ເມືອງເລົ່າງາມ ແຂວງສາລະວັນ ໄດ້ຈັດພິທິປະກາດ-ຮັບຮອງເອົາບ້ານໃຫຍ່ໜອງແກເປັນບ້ານຄ້າຍຄືຕົວເມືອງນ້ອຍໃນຊົນນະບົດໄດ້ຈັດຂຶ້ນໃນທ້າຍອາທິດຜ່ານມານີ້ ໂດຍການເຂົ້າຮ່ວມຂອງທ່ານ ວຽງວິໄລຄຳ ອຸດຕະສັກ ວ່າການເລຂາພັກ ເຈົ້າເມືອງເລົ່າງາມ, ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດຂັ້ນແຂວງ, ມີແຂກຖືກເຊີນຈາກແຂວງ, ເມືອງ ແລະ ພໍ່ແມ່ປະຊາຊົນພາຍໃນບ້ານໜອງແກເຂົ້າຮ່ວມ.

ໃນພິທິຜູ້ເຂົ້າຮ່ວມໄດ້ຮັບຊົມ ການສວນສະໜາມຂອງກອ້ນກຳລັງຕ່າງໆພາຍໃນເມືອງ ແລະ ການສະແດງສິລະປະຂອງນ້ອງໆນັກຮຽນ ມສ ໜອງແກ. ຈາກນັ້ນ, ພິທີກໍໄດ້ຜ່ານບົດສະຫຼຸບແຜນພັດທະນາເສດຖະກິດສັງຄົມພາຍໃນບ້ານ ແລະ ບາດກ້າວຂັ້ນຕອນການກະກຽມສ້າງບ້ານໃຫຍ່ໜອງແກເປັນບ້ານຄ້າຍຄືຕົວເມືອງນ້ອຍ ຊຶ່ງບ້ານໜອງແກມີ 494 ຫຼັງຄາເຮືອນ 600 ຄອບຄົວ, ມີພົນລະເມືອງ 2,524 ຄົນ ຍີງ 1,173 ຄົນ, ມີເນື້ອທີ່ 2,317 ເຮັກຕາ, ປະຊາຊົນສ່ວນໃຫຍ່ຍືດຖືອາຊີບປູກຝັງເປັນຕົ້ນຕໍ ແລະ ຄ້າຂາຍເປັນອາຊີບສຳຮອງ. ປັດຈຸບັນຄະນະພັກ, ອຳນາດການປົກຄອງເມືອງໄດ້ສ້າງບ້ານໜອງແກເປັນບ້ານຄ້າຍຄືຕົວເມືອງນ້ອຍໃນຊົນນະບົດ ຊຶ່ງປະກອບມີ 3 ບາດກ້າວຄື: ບາດກ້າວກະກຽມ,ບາດກ້າວດຳເນີນງານ ແລະ ບາດກ້າວປະເມີນ. ໃນແຕ່ລະບາດກ້າວນັ້ນ ຄະນະທິມງານປະເມີນກໍໄດ້ສຸມໃສ່ຕາມ 16 ມາດຖານ ຕິດພັນກັບ 4 ເນື້ອໃນ 4 ຄາດໝາຍທີ່ພັກວາງອອກ. ຈັດຕັ້ງເຊື່ອມຊືມບັນດາເອກະສານນິຕິກຳຕ່າງໆໃຫ້ປະຊາຊົນໄດ້ຮັບຮູ້ຢ່າງເລິກເຊິ່ງ ແລະ ແບ່ງຄວາມຮັບຜິດຊອບໃຫ້ແຕ່ລະພາກສ່ວນຢ່າງລະອຽດໂດຍສະເພາະແມ່ນມະຕິ 25/ກມສພ, ດຳລັດເລກທີ 309/ນຍ, 348/ລບ ບົດແນະນຳເລກທີ 0830/ກປ ຂໍ້ຕົກລົງເລກທີ 283/ຈຂສວ ພາຍຫຼັງສຳເລັດການປະເມີນແລ້ວຄນະຮັບຜິດຊອບກໍໄດ້ນຳສະເໜີຫາຂັ້ນເທິງພິຈະລະນາເພື່ອປະກາດ ແລະ ຮັບຮອງຕາມລຳດັບພາຍຫຼັງທີ່ສຳເລັດພິທີຢ່າງເປັນທາງການແລ້ວຄະນະພັກ, ຄະນະນຳຂອງແຂວງ, ເມືອງນຳໂດຍ ທ່ານ ວຽງວິໄລຄຳ ອຸດຕະສັກ, ທ່ານ ນ ບຸນທະວີ ດວງລາສີ ແລະ ພາກສ່ວນທີ່ກ່ຽວຂ້ອງກໍຮ່ວມເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນການປະກາດ ແລະ ຮັບຮອງບ້ານໃຫຍ່ໜອງແກເປັນບ້ານຄ້າຍຄືຕົວເມືອງນ້ອຍໃນຊົນນະບົດຢ່າງເປັນທາງການ.

(ພາບ,ຂາວ: ສໍ ແກ້ວຄຳທອງຫຼວງ)