ກະຊວງປ້ອງກັນປະເທດໄດ້ຈັດພິທີມອບ-ຮັບໜ້າທີ່ລະຫວ່າງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ເລຂາຄະນະບໍລິຫານງານພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ (ຜູ້ເກົ່າ) ແລະ ສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ ເລຂາຄະນະບໍລິຫານງານພັກກະຊວງ ລັດຖະມົນຕີກະຊວງປ້ອງກັນປະເທດ (ຜູ້ໃໝ່) ໃນວັນທີ 5 ທັນວາ ນີ້, ໂດຍການເປັນກຽດເຂົ້າຮ່ວມ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ.

ໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີ, ຊົມເຊີຍ ແລະ ຕີລາຄາສູງຕໍ່ບັນດາຜົນງານອັນພົ້ນເດັ່ນຂອງວຽກງານປ້ອງກັນປະເທດທີ່ຍາດມາໄດ້ໃນໄລຍະຜ່ານມາ ໂດຍພາຍໃຕ້ການນໍາພາ-ຊີ້ນໍາຂອງ ສະຫາຍ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ຊຶ່ງສະຫາຍໄດ້ຊີ້ນໍາ-ນໍາພາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ໂດຍສະເພາະ 4 ໜ້າທີ່ໃຫຍ່, 26 ແຜນງານຂອງກະຊວງປ້ອງກັນປະເທດເຂົ້າສູ່ວຽກງານຕົວຈິງຂອງທຸກກົມກອງ, ເຫຼົ່າຮົບໃນທົ່ວກອງທັບໃຫ້ມີບາດກ້າວຂະຫຍາຍຕົວທີ່ພົ້ນເດັ່ນຫຼາຍດ້ານ.

ໂອກາດນີ້, ສະຫາຍ ທອງລຸນ ສີສຸລິດ ໄດ້ມີຄໍາເຫັນເນັ້ນໜັກໃຫ້ກະຊວງປ້ອງກັນປະເທດເອົາໃຈໃສ່: ຕັ້ງ ໜ້າສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ-ນັກຮົບເຊື່ອມຊຶມ, ກຳແໜ້ນແນວທາງປ່ຽນແປງໃໝ່ຂອງພັກ, ໜ້າທີ່ການເມືອງຂອງກອງທັບ, ມີຄວາມເຊື່ອໝັ້ນຕໍ່ອຸດົມການຂອງພັກ, ຈົງຮັກພັກດີຕໍ່ປະເທດຊາດ ຕໍ່ປະຊາຊົນ; ມີຄວາມເອກອ້າງທະນົງໃຈຕໍ່ມູນເຊື້ອ, ວິລະກຳການຕໍ່ສູ້ ແລະ ສູ້ຮົບມີໄຊທີ່ສະຫງ່າອົງອາດຂອງກອງທັບເຮົາ ທັງຮູ້ຕັ້ງໜ້າເສີມຂະຫຍາຍທາດແທ້ມູນເຊື້ອປະຕິວັດຂອງແຕ່ລະກົມກອງຂອງແຕ່ລະນັກຮົບ, ນາຍ ແລະ ພົນທະຫານໃຫ້ສູງເດັ່ນຂຶ້ນຢ່າງບໍ່ຢຸດຢັ້ງ. ພັກເຮົາ, ກອງທັບເຮົາເວລາໃດກໍຖືສໍາຄັນ ແລະ ເອົາໃຈໃສ່ຄວາມສາມັກຄີ, ຄວາມເປັນເອກະພາບພາຍໃນໃຫ້ໜັກແໜ້ນຢູ່ສະເໝີ, ຖືບັນຫາດັ່ງກ່າວເປັນປັດໄຈສໍາຄັນ ທັງເປັນກໍາລັງແຮງໃນການຄໍ້າປະກັນຜົນສໍາເລັດແຫ່ງການນໍາພາຊີ້ນໍາຂອງພັກ: ຂໍໃຫ້ບັນດາສະຫາຍສືບຕໍ່ປົກປັກຮັກສາ ແລະ ເສີມສ້າງຄວາມສາມັກຄີເປັນປຶກແຜ່ນໂດຍສະເພາະຢູ່ພາຍໃນຄະນະພັກ-ຄະນະປະຈຳພັກກະຊວງໃຫ້ມີຄວາມໜັກແໜ້ນ, ມີຄວາມເປັນເອກະພາບສູງເພື່ອສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນໍາໃນການນໍາພາເຕົ້າໂຮມຄວາມສາມັກຄີໃນຖັນແຖວສະມາຊິກພັກ, ພະນັກງານ-ນັກຮົບໃນທົ່ວກອງທັບເຮົາເພື່ອໃຫ້ເປົ້າໝາຍດັ່ງກ່າວບັນລຸ ຕ້ອງປັບ ປຸງແບບແຜນວິທີເຮັດວຽກ, ແບບແຜນນໍາພາ, ເປີດກວ້າງປະຊາທິປະໄຕ ລວມສູນເປັນເອກະພາບໃນການຊີ້ນໍາບັນຊາທີ່ເດັດດ່ຽວວ່ອງໄວ, ທັນການ; ສືບຕໍ່ຊີ້ນໍາການປະຕິບັດຍຸດທະສາດຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຂອງປະຊາຊົນຕາມ 4 ເນື້ອໃນ 4 ຄາດໝາຍ: ປັບປຸງຮາກຖານການເມືອງ, ສ້າງທ່າສະໜາມສົງຄາມປະຊາຊົນ 3 ຂັ້ນ, ຊ່ວຍເຫຼືອປະຊາຊົນພັດທະນາເສດຖະກິດ-ສັງຄົມ, ແກ້ໄຂບັນດາໜໍ່ແໜງຄວາມບໍ່ສະຫງົບທີ່ເກີດຂຶ້ນ, ຍູ້ແຮງການຜັນຂະຫຍາຍທິດນໍາໃນການສ້າງເສດຖະກິດເອກະລາດເປັນເຈົ້າຕົນເອງໃນກອງທັບໃຫ້ຟົດຟື້ນ, ສ້າງການຫັນປ່ຽນໃໝ່ໃນການ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ”. ສ້າງພະລາທິການກັບທີ່ເພື່ອສູ້ຊົນສ້າງແຫຼ່ງລາຍຮັບໃຫ້ໄດ້ຫຼາຍ, ປັບປຸງ ແກ້ໄຂ ແລະ ຍົກລະດັບຊີວິດການເປັນຢູ່ໃນກໍາລັງໃຫ້ດີຂຶ້ນເລື້ອຍໆ, ປະຕິບັດແນວທາງການຕ່າງປະເທດຂອງພັກເຮົາໃນໄລຍະໃໝ່ຢ່າງຖືກຕ້ອງ, ຄ່ອງແຄ້ວ, ພົວພັນຮ່ວມມືຢ່າງຕັ້ງໜ້າກັບປະເທດເພື່ອນມິດທັງຢູ່ໃກ້ ແລະ ຢູ່ໄກ; ໃຫ້ຊີ້ນໍາການກະກຽມຄວາມພ້ອມເພື່ອເຂົ້າຮ່ວມໃນກອງກໍາລັງຮັກສາສັນຕິພາບສາກົນ (ຂອງ ສປຊ) ຂອງກອງທັບເຮົາໃນອະນາຄົດອັນໃກ້ນີ້.

ໃນພິທີໄດ້ຜ່ານດຳລັດຂອງນາຍົກລັດຖະມົນຕີແຫ່ງ ສປປ ລາວ ວ່າດ້ວຍການແຕ່ງຕັ້ງຫົວໜ້າກົມໃຫຍ່ການເມືອງກອງທັບ, ໃນນີ້ໄດ້ແຕ່ງຕັ້ງ ສະຫາຍ ພົນຕີ ວົງ