ໃນວັນທີ 9 ທັນວານີ້ ທີ່ຫ້ອງວ່າການແຂວງວຽງຈັນ,ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ(ຄອສພ),ປະທານສະພາທິດສະດີສູນກາງພັກຮອງຫົວໜ້າອະນຸກຳມະການເນື້ອໃນກອງປະຊຸມໃຫຍ່ ຄັ້ງທີ XII ຂອງພັກ ໄດ້ເຄື່ອນໄຫວຊີ້ນຳວຽກງານຢູ່ແຂວງວຽງຈັນ ເພື່ອຕິດຕາມຊຸກຍູ້ການກະກຽມດຳເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ເກັບກໍາຂໍ້ມູນຕົວແບບການຜະລິດ ເພື່ອເປັນເປົ້າໝາຍພິຈາລະນາຄັດເລື່ອກເປັນຕົວແບບ ປະກອບຄຳເຫັນຕໍ່ກອງປະຊຸມໃຫຍ່ ຄັ້ງທີ XII ຂອງພັກ.

ສະຫາຍ ທອງສະຫວັນ ວົງສຳພັນ ຮອງເລຂາພັກຮອງເຈົ້າແຂວງວຽງຈັນ ຜູ້ຊີ້ນຳວຽກງານພັກ-ພະນັກງານໄດ້ລາຍງານໃຫ້ຮູ້ວ່າ: ແຂວງວຽງຈັນ ມີຄວາມອຸດົມສົມບູນ ທາງດ້ານຊັບພະຍາກອນທໍາມຊາດ ເຊັ່ນ: ມີແມ່ນໍ້າຫຼາຍສາຍ, ມີໜອງນໍ້າທຳມະຊາດທີ່ໃຫຍ່, ມີອ່າງນ້ຳງື່ມທີ່ອຸດົມສົມບູນ, ອາກາດສົດຊື່ນ, ມີແຮ່ທາດຫຼາຍຊະນິດ, ມີທິວທັດທຳມະຊາດທີ່ສວຍງາມ ແລະ ຮ່ອງຮອຍວັດຖຸບູຮານຫຼາຍແຫ່ງ, ສິ່ງດັ່ງກ່າວໄດ້ເປັນທ່າແຮງສຳຄັນ ໃນການພັດທະນາເສດຖະກິດ-ສັງຄົມ ຂອງແຂວງ, ເປັນທ່າແຮງໃນການຜະລິດກະສິກຳ, ອຸດສາຫະກໍາປຸງແຕ່ງ, ແຮ່ທາດ, ພະລັງງານ ແລະ ການທ່ອງທ່ຽວ.ນອກຈາກນີ້ ແຂວງວຽງຈັນ ຍັງມີພື້ນຖານໂຄງລ່າງທີ່ເອື້ອອໍານວຍຄວາມສະດວກ ເຊັ່ນ: ມີເສັ້ນທາງເລກທີ 13, ເສັ້ນທາງລົດໄຟ, ທາງດ່ວນ ແລະ ເສັ້ນທາງຫຼາຍສາຍ ທີ່ເຊື່ອມຈອດກັບບັນດາເມືອງ ແລະ ແຂວງໃກ້ຄຽງ; ມີລະບົບເຄືອຂ່າຍໂທລະຄົມ ແລະ ໄຟຟ້າ ຢ່າງທົ່ວເຖິງ. ປັດຈຸບັນ ແຂວງວຽງຈັນ ມີຄະນະບໍລິຫານງານພັກແຂວງ 34 ສະຫາຍຍິງ 4 ສະຫາຍ, ມີ 1,414 ການຈັດຕັ້ງຮາກຖານພັກ; ໃນນີ້ ມີ 106 ຄະນະພັກຮາກຖານ ແລະ 1,308 ໜ່ວຍພັກ (ເປັນໜ່ວຍພັກທີ່ຂຶ້ນກັບຄະນະພັກຮາກຖານ 710 ໜ່ວຍ ແລະ ເປັນໜ່ວຍພັກຮາກຖານ 598 ໜ່ວຍ), ທົ່ວແຂວງມີສະມາຊິກພັກ ທັງໝົດ 22,260 ສະຫາຍຍິງ 6,958 ສະຫາຍ (ເປັນສະມາຊິກພັກສໍາຮອງ 921 ສະຫາຍຍິງ 334 ສະຫາຍ). ທົ່ວແຂວງປະກອບມີ II ອົງຄະນະພັກເມືອງ, ມີ 1,202 ການຈັດຕັ້ງຮາກຖານພັກ ຢູ່ຂັ້ນເມືອງ; ໃນນີ້ ມີ 74 ຄະນະພັກຮາກຖານ ແລະ ມີ 1,128 ໜ່ວຍພັກ(ເປັນໜ່ວຍພັກຂຶ້ນກັບຄະນະພັກຮາກຖານ 559 ໜ່ວຍ ເເລະ ເປັນໜ່ວຍພັກຮາກຖານ 569 ໜ່ວຍ) ແລະ ມີບ້ານທັງໝົດ 431 ບ້ານ, ປະກອບດ້ວຍ 447 ໜ່ວຍພັກບ້ານ.

ການດຳເນີນກອງປະຊຸມໃຫຍ່ 3 ຂັ້ນຂອງພັກ ໃນທົ່ວແຂວງ. ໜ່ວຍພັກບ້ານ: ໄດ້ສຳເລັດກອງປະຊຸມໃຫຍ່ 100% (ໃນຈໍານວນ 431 ບ້ານ) ເລຂາໜ່ວຍພັກບ້ານ ຄວບຕໍາແໜ່ງນາຍບ້ານ 430 ບ້ານ (ມີ 1 ບ້ານ ບໍ່ຄວບຕໍາແໜ່ງ); ອາຍຸຕໍ່າກວ່າ 34 ປີ ມີ 9 ສະຫາຍ, ອາຍຸ 35 - 60 ປີ ມີ 422 ສະຫາຍ. ໜ່ວຍພັກສຳນັກງານ-ອົງການຂັ້ນເມືອງ: ເປີດກອງປະຊຸມໃຫຍ່ສຳເລັດແລ້ວ 667 ໜ່ວຍພັກ (ຍັງ 2 ໜ່ວຍພັກ ຢູ່ເມືອງຫີນເຫີບ). ຮາກຖານພັກ ອ້ອມຂ້າງແຂວງ: ປະກອບມີ 15 ຄະນະພັກຮາກຖານ, ມີ 79 ໜ່ວຍພັກ ທີ່ຂຶ້ນກັບຄະນະພັກຮາກຖານ ແລະ ມີ 17 ໜ່ວຍພັກຮາກຖານ (ບໍ່ນັບກຳລັງປະກອບອາວຸດ). ໄດ້ສຳເລັດການທາບທາມບຸກຄະລາກອນ ຮອບທີ I ຕິດພັນກັບການກວດກາດ້ານເນື້ອໃນ ສຳເລັດທັງໝົດແລ້ວ. ປັດຈຸບັນ ໄດ້ນຳພາດຳເນີນເຜີຍແຜ່ເຊື່ອມຊຶມເອກະສານທີ່ສໍາຄັນຂອງພັກກ່ອນບັ້ນດໍາເນີນຊີວິດການເມືອງທ້າຍສະໄໝ ຕິດພັນກັບການທາບທາມ ຮອບທີ 2 ສໍາເລັດການເຜີຍແຜ່ເຊື່ອມຊຶມເອກະສານແລ້ວ ຈໍານວນ 12 ຄະນະພັກຮາກຖານແລະ 14ໜ່ວຍພັກຮາກຖານ (ຍັງບໍ່ສໍາເລັດ 3 ຄະນະພັກຮາກຖານ ແລະ ຍັງ 3 ໜ່ວຍພັກຮາກຖານ)ໜ່ວຍພັກທີ່ຂຶ້ນກັບຄະນະພັກຮາກຖານ ອ້ອມຂ້າງເເຂວງ ໄດ້ສໍາເລັດການທາບທາມຮອບທີ 2, ດໍາເນີນຊີວິດການເມືອງທ້າຍສະໄໝ ແລະ ເປີດກອງປະຊຸມໃຫຍ່ສະມາຊິກພັກ ສຳເລັດຈຳນວນ 32 ໜ່ວຍພັກ, (ຍັງ 47 ໜ່ວຍພັກ). ສຳລັບຮາກຖານພັກທີ່ຂຶ້ນກັບ ຄະນະພັກ 2 ກໍາລັງປ້ອງກັນຊາດ-ປ້ອງກັນຄວາມສະຫງົບ:ແມ່ນມອບໃຫ້ຄະນະພັກກອງບັນຊາການນຳພາຈັດຕັ້ງປະຕິບັດ ຕາມທິດຊີ້ນຳຂອງກະຊວງສາຍຕັ້ງ. ພາຍຫຼັງສໍາເລັດຂັ້ນຮາກຖານພັກແລ້ວ ຄະນະຮັບຜິດຊອບຂັ້ນແຂວງ ຈະໄດ້ສົມທົບກະຊວງສາຍຕັ້ງ ຊຸກຍູ້ການກະກຽມດຳເນີນກອງປະຊຸມໃຫຍ່ 2 ຄະນະພັກກອງບັນຊາການ ໃຫ້ໄດ້ເປີດກອງປະຊຸມຕາມແຜນຄາດຄະເນໄວ້.

ສະຫາຍ ຄຳພັນ ເຜີຍຍະວົງ ໄດ້ມີຄຳເຫັນຊີ້ນຳວ່າ: ກ່ອນອື່ນ ສະແດງຄວາມຍ້ອງຍໍຊົມເຊີຍຕໍ່ຄະນະນຳຂອງແຂວງໃນການກະກຽມກອງປະຊຸມໃຫຍ່ 3 ຂັ້ນ ຂອງອົງຄະນະພັກແຂວງ ແລະ ການປະກອບຄຳຄິດຄຳເຫັນຂອງແຕ່ລະອະນຸກຳມະການ ມີຫຼາຍອັນທີ່ຈະແຈ້ງພໍສົມຄວນ ແລະ ມີຄວາມພ້ອມທຸກດ້ານ ເພື່ອກະກຽມຈັດກອງປະຊຸມໃຫຍ່ຂອງຕົນແລະ ກໍເຫັນວ່າ ຂັ້ນຕອນໃນການກະກຽມແຕ່ລະດ້ານ ແມ່ນໄດ້ດຳເນີນຕາມຂັ້ນຕອນໝົດແລ້ວ ນັບແຕ່ຂັ້ນຕອນການຈັດຕັ້ງຄະນະກຳມະການຮັບຜິດຊອບ ແລະ ບັນດາອະນຸກຳມະການຕ່າງໆ ເຫັນວ່າມີຜົນສຳເລັດ ແລະ ມີເນື້ອໃນຄົບຖ້ວນສົມຄວນ. ແຕ່ຢາກໃຫ້ກວດເບິ່ງຄືນບັນດາຕົວແບບຕ່າງໆເຊັ່ນ: ຕົວແບບໃນການຜະລິດ,ຕົວແບບໃນການບໍລິການ ການທ່ອງທ່ຽວ,ຕົວແບບທາງດ້ານວັດທະນະທຳ-ສັງຄົມ,ຕົວແບບທາງດ້ານວຽກງານການປ້ອງກັນຊາດ,ປ້ອງກັນຄວາມສະງົບ ອັນນີ້ຕ້ອງເຮັດຮອບດ້ານ ແລະ ໄລຍະຫ້າປີຜ່ານມາອັນທີ່ພົ້ນເດັ່ນທີ່ປະຕິບັດໄດ້ຕົວຈິງທີ່ຢັ້ງຢືນຕໍ່ບົດລາຍງານການເມືອງຂອງແຂວງວ່າມັນມີຄວາມຈິງແທ້,ບໍ່ວ່າຈະແມ່ນຫັດຖະກຳຕ່າງໆ ແລະ ເປັນຕົວແບບໜຶ່ງທີ່ເລີມຈາກຫົວຄິດປະດິດສ້າງຂອງປະຊາຊົນຕົວຈິງ,ຂອງບຸກຄົນຂອງການຈັດຕັ້ງຕົວຈິງ ທີ່ເກີດເປັນຕົວແບບດັ່ງກ່າວ,ຕ້ອງມີຫຼັກສະນະການນຳພາຂອງພັກ,ຕ້ອງມີຄວາມຍືນຍົງນັບມື້ນັບຂະຫຍາຍຕົວຂຶ້ນເລື້ອຍໆ ບໍ່ແມ່ນຕົວແບບຫ້າປີ ເມື່ອຮອດປີທີສອງ ແລະ ທີສາມລະໝົດໄປ ຕ້ອງຮັກສາໄວ້ໃຫ້ໄດ້, ຈາກຄອບຄົວຕົວແບບກໍໃຫ້ກາຍເປັນສະຫະກອນ,ຈາກສະຫະກອນກໍໃຫ້ກາຍເປັນນິຄົມ,ເປັນກຸ່ມການຜະລິດນັບມື້ນັບເຕີບໃຫຍ່ຂຶ້ນເລື້ອຍໆຈິງເປັນຕົວແບບໄດ້. ສຳລັບການວາງສະແດງຕະຫຼາດນັດສິນຄ້າຕ່າງໆກໍຄວນເຮັດ ບໍ່ໝາຍວ່າເຮັດແຕ່ມື້ກອງປະຊຸມເທົ່ານັ້ນ ອາດຈະເຮັດໃນງານສາມວັນປະຫວັດສາດ ແລະ ວັນສຳຄັນຕ່າງຂອງແຂວງ ແລະ ເມືອງ ເພື່ອເປັນການຊຸກຍູ້ການຜະລິດຈາກເມືອງນີ້ໄປວາງສະແດງຢູ່ເມືອງອື່ນ ແລະ ການວາງສະແດງຮູບພາບໃນກອງປະຊຸມກໍຄວນມີ ຮູບພາບການເຄື່ອນໄຫວຂອງແຂວງ ແລະ ເມືອງ ໃນໄລຍະຫ້າປີຜ່ານມາ ຫຼືວ່າຮູບຜູ້ແທນໄປເຄື່ອນໄຫວຢ້ຽມຢາມບັນດາຄອບຕົວຕົວແບບ.

ໃນວັນດຽວກັນ,ສະຫາຍ ຄຳພັນ ເຜີຍຍະວົງ,ສະຫາຍ ທອງສະຫວັນ ວົງສຳພັນ ພ້ອມດ້ວຍຄະນະນຳ ກໍໄດ້ເຄື່ອນໄຫວຢ້ຽມຢາມຕົວແບບການຜະລິດ ເພື່ອເປັນເປົ້າໝາຍພິຈາລະນາຄັດເລືອກເປັນຕົວແບບປະກອບຄຳເຫັນຕໍ່ກອງປະຊຸມໃຫຍ່ ຄັ້ງທີ XII ຂອງພັກ.ຄື: ຫັດຖະກຳປ້າແສນ ບ້ານໂພນໝີ ເມືອງວຽງຄຳ ແຂວງວຽງຈັນ,ກຸ່ມປູກເຂົ້າ ບ້ານໂພນແບ່ງ,ຫໍມູນເຊື້ອຕົ້ນແຕ້ ຈາລຶກຄວາມແຄ້ນ ແລະ ທ່ຽວຊົມສະຖານທີ່ທ່ອງທ່ຽວຂອງເມືອງເຟືອງ ແຂວງວຽງຈັນ.

(ຂ່າວ-ພາບ:ບຸນຕອມ).