ກອງປະຊຸມໃຫຍ່ສະມາຊິກພັກຄະນະພັກ ກອງຮ້ອຍທະຫານຊາຍແດນ 152 ຄັ້ງທີ V ໄດ້ໄຂຂຶ້ນ ໃນວັນທີ 9 ທັນວາຜ່ານມານີ້, ທີ່ຫ້ອງປະຊຸມກອງຮ້ອຍທະຫານຊາຍແດນ 152 ເມືອງເງິນ ແຂວງໄຊຍະບູລີ, ໂດຍການເຂົ້າຮ່ວມເປັນກຽດມີິສະຫາຍ ພັອ ເນືອງທອງ ຊຸຍຍະຈັນ ຄະນະພັກກອງບັນຊາການທະຫານແຂວງ ຫົວໜ້າຫ້ອງພະລາທິການກອງບັນຊາການທະຫານແຂວງ, ມີຄະນະພັກ ຄະນະບັນຊາ ແລະ ສະມາຊິກພັກພາຍໃນກອງຮ້ອຍທະຫານຊາຍແດນ 152 ເຂົ້າຮ່ວມ,

ໃນກອງປະຊຸມ ສະຫາຍ ພັຕ ອິນສະແຫວງ ສຸກສະຫວັດ ເລຂາຄະນະພັກກອງຮ້ອຍທະຫານຊາຍແດນ 152 ໄດ້ຂຶ້ນກ່າວເປີດກອງປະຊຸມ ພ້ອມທັງຜ່ານຮ່າງບົດລາຍງານການ ເມືອງທັງ 2 ພາກ ບາງຕອນສະຫາຍກ່າວວ່າ: ຄະນະພັກກອງຮ້ອຍທະຫານຊາຍແດນ 152 ເປັນການຈັດຕັ້ງພັກໜຶ່ງທີ່ຂຶ້ນກັບກອງບັນຊາການທະຫານແຂວງໄຊຍະບູລີ ພາຍໃຕ້ການຊີ້ນໍາ-ນໍາພາໂດຍກົງຂອງກອງບັນຊາການທະຫານແຂວງ, ມີພາລະບົດບາດເປັນແກ່ນນຳທາງດ້ານການເມືອງ, ເຄື່ອນໄຫວເຮັດໜ້າທີ່ສຶກສາອົບຮົມການເມືອງ-ແນວຄິດ ໃຫ້ສະມາຊີກພັກ, ນາຍ ແລະ ພົນທະຫານ ຈັດຕັ້ງປະຕິບັດແນວທາງນະໂຍບາຍ, ມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ ແລະ ກົດໝາຍຂອງລັດ ໃຫ້ປະກົດຜົນເປັນຈິງ. ຜ່ານມາຄະນະພັກໄດ້ນຳພາ-ຊີ້ນຳວຽກງານເສດຖະກິດ ແກ້ໄຂຊີວິດການເປັນຢູ່ຕາມທິດເພິ່ງຕົນເອງ-ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ໂດຍຖືເອົາວຽກງານ 4 ປູກ 4 ລ້ຽງເປັນວຽກງານສຳຄັນ ໃນການແກ້ໄຂຊີວິດການເປັນຢູ່ຂອງສະມາຊິກພັກ ພະນັກງານ-ນັກຮົບ ເພື່ອສ້າງລາຍຮັບໃຫ້ແກ່ຄອບຄົວ ແລະ ກົມກອງ ໄປຄຽງຄູ່ກັບການຈັດຕັ້ງປະຕິບັດວາລະແຫ່ງຊາດ ແລະ ນຳພາການກໍ່ສ້າງກົມກອງ 3 ປອດ, ກອງວັດທະນະທຳ-ນັກຮົບວັດທະນະທຳຢ່າງເປັນປົກກະຕິ, ສະແດງອອກຜົນການກວດກາປະເມີນຜົນສາມາດຕີລາຄາແບ່ງປະເພດສະມາຊິກພັກ: ໄດ້ປະເພດແຂງ 36 ສະຫາຍ, ຍິງ 1ສະຫາຍ ກວມເອົາ 100%, ປະເພດອົງການຈັດຕັ້ງມະຫາຊົນໄດ້ປະເພດແຂງ, ປະເພດໜ່ວຍພັກໄດ້ປະເພດແຂງ, ປະເພດຄະນະພັກຮັກສາໄດ້ປະເພດແຂງ. ຈາກນັ້ນ, ໃນກອງປະຊຸມກໍໄດ້ຮັບຟັງການຜ່ານແຜນພັດທະນາວຽກງານໃນໄລຍະ 5 ປີຕໍ່ໜ້າ 2025-2029, ພ້ອມນີ້ ໃນກອງປະຊຸມ, ຄະນະໜ່ວຍພັກຊຸດເກົ່າກໍ່ໄດ້ຜ່ານບົດສໍາຫຼວດການນໍາພາລວມ ພ້ອມທັງກ່າວລາໜ້າທີ່. ຈາກນັ້ນ ຜູ້ແທນກອງປະຊຸມກໍ່ໄດ້ໃຊ້ສິດປະຊາທິປະໄຕຂອງຕົນໂດຍການປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ຊຶ່ງມີຜູ້ອອກຮັບສະໝັກຈຳນວນ 7 ສະຫາຍ, ເລືອກເອົາ 5 ສະຫາຍ. ກອງປະຊຸມຄັ້ງປະຖົມມະລຶກ ໄດ້ເປັນເອກະສັນເລືອກເອົາ ສະຫາຍ ພັຕ ສະຫວາດ ສະທິວົງສາ ເປັນເລຂາ, ສະຫາຍ ພັຕ ອິນສະແຫວງ ສຸກສະຫວັດ ເປັນຮອງເລຂາ, ສະຫາຍ ຮອ ແສງທອງ ສາຍບຸນມີ ເປັນປະທານກວດກາພັກ.

(ຂ່າວ: ຖວທ ເມືອງເງິນ)