ໃນໂອກາດຈັດກອງປະຊຸມລັດພາຄີສົນທິສັນຍາວ່າດ້ວຍອາວຸດຊີວະພາບ ທີ່ ເຊີແນວ ຫວ່າງບໍ່ດົນມານີ້, ສປປ ລາວ ແລະສປຈີນ ໄດ້ສໍາເລັດການເປັນເຈົ້າພາບຮ່ວມຈັດກອງປະຊຸມປິ່ນອ້ອມພາຍໃຕ້ຫົວຂໍ້: “ບົດຮຽນທີ່ຖອດຖອນໄດ້ຈາກກອງປະຊຸມສໍາມະນາຄັ້ງທໍາອິດວ່າດ້ວຍການຈັດຕັ້ງປະຕິບັດສົນທິສັນຍາອາວຸດຊີວະພາບ ແລະການສົ່ງເສີມຄວາມປອດໄພ ແລະ ຄວາມໝັ້ນຄົງທາງຊີວະພາບສໍາລັບພາກພື້ນອາຊີຕາເວັນອອກສ່ຽງໃຕ້ ຫຼື ອາຊຽນ”ພາຍໃຕ້ການເປັນປະທານຮ່ວມຂອງ ທ່ານ ລັດສະໝີ ແກ້ວມະນີເອກອັກຄະລັດຖະທູດຜູ້ຕາງໜ້າຖາວອນແຫ່ງສປປລາວປະຈຳ ສປຊ ແລະອົງການຈັດຕັ້ງສາກົນອື່ນໆທີ່ເຊີແນວແລະ ທ່ານ SHEN Jian ເອກອັກຄະລັດຖະທູດຜູ້ຊີ້ນໍາວຽກຫຼຸດຜ່ອນອາວຸດ ສປຈີນໂດຍມີຜູ້ເຂົ້າຮ່ວມທັງໝົດ 70 ທ່ານ.
ກອງປະຊຸມຄັ້ງນີ້, ໄດ້ຕີລາຄາສູງຕໍ່ຜົນສໍາເລັດຂອງກອງປະຊຸມສໍາມະນາ ທີ່ ສປປ ລາວ ແລະ ສປຈີນ ໄດ້ເປັນເຈົ້າພາບຮ່ວມໃນເດືອນຕຸລາ 2024 ຜ່ານມາ ທີ່ ເສິນເຈີ້ນ ສປຈີນ ຊຶ່ງສະແດງອອກໃນການແລກປ່ຽນບົດຮຽນທີ່ດີ, ການໂຄສະນາ-ເຜີຍແຜ່ ແລະການກໍານົດທິດທາງໃນຕໍ່ໜ້າ ລວມທັງເຫັນໄດ້ສິ່ງທ້າທາຍ ແລະຄວາມຈໍາເປັນຂອງການຮ່ວມມືຂອບສອງຝ່າຍ ແລະການຮ່ວມມືຢູ່ລະດັບພາກພື້ນ ແລະສາກົນ ເພື່ອຈັດຕັ້ງປະຕິບັດສົນທິສັນຍາອາວຸດຊີວະພາບ ແລະການສົ່ງເສີມຄວາມໝັ້ນຄົງ ແລະຄວາມປອດໄພທາງຊີວະພາບ.
ກອງປະຊຸມສະແດງຄວາມຂອບໃຈຕໍ່ການເປັນເຈົ້າພາບຮ່ວມຂອງ ສປປ ລາວ ແລະສປຈີນ ແລະຄາດວ່າຈະມີກອງປະຊຸມລັກສະນະດັ່ງກ່າວຈັດຂຶ້ນໃນຕໍ່ໜ້າຕື່ມ.
ຂ່າວ:ກະຊວງການຕ່າງປະເທດ