ພິທີພົບປະແລກປ່ຽນບົດຮຽນ ລະຫວ່າງ ຄະນະກວດກາພັກ ແຂວງອຸດົມໄຊ ສປປ ລາວ ແລະ ຄະນະກວດກາພັກ ແຂວງເຊີນລາ ສສ ຫວຽດນາມ ໄດ້ຈັດຂຶ້ນໃນວັນທີ 9 ທັນວາຜ່ານມານີ້ ທີ່ຫ້ອງປະຊຸມ ຄະນະກວດກາພັກ ແຂວງອຸດົມໄຊ, ຄະນະຜູ້ແທນຝ່າຍ ແຂວງອຸດົມໄຊ ນຳໂດຍສະຫາຍ ນາງ ຈັນສະໝອນ ທິບພະຫົງ ຄະນະປະຈຳພັກແຂວງ ປະທານກວດກາພັກ ແຂວງອຸດົມໄຊ ພ້ອມດ້ວຍຄະນະ ແລະ ຄະນະຜູ້ແທນຝ່າຍ ແຂວງເຊີນລາ ນຳໂດຍສະຫາຍ ນາງ ເລືອງ ທິ ເວີນ ແອງ ຄະນະປະຈຳພັກແຂວງ ປະທານກວດກາພັກ ແຂວງເຊີນລາ ພ້ອມດ້ວຍຄະນະ.

ການພົບປະຄັ້ງນີ້, ເພື່ອແລກປ່ຽນບົດຮຽນ ແລະ ຮັດແໜ້ນຄວາມສາມັກຄີ ລະຫວ່າງ ສອງແຂວງ ເຊີນລາ-ອຸດົມໄຊ, ອຸດົມໄຊ-ເຊີນລາ ໃຫ້ມີຄວາມແໜ້ນແຟນ ແລະ ແລກປ່ຽນບົດຮຽນ ເຊີ່ງກັນ ແລະ ກັນ ໃນບາງດ້ານ ເພື່ອໃຫ້ວຽກງານກວດກາພັກ ມີຄວາມສອດຄ່ອງ ແລະ ມີການຮ່ວມມືແບບຮອບດ້ານໃນວຽກງານກວດກາພັກ ລະຫວ່າງ ສອງແຂວງ ໃຫ້ນັບມື້ນັບເພີ່ມທະວີຍິ່ງໆຂື້ນ.

ໃນກອງປະຊຸມ, ສະຫາຍ ນາງ ຈັນສະຫມອນ ທິບພະຫົງ ໄດ້ລາຍງານສະພາບລວມຂອງແຂວງອຸດົມໄຊໃຫ້ ຄະນະຜູ້ແທນ ແຂວງເຊີນລາ ຮັບຊາບ ໂດຍສະເພາະແມ່ນ ຈຸດພິເສດທີ່ຕັ້ງ, ທ່າແຮງຂອງແຂວງ, ການປະຕິບັດໜ້າທີ່ຂອງຄະນະກວດກາພັກແຂວງ, ການຕິດຕາມ, ກວດກາພັກ, ກວດກາລັດ, ການປະຕິບັດລະບຽບວິໄນຕໍ່ສະມາຊິກພັກ ແລະ ວຽກງານອື່ນ. ຈາກນັ້ນ, ສະຫາຍ ນາງ ເລືອງ ທິ ເວີນ ແອງ ໄດ້ລາຍງານ ກ່ຽວກັບການກວດກາ ຕິດຕາມຂອງພັກ ສະໄໝ 2020-2025 ແລະ ເສດຖະກິດ-ສັງຄົມ ຂອງແຂວງເຊີນລາວ ໃນປີ 2024, ຂົງເຂດວັດທະນະທຳ-ສັງຄົມ, ຂະແໜງອຸດສາຫະກຳ, ສະພາບທາງດ້ານການເມືອງ, ວຽກງານກໍ່ສ້າງພັກ ແລະ ວຽກງານອື່ນໆ ທີ່ພົ້ນເດັ່ນ ແລະ ເປັນທິດທາງສຳຄັນໃນຕໍ່ຫນ້າ, ພ້ອມນັ້ນ ທັງສອງຝ່າຍ ຍັງໄດ້ເປີດກ້ວາງໃຫ້ຫົວໜ້າຂະແໜງການຕ່າງໆຂອງສອງແຂວງ ໄດ້ແລກປ່ຽນບົດຮຽນຮ່ວມກັນທາງດ້ານວິຊາການ ແບບກົງໄປກົງມາ ຕື່ມອິກ.

(ຂ່າວ: ແສງອາທິດ)