ເດືອນຈຽງ) ສະມາຄົມຈີນ ຮ່ວມກັບ ການນຳ ແລະ ປະຊາຊົນຊາວນະຄອນປາກເຊ ແຂວງຈຳປາສັກ ໄດ້ຈັດຂະບວນແຫ່ ສະເຫຼີມສະຫຼອງເຈົ້າປູ່ສົບເຊ ທີ່ນະຄອນປາກເຊ ຢ່າງຄືກຄື້ນ ແລະ ຍິ່ງໃຫຍ່ ໂດຍເປັນກຽດເຂົ້າຮ່ວມມີທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ທ່ານ ໄພທູນ ປະທຸມທອງ, ປະທານສະມາຄົມຈີນແຂວງຈຳປາສັກ, ມີສະມາຄົມຈີນປະຈຳແຂວງສະວນະເຂດ, ນະຄອນຫຼວງ ວຽງຈັນ, ບັນດາຊາວຈີນ, ຊາວຫວຽດນາມ ທີ່ດຳລົງຊີວິດຢູ່ແຂວງຈຳປາສັກເຂົ້າຮ່ວມຢ່າງຫຼວງຫຼາຍ.

ທ່ານ ປະທານສະມາຄົມຈີນປະຈຳແຂວງຈຳາສັກ ກ່າວວ່າ: ການຈັດພິທີໄຫວ້ ແລະ ແຫ່ເຈົ້າປູ່ສົບເຊຄັ້ງນີ້ ກໍເພື່ອປະຕິບັດຕາມຄວາມເຄົາລົບນັບຖືຂອງຊາວເມືອງ ນັບແຕ່ຊາວລາວ, ຊາວຈີນ, ຊາວຫວຽດນາມ ຢູ່ແຂວງຈຳປາສັກ ທີ່ເຄີຍສືບທອດ ແລະ ປະຕິບັດກັນມາແຕ່ດົນນານ, ເປັນການສະແດງຄວາມເຄົາລົບບູຊາ ແລະ ຂໍພອນຈາກເຈົ້າປູ່ໃຫ້ມີຄວາມຢູ່ເຢັນເປັນສຸກ, ການຄ້າຂາຍ ຫຼື ທຳທຸລະກິດໃຫ້ຈະເລີນກ້າວໜ້າ. ພິເສດການຈັດພິທີຂະບວນແຫ່ຢ່າງຍິ່ງໃຫຍ່ຄືແນວນີ້ ເພື່ອເປັນການສະແດງເຖິງຄວາມຫຼາກຫຼາຍທາງດ້ານສິລະປະວັດທະນະທຳຂອງຊາວຈີນບົນດິນແດນອະລິຍະທຳພາກໃຕ້ລາວ, ເຮັດໃຫ້ສັງຄົມລາວ, ນັກທ່ອງທ່ຽວພາຍໃນ ແລະ ຕ່າງປະເທດໄດ້ຮັບຮູ້ຫຼາຍຂຶ້ນ. ທັງເປັນການເປີດໂອກາດໃຫ້ຜູ້ຄົນໄດ້ຮ່ວມກັນກາບໄຫວ້ ຂໍພອນຢ່າງເປັນຂະບວນກວ້າງຂວາງ.

ພິທີໄຫວ້ ແລະ ແຫ່ເຈົ້າປູ່ສົບເຊ ໄດ້ເລີ່ມຈາກສານເຈົ້າປູ່ສົບເຊ (ປາກແມ່ນໍ້າເຊໂດນ) ຝັ່ງທ່າຫີນ ໄປຍັງແຄມຂອງ ບ້ານທ່າຫີນ, ທ່າໄຮ, ຂ້າມຂົວເຊໂດນ ເຂົ້າມາຜ່ານຫໍຫຼັກເມືອງ, ສະມາຄົມຫວຽດນາມ, ສະມາຄົມຈີນ, ຜ່ານສູນການຄ້າຈຳປາສັກ, ລ້ຽວໄປແຄມຂອງບໍລິສັດຈຳປາຄຳ, ຜ່ານບໍລິສັດ ແລະ ຄຸ້ມບ້ານຕ່າງໆພາຍໃນນະຄອນປາກເຊ ແລ້ວຈິ່ງກັບຄືນເຂົ້າສູ່ ສານເຈົ້າປູ່ ສົບເຊ ເພື່ອທຳການໄຫວ້ ບູຊາແລະ ທຳພິທີສະເຫຼີມສະຫຼອງຢ່າງຄຶກຄື້ນຕະຫຼອດ 3 ວັນ.

(ຂ່າ: ເກດສະໜາ ແກ້ວວັນນະແສງ)