ຂ່າວຕ່າງປະເທດລາຍງານ ເມື່ອບໍ່ດົນມານີ້, ສຳນັກງານພາສີອາກອນຂອງ ສ ເກົາຫຼີ ໄດ້ເປີດເຜີຍບົດລາຍງານໂດຍລະບຸວ່າ: ການສົ່ງອອກເຄື່ອງດື່ມຂອງ ສ ເກົາຫຼີ ໃນໄລຍະ 3 ໄຕມາດທຳອິດຂອງປີ 2023 ເພີ່ມສູງຂຶ້ນເປັນປະຫວັດສາດຢູ່ທີ່ 529 ລ້ານໂດລາ ເພີ່ມຂຶ້ນ 6,3% ເມື່ອທຽບກັບໄລຍະເວລາດຽວກັນຂອງປີຜ່ານມາ.

ບົດລາຍງານລະບຸຕື່ມວ່າ: ປະລິມານການສົ່ງອອກເຄື່ອງດື່ມຂອງ ສ ເກົາຫຼີ ໃນໄລຍະ 3 ໄຕມາດທຳອິດ ຢູ່ທີ່ 425.000 ໂຕນ ເພີ່ມຂຶ້ນ 1,3% ເມື່ອທຽບແບບລາຍປີ. ອີກຢ່າງໜຶ່ງ, ການສົ່ງອອກເຄື່ອງດື່ມ ສ ເກົາຫຼີ ໄປຍັງຈີນຂະຫຍາຍຕົວໃນລະດັບເລກ 2 ຫຼັກ ຢູ່ທີ່ 151 ລ້ານໂດລາ ແຕ່ການສົ່ງອອກສູ່ອາເມຣິກາ ແລະ ຫວຽດນາມ ຫຼຸດລົງເຫຼືອ 70 ລ້ານໂດລາ ແລະ 48 ລ້ານໂດລາ ໃນໄລຍະໄຕມາດທຳອິດຂອງປີນີ້.