ຂ່າວສານຊີອາໄອລາຍງານ ເມື່ອບໍ່ດົນມານີ້, ພາຍຫຼັງຮັບຟັງບົດລາຍງານຈາກຂ້າຫຼວງໃຫຍ່ວຽກງານຊາວອົບພະຍົບຂອງອົງການສະຫະປະຊາຊາດ, ທ່ານ ເກີງສວາງ ຮອງຜູ້ຕາງໜ້າຖາວອນຈີນ ປະຈຳອົງການສະຫະປະຊາຊາດ ໄດ້ຮຽກຮ້ອງໃຫ້ປະຊາຄົມໂລກສະໜັບສະໜູນວຽກງານຂອງອົງການຊ່ວຍເຫຼືອຊາວອົບພະຍົບຫຼາຍຝ່າຍຄື: ໂຄງການຊາວອົບພະຍົບຂອງອົງການສະຫະປະຊາຊາດ.
ທ່ານ ເກີງສວາງ ກ່າວວ່າ: ການປະທະກັນດ້ວຍກຳລັງອາວຸດແມ່ນສາເຫດສຳຄັນທີ່ເຮັດໃຫ້ວິກິດການຊາວອົບພະຍົບໃນປັດຈຸບັນໜັກໜ່ວງຂຶ້ນກວ່າເກົ່າ. ສະພາຄວາມໝັ້ນຄົງອົງການສະຫະປະຊາຊາດຄວນປະຕິບັດໜ້າທີ່ສຳຄັນທີ່ສຸດຄື: ປົກປັກຮັກສາສັນຕິພາບ ແລະ ຄວາມໝັ້ນຄົງສາກົນ, ໃຫ້ການຮັບປະກັນອັນເຂັ້ມແຂງແກ່ຊາວອົບພະຍົບໃນການກັບຄືນສູ່ບ້ານເກີດເມືອງນອນ. ພ້ອມກັນນັ້ນ, ການປົກປ້ອງຊາວອົບພະຍົບຕ້ອງຢຶດໝັ້ນຫຼັກການຄວາມເປັນກາງ, ຫຼີກລ່ຽງບໍ່ໃຫ້ມີສອງມາດຕະຖານ ແລະ ຫັນເປັນການເມືອງ. ການລົງໂທດພຽງລຳພັງແຕ່ຝ່າຍດຽວໄດ້ສະກັດກັ້ນການຟື້ນຟູເສດຖະກິດ ແລະ ປັບປຸງຊີວິດການເປັນຢູ່ປະຊາຊົນຂອງປະເທດທີ່ກ່ຽວຂ້ອງມາໂດຍຕະຫຼອດ ແລະ ໄດ້ສົ່ງຜົນກະທົບອັນໜັກໜ່ວງຕໍ່ປະເທດທີ່ກ່ຽວຂ້ອງໃນການແກ້ໄຂບັນຫາຊາວອົບພະຍົບ. ປະຊາຄົມໂລກຄວນເພີ່ມທະວີການລົງທຶນເຂົ້າໃນຂົງເຂດການສ້າງສັນຕິພາບ, ສະໜັບສະໜູນໃຫ້ເຂດເກີດການປະທະກັນເລັ່ງລັດການສ້າງສາຄືນໃໝ່ພາຍຫຼັງການປະທະກັນສິ້ນສຸດລົງ, ຊ່ວຍເຫຼືອຊາວອົບພະຍົບກັບຄືນສູ່ບ້ານເກີດເມືອງນອນຂອງຕົນ.
