ໃນວັນທີ 25 ທັນວາ ຜ່ານມາ, ເຈົ້າໜ້າທີ່ກວດກາການຄ້າເມືອງປາກກະດິງ ແຂວງບໍລິຄຳໄຊ ນຳພາໂດຍທ່ານ ບົວຈັນ ແກ້ວວົງສາ ຫົວໜ້າໜ່ວຍງານການຄ້າພາຍໃນ ພ້ອມດ້ວຍຄະນະ ໄດ້ສົບທົບກັບຫ້ອງການສາທາລະນະສຸກ ແລະ ປກສ ເມືອງ. ລົງເຄື່ອນໃຫວກວດກາ ສິນຄ້າໝົດອາຍຸ,ເຊື່ອມຄຸນ ແລະ ເສຍຄຸນ ຢູ່ເຂດ 1 ປາກກະດິງ ຕາມຫາງສຽງຂອງສັງຄົມ.

ການລົງເຄື່ອນໃຫວກວດກາສິນຄ້າຄັ້ງນີ້, ໄດ້ສຸ່ມກວດບັນດາຮ້ານຂາຍເຄື່ອງສົ່ງ, ຮ້ານຂາຍເຄື່ອງຍ່ອຍ ແລະ ບັນດາຮ້ານຄ້າຢູ່ຕາມຕະຫຼາດ ຈຳນວນ 21 ຮ້ານ. ເຫັນວ່າເຈົ້າຂອງທຸລະກິດບາງຮ້ານໄດ້ເອົາໃຈໃສ່ກວດກາສິນຄ້າຂອງຕົນ ຈຶ່ງບໍ່ພົບເຫັນສິນຄ້າເຊື່ອມຄຸນນະພາບ. ຄຽງຄູ່ກັນນີ້, ບາງຮ້ານ ກໍຍັງໄດ້ພົບເຫັນສິນຄ້າ ເປັນເຄື່ອງບໍລິໂພກ ຈຳນວນຫຼາຍລາຍການ ໝົດອາຍຸການບໍລິໂພກ, ເຊື່ອມຄຸນ ແລະ ເສຍຄຸນ ເປັນຕົ້ນແມ່ນ: ເຂົ້າໜົມ, ໝີ່, ນ້ຳອັດລົມ ແລະ ສິນຄ້າຕ້ອງຫ້າມອີກຈຳນວນໜຶ່ງ. ລວມມູນຄ່າ 3 ລ້ານກ່ວາກີບ. ຈາກນັ້ນ, ທາງເຈົ້າໜ້າທີ່ຈຶ່ງໄດ້ເຮັດບົດບັນທຶກ, ສຶກສາອົບຮົມ ແລະ ຍັງໄດ້ແນະນຳວິທີການກວດກາສິນຄ້າໃຫ້ແກ່ຜູ້ປະກອບການທຸລະກິດ ພ້ອມທັງໄດ້ອາຍັດສິນຄ້າທີ່ ໝົດອາຍຸການບໍລິໂພກ, ເຊື່ອມຄຸນ ແລະ ເສຍຄຸນ ທີ່ພົບເຫັນໃນຄັ້ງນີ້ໄວ້ເພື່ອຈັດພິທີທຳລາຍຕື່ມອີກ.

(ຂ່າວ: ແສງທອງ)