ໃອກາດເດີນທາງຢ້ຽມຢາມ ຣາຊະອານາຈັກ ກຳປູເຈຍ ຢ່າງເປັນທາງການ, ໃນຕອນເຊົ້າຂອງວັນທີ 4 ທັນວາ 2024, ທີ່ ພະຣາຊະວັງ, ນະຄອນຫຼວງ ພະນົມເປັນ, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເຂົ້າຢ້ຽມຂ່ຳນັບ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ, ພະມາຫາກະສັດ ແຫ່ງ ຣາຊະອານາຈັກ ກຳປູເຈຍ.

ໃນໂອກາດນີ້, ພະນະທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມປິຕິຍິນດີທີ່ໄດ້ມີໂອກາດເຂົ້າຢ້ຽມຂ່ຳນັບ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ, ເຊິ່ງການຢ້ຽມຢາມຄັ້ງນີ້ ມີຂຶ້ນໃນທ່າມກາງທີ່ປະຊາຊົນທົ່ວປະເທດກຳປູເຈຍ ຫາກໍ່ສຳເລັດການສະເຫຼີມສະຫຼອງວັນປະກາດເອກະລາດ ຄົບຮອບ 71 ປີ ແລະ ຖືເອົາໂອກາດທີ່ມີຄວາມຫມາຍສຳຄັນນີ້ ນຳເອົາຄວາມຢື້ຢາມຖາມຂ່າວອັນປະເສີດຈາກ ພະນະທ່ານປະທານປະເທດ ທອງລຸນ ສີສຸລິດ ມາຍັງ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ແລະ ຜ່ານພະອົງ ໄປຍັງ ພະມານດາຂອງພະອົງ, ແລະ ເຊື້ອເຊີນໄປຢ້ຽມຢາມ ສປປ ລາວ ໃນປີ 2025 ທີ່ຈະມາເຖິງ. ລັດຖະບານລາວ ຕີລາຄາສູງຕໍ່ບົດບາດຂອງ ພະບາດສົມເດັດ ໃນການປະກອບສ່ວນເສີມສ້າງສາຍພົວພັນມິດຕະພາບອັນເປັນມູນເຊື້ອ ການເປັນບ້ານໃກ້ເຮືອນຄຽງທີ່ດີ ເປັນບ້ານແກ່ວເມືອງດອງທີ່ມີມາແຕ່ດົນນານ ແລະ ສືບຕໍ່ໄດ້ຮັບການຖະນຸຖະໜອມ ແລະ ເສີມຂະຫຍາຍໃຫ້ມີໝາກຜົນຕະຫຼອດມາ ໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດນັບມື້ນັບຫຼາຍຂຶ້ນ. ພ້ອມນັ້ນ, ກໍ່ໄດ້ແຈ້ງໃຫ້ຊາບກ່ຽວກັບຈຸດປະສົງຂອງການຢ້ຽມຄັ້ງນີ້ ເຊິ່ງຈະພົບປະເຮັດວຽກກັບ ສົມເດັດ ຮຸນ ມາແນດ, ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ ເພື່ອປຶກສາຫາລືເຖິງຊ່ອງທາງໃນການຂະຫຍາຍການຮ່ວມມືສອງຝ່າຍໃນຕໍ່ຫນ້າ, ພ້ອມນັ້ນ ກໍ່ໄດ້ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ໃນປະຈຸບັນ, ເຊິ່ງລັດຖະບານ ແຫ່ງ ສປປ ລາວ ຢືນຢັນທັດສະນະຫຼັກໝັ້ນອັນສະເໝີຕົ້ນສະເໝີປາຍ ໃນການຮ່ວມມືຢ່າງໃກ້ຊິດກັບລັດຖະບານ ກຳປູເຈຍ ເພື່ອເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ, ການຮ່ວມມືທີ່ມີມາແຕ່ດົນນານ ຖານບ້ານໃກ້ເຮືອນຄຽງທີ່ດີ ກໍ່ຄື ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ລາວ-ກໍາປູເຈຍ ໃຫ້

ແໜ້ນແຟ້ນ ແລະ ຂະຫຍາຍຕົວຍິ່ງຂື້ນ. ໃນຕອນທ້າຍ, ກໍ່ໄດ້ອວຍພອນໃຫ້ແດ່ ພະບາດສົມເດັດ ຈົ່ງມີພະລານາໄມສົມບູນ, ມາຄວາມຜາສຸກກະເສີມສໍາລານ, ສືບຕໍ່ນໍາພາ ປະເທດຊາດ ໃຫ້ໄດ້ຮັບການພັດທະນາຍິ່ງຂຶ້ນ ພາຍໃຕ້ພະບໍຣົມໂພທິສົມພານຂອງພະອົງ.

ໃນຂະນະດຽວກັນ, ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ກໍ່ໄດ້ສະແດງຄວາມຍິນດີຕ້ອນຮັບ ແລະ ຂອບໃຈຕໍ່ການນຳເອົາຄວາມຢື້ຢາມຖາມຂ່າວອັນປະເສີດໃນຄັ້ງນີ້ ຈາກ ພະນະທ່ານ ປະທານປະເທດ ທອງລຸນ ສີສຸລິດ ແລະ ສະແດງຄວາມຊົມເຊີຍຕໍ່ຜົນສຳເລັດອັນຈົບງາມຂອງການເປັນປະທານອາຊຽນຂອງ ສປປ ລາວ ປີ 2024. ພ້ອມນີ້, ພະອົງ ສະແດງຄວາມຍິນດີຈະຊ່ວຍຊຸກຍູ້ໃຫ້ພາກສ່ວນກ່ຽວຂ້ອງຂອງສອງຝ່າຍ ເຮັດວຽກຮ່ວມກັນຢ່າງໃກ້ຊິດ ເພື່ອຂະຫຍາຍການຮ່ວມມືດ້ານອື່ນໆທີ່ມີທ່າແຮງຮ່ວມກັນ, ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ. ທັງນີ້ ກໍ່ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ກຳປູເຈຍ ແລະ ລາວ, ນຳເອົາຄວາມສົມບູນພູນສຸກມາສູ່ປະຊາຄົມອາຊຽນ, ອວຍພອນໃຫ້ສາຍພົວພັນສອງປະເທດ ກຳປູເຈຍ ແລະ ລາວ ຈົ່ງໝັ້ນຄົງຂະນົງແກ່ນ ແລະ ໄດ້ຮັບການພັດທະນາຂຶ້ນສູ່ບາດກ້າວອັນໃໝ່ຍິ່ງໃຫຍ່ກວ່າເກົ່າ. ຂ່າວ:ກົມການຂ່າວ, ກະຊວງການຕ່າງປະເທດ