ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 1 ພະຈິກ ຜ່ານມາ ຢູ່ທຳນຽບປະທານປະເທດ, ທ່ານ ຫວໍວັນເຖືອງ ປະທານປະເທດຫວຽດນາມ ໄດ້ເປັນປະທານພິທີຕ້ອນຮັບ ທ່ານ ຢູນາກິນ ຄູເຣຊັກ (Ukhnaagiin Khurelsukh) ປະທານາທິບໍດີ ມົງໂກນ ຢ່າງສົມກຽດ.

ຂ່າວລະບຸວ່າ: ໃນການພົບປະເຈລະຈາ ພາຍຫຼັງພິທີຕ້ອນຮັບ, ທ່ານ ຫວໍວັນເຖືອງ ໄດ້ຕີລາຄາສູງຕໍ່ທ່ານປະທານາທິບໍດີມົງໂກນ ເລືອກເອົາຫວຽດນາມແມ່ນປະເທດທຳອິດໄປຢ້ຽມຢາມສອງຝ່າຍ ໃນພາກພື້ນອາຊີຕາເວັນ ອອກສ່ຽງໃຕ້. ການນຳສອງທ່ານໄດ້ເຫັນດີເປັນເອກະພາບຈະພ້ອມກັນສືບຕໍ່ຊຸກຍູ້ການພົວພັນສອງປະເທດໃຫ້ພັດທະນາຢ່າງແທດຈິງ, ມີປະສິດທິຜົນໃນຫຼາຍຂົງເຂດ, ສົມກັບຄວາມສາມາດບົ່ມຊ້ອນຂອງແຕ່ລະປະເທດ, ສົມທົບກັນຜັນຂະຫຍາຍບັນດາການເຄື່ອນໄຫວເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນສ້າງຕັ້ງການພົວພັນທາງການທູດໃນປີ 2024, ຊຸກຍູ້ການຜັນຂະຫຍາຍບັນດາຂໍ້ຕົກລົງຮ່ວມມືສອງຝ່າຍ, ມຸ່ງໄປເຖິງການສ້າງຕັ້ງຂອບເຂດການພົວພັນໃໝ່ໃນໄລຍະຈະມາເຖິງ.

ໃນຕອນບ່າຍວັນດຽວກັນ, ຢູ່ສຳນັກງານສູນກາງພັກ, ທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ກໍໄດ້ໃຫ້ການຕ້ອນຮັບທ່ານປະທານາທິບໍດີ ມົງໂກນ ເຊັ່ນດຽວກັນ.