ໃນຂອບເຂດບັນດາການເຄື່ອນໄຫວສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ - ອີຢິບ (1963 – 2023), ໃນວັນທີ 31 ຕຸລາ ຜ່ານມາ ຢູ່ນະຄອນຫຼວງ ຄາຍໂຣ ສະຖານທູດຫວຽດນາມ ປະຈຳ ອີຢິບ ໄດ້ຈັດກອງປະຊຸມສຳມະນາການເຕີບໂຕສີຂຽວ ແລະ ການທູດດິນຟ້າອາກາດ ໃນສະພາບການຟື້ນຟູເສດຖະກິດ: ແລກປ່ຽນບົດຮຽນໃນການດຶງດູດການເງິນສີຂຽວ ລະຫວ່າງ ອີຢິບ ແລະ ຫວຽດນາມ.

ໃນກອງປະຊຸມສຳມະນາ, ທ່ານ ຫງວຽນຮຸຍຢຸງ ເອກອັກຄະລັດຖະທູດ ຫວຽດນາມ ປະຈຳ ອີຢິບ ໃຫ້ຮູ້ວ່າ: ລັດຖະບານ ຫວຽດນາມ ແລະ ລັດຖະບານ ອີຢິບ ໄດ້ເອົາໃຈໃສ່ການຊຸກຍູ້ການເຕີບໂຕສີຂຽວ, ຖືນີ້ແມ່ນເສັ້ນທາງພັດທະນາແບບຍືນຍົງ, ໃນສະພາບເສດຖະກິດທົ່ວໂລກພວມຄ່ອຍໆຟື້ນຟູພາຍຫຼັງພະຍາດລະບາດໂຄວິດ - 19 ແລະ ບັນດາການຜັນແປໂດຍກະທັນຫັນໃນການພົວພັນສາກົນ ອາດຈະສົ່ງຜົນກະທົບເຖິງໂລກ. ທ່ານຖືວ່າ, ເພື່ອປະຕິບັດສຳເລັດບັນດາຄຳໝັ້ນສັນຍາທີ່ໄດ້ວາງອອກນັ້ນ, ສິ່ງສຳຄັນທີ່ສຸດແມ່ນ 2 ປະເທດຕ້ອງນຳໃຊ້ການທູດດິນຟ້າອາກາດເພື່ອດຶງດູດບັນດາແຫຼ່ງການເງິນສີຂຽວ.

ໃນກອງປະຊຸມສຳມະນາ, ບັນດານັກປາຖະກະຖາໄດ້ຍົກໃຫ້ເຫັນແງ່ມູມທິດສະດີ ແລະ ພຶດຕິກຳຕົວຈິງຂອງການທູດດິນຟ້າອາກາດ, ເນັ້ນໜັກເຖິງການຮ່ວມມືໃນການພັດທະນາບັນດາເຕັກໂນໂລຊີພາຍໃນປະເທດ ເພື່ອຊຸກຍູ້ການເຕີບໂຕສີຂຽວ ແລະ ຄວາມເປັນເຈົ້າຂອງເຕັກໂນໂລຊີ.