ງານມະຫະກຳກິລານັກຮຽນມັດທະຍົມສຶກສາຄັ້ງທີ VII ທີ່ແຂວງສາລະວັນເປັນເຈົ້າພາບໄດ້ປິດລົງດ້ວຍບັນຍາກາດຄຶກຄື້ນມ່ວນຊື່ນ ແລະ ມີຜົນສໍາເລັດຕາມຄາດໝາຍທີ່ວາງໄວ້ໃນວັນທີ 22 ທັນວາ ນີ້.ແຂວງເຊກອງຈະໄດ້ຮັບກຽດເປັນເຈົ້າພາບຈັດງານມະຫະກຳກິລານັກຮຽນມັດທະຍົມສຶກສາ ຄັ້ງທີ VIIIໃນປີ 2027. ເປັນກຽດເຂົ້າຮ່ວມກ່າວປິດງານໂດຍທ່ານ ດາວວົງ ພອນແກ້ວ ເຈົ້າແຂວງສາລະວັນປະທານຈັດງານງານມະຫະກຳກິລານັກຮຽນມັດທະຍົມທົ່ວປະເທດ ຄັ້ງທີ VII, ທ່ານ ພຸດ ສິມມາລາວົງລັດຖະມົນຕີກະຊວງສຶກສາທິການ ແລະ ກິລາ ປະທານໂອແລັມປິກແຫ່ງຊາດລາວປະທານຮ່ວມງານດັ່ງກ່າວ, ທ່ານ ເຫຼັກໄລ ສີວິໄລ ເຈົ້າແຂວງເຊກອງ, ມີບັນດາທ່ານເຈົ້າແຂວງ, ຮອງລັດຖະມົນຕີ, ຮອງເຈົ້າແຂວງ, ຄະນະຮັບຜິດຊອບຈັດງານ, ບັນດາກຳມະການ, ອະນຸກຳມະການ, ຄະນະນຳອາວຸໂສບຳນານ, ຄະນະນຳນັກກິລາ, ນັກກິລາ, ນັກຮຽນມັດທະຍົມສຶກສາ ແລະ ປະຊາຊົນລາວບັນດາເຜົ່າຊາວແຂວງສາລະວັນເຂົ້າຮ່ວມ.

ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນຮອງປະທານຈັດງານໄດ້ກ່າວວ່າ:ງານມະຫະກຳກິລານັກຮຽນມັດທະຍົມສຶກສາຄັ້ງທີ VII ທີ່ແຂວງສາລະວັນເປັນເຈົ້າພາບ ໄດ້ເປີດຂຶ້ນແຕ່ວັນທີ 13 ທັນວາ 2024 ແລະ ດໍາເນີນມາຮອດວັນທີ 22 ທັນວາ 2024 ໄດ້ປິດການແຂ່ງຂັນຢ່າງເປັນທາງການດ້ວຍ ຜົນສໍາເລັດອັນຈົບງາມ. ຜົນສຳເລັດດັ່ງກ່າວ ແມ່ນເນື່ອງມາຈາກການກະກຽມ, ການວາງແຜນເປັນແຕ່ລະໄລຍະ, ການປະກອບສ່ວນດ້ວຍຄວາມຮັບຜິດຊອບສູງຂອງທຸກພາກສ່ວນເຮັດໃຫ້ມີຄວາມພ້ອມໃນດ້ານຕ່າງໆ ໂດຍສະເພາະແມ່ນເຮັດໃຫ້ພິທີເປີດ-ປິດ ແລະ ການຈັດການແຂ່ງຂັນກິລາປະເພດຕ່າງໆໄດ້ສຳເລັດລົງດ້ວຍຄວາມເປັນລະບຽບຮຽບຮ້ອຍດີ, ກຳມະການຕັດສິນກໍໄດ້ເຮັດໜ້າທີ່ຂອງຕົນດ້ວຍຄວາມຮັບຜິດຊອບສູງຕາມທີ່ໄດ້ປະຕິຍານໄວ້, ສ່ວນນັກກິລາແຕ່ລະພາກສ່ວນ ກໍໄດ້ຕັ້ງໜ້າແຂ່ງຂັນ, ມີສະຕິໃນການປະຕິບັດຕາມກົດລະບຽບ, ກະຕິກາທີ່ວາງອອກຢ່າງເຂັ້ມງວດ; ໃນເວລາແຂ່ງຂັນກໍໄດ້ສະແດງອອກແຈ້ງເຖິງນໍ້າໃຈນັກກິລາຢ່າງແທ້ຈິງ, ຮູ້ໄດ້, ຮູ້ເສຍ, ຮູ້ອະໄພຊຶ່ງກັນ ແລະ ກັນ, ອັນໄດ້ປະກອບສ່ວນຜູກແໜ້ນຄວາມສາມັກຄີໄມຕີຈິດ ມິດຕະພາບ, ມີຄວາມສາມັກຄີໃນໝູ່ນັກຮຽນ ແລະ ນັກກິລາດ້ວຍກັນ ເຮັດໃຫ້ການແຂ່ງຂັນເຕັມໄປດ້ວຍຮອຍຍິ້ມ, ຄວາມເບີກບານມ່ວນຊື່ນ ແລະ ມີຄວາມຊົງຈຳທີ່ດີ; ອີກດ້ານໜຶ່ງຍັງໄດ້ເປັນການຍົກລະດັບຄວາມຮູ້, ຄວາມສາມາດ ແລະ ປະສົບການໃນດ້ານກິລາຂອງນັກຮຽນ ເພື່ອສ້າງຕົນເອງໃຫ້ເປັນນັກກິລາຮຸ່ນສືບທອດກ້າວຂຶ້ນສູ່ຄຸນນະພາບໃໝ່ ເພື່ອກຽມເຂົ້າແຂ່ງຂັນກິລາລະດັບຊາດ, ພາກພື້ນ ແລະ ສາກົນໃນຕໍ່ໜ້າ.

ທ່ານ ສົມໃຈ ອຸ່ນຈິດ ກ່າວຕື່ມວ່າ: ງານມະຫະກຳກິລາຄັ້ງນີ້ ໄດ້ດຳເນີນການແຂ່ງຂັນປະກອບມີ 12 ປະເພດກິລາ, ຕິດພັນກັບນະໂຍບາຍການພັດທະນາຊັບພະຍາກອນມະນຸດຮອບດ້ານ, ເປັນຕົ້ນແມ່ນການສົ່ງເສີມໃຫ້ນັກຮຽນໄດ້ຮັບການພັດທະນາທາງດ້ານຮ່າງກາຍ ແລະ ປັນຍາຕາມ 5 ຫຼັກມູນຂອງການສຶກສາ, ພ້ອມນີ້ ກໍເປັນການບົ່ມສອນສ້າງໃຫ້ນັກກິລາ ຢູ່ໃນໄວເຍົາວະຊົນ, ຊາວໜຸ່ມໄດ້ມີສະຕິຕໍ່ການຈັດຕັ້ງ, ມີລະບຽບວິໄນ, ມີຄຸນສົມບັດ, ມີຄວາມສາມັກຄີມິດຕະພາບ ແລະ ແລກປ່ຽນປະສົບການດ້ານກິລາ ຊຶ່ງເປັນເງື່ອນໄຂສົ່ງເສີມໃຫ້ເຂົາເຈົ້າສາມາດເກັບກຳເອົາບົດຮຽນປະສົບການທີ່ໄດ້ຮັບໃນຄັ້ງນີ້ ໄປພັດທະນາສົ່ງເສີມຕົນເອງໃຫ້ສູງຂຶ້ນ.

ສຳລັບການແຂ່ງຂັນຄະນະຈັດງານແຂ່ງຂັນ ສາມາດສັງລວມຜົນຈັດອັນດັບຕາຕະລາງຫຼຽນລາງວັນ ແຕ່ອັນດັບທີ 1-3 ແລະ ຕາມລຳດັບລົງມາຄື: ທີ 1 ນະຄອນຫຼວງວຽງຈັນ ໄດ້ຮັບ 26 ຫຼຽນຄຳ, 21 ຫຼຽນເງິນ, 29 ຫຼຽນທອງລວມທັງໝົດ 76 ຫຼຽນ;ທີ 2 ແຂວງຈຳປາສັກ ໄດ້ຮັບ 20 ຫຼຽນຄຳ, 20 ຫຼຽນເງິນ ແລະ 20 ຫຼຽນທອງລວມທັງໝົດ 60 ຫຼຽນແລະ ທີ 3 ແຂວງສາລະວັນເຈົ້າພາບ ໄດ້ຮັບ12 ຫຼຽນຄຳ, 20 ຫຼຽນເງິນ ແລະ 16 ຫຼຽນທອງລວມທັງໝົດ 48 ຫຼຽນ.

ສັງລວມແລ້ວ ການຈັດງານກິລາໃນຄັ້ງນີ້ ໄດ້ຮັບຜົນສຳເລັດຕາມທີ່ຄາດຫວັງໄວ້ທຸກປະການຄື: ທາງດ້ານການເມືອງ, ຄວາມສະຫງົບ, ເສດຖະກິດ, ວັດທະນະທຳ-ສັງຄົມຂອງແຂວງ ຕະຫຼອດຮອດດ້ານວິຊາສະເພາະ, ພ້ອມນີ້ ຍັງເຫັນໄດ້ຄວາມສາມັກຄີ ເປັນຈິດໜຶ່ງໃນດຽວ, ການພັດທະນາກິລາລະດັບນັກຮຽນຂອງແຕ່ລະແຂວງ,ການພັດທະນາບຸກຄະລາກອນໃຫ້ແກ່ແຂວງສາລະວັນ, ພ້ອມທັງພື້ນຖານໂຄງລ່າງໄວ້ເປັນອັນສືບທອດໃຫ້ແກ່ແຂວງໃນການພັດທະນາຂົງເຂດກິລາ-ກາຍຍະກຳ ກໍຄືເປັນສະຖານທີ່ອອກກຳລັງກາຍ, ຫຼິ້ນກິລາ ເພື່ອສຸຂະພາບຂອງມວນຊົນ ແລະ ການແຂ່ງຂັນກິລາໃນລະດັບຕ່າງໆ ຢູ່ພາຍໃນແຂວງໃນຕໍ່ໜ້າ ເປັນບ່ອນຝຶກຊ້ອມ, ສ້າງນັກກິລາທີ່ມີທັດສະ ແລະ ສ້າງຂະບວນການໃຫ້ນັກຮຽນ ແລະ ຊາວໜຸ່ມພາຍໃນແຂວງຫັນມາຫຼິ້ນກິລາໃຫ້ຫຼາຍຂຶ້ນ, ຫຼຸດຜ່ອນການມົ້ວສຸມສິ່ງເສບຕິດ ແລະ ອື່ນໆ.

ພ້ອມນັ້ນ, ໃນພິທີປິດການແຂ່ງຂັນ ຍັງໄດ້ມີການກ່າວມອບ-ຮັບ ທຸງກິລາ ໃຫ້ແຂວງຖັດໄປເປັນເຈົ້າພາບ,ໃຫ້ກຽດມອບທຸງໂດຍທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ປະທານໂອແລັມປິກແຫ່ງຊາດລາວ,ຮັບໂດຍ ທ່ານ ເຫຼັກໄລ ສີວິໄລ ເຈົ້າແຂວງເຊກອງ ກຽມເປັນເຈົ້າພາບງານມະຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VIIIໃນປີ 2027.

ຂ່າວ-ພາບ: ບຸນອູ້ມ