ພິທີເປີດຮຽນທິດສະດີການເມືອງຂັ້ນຕົ້ນ ລະບົບ 3 ເດືອນ ຮຸ່ນທີ III ໃຫ້ພະນັກງານຫຼັກແຫຼ່ງ, ພະນັກງານສືບທອດປ່ຽນແທນຂອງເມືອງ ແລະ ຂະແໜງການຈາກບັນດາພະແນກການອ້ອມຂ້າງແຂວງ ແລະ ສອງກຳລັງປະກອບອາວຸດຂຶ້ນໃນວັນທີ 3 ພະຈິກ ຜ່ານມາ ທີ່ຢູ່ໂຮງຮຽນການເມືອງ ແລະ ການປົກຄອງແຂວງສາລະວັນ, ໂດຍໃຫ້ກຽດເຂົ້າຮ່ວມຂອງ ສະຫາຍ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານຂັ້ນແຂວງ, ສະຫາຍ ນາງ ໄກສອນ ຝ້າຍພົມມະວົງໄຊ ຫົວໜ້າໂຮງຮຽນການເມືອງ ແລະ ການປົກຄອງແຂວງ, ຮອງຫົວໜ້າໂຮງຮຽນ, ມີຄູ-ອາຈານ, ນັກສຶກສາ ແລະ ແຂກຖືກເຊີນເຂົ້າຮ່ວມ.
    ສະຫາຍ ເສີດ ສີວິໄລ ຫົວໜ້າຂະແໜງການຄຸ້ມຄອງການຮຽນ-ການສອນ ໂຮງຮຽນການເມືອງ ແລະ ການປົກຄອງແຂວງ ໄດ້ຜ່ານແຜນການຮຽນ-ການສອນ ລະບົບຂັ້ນຕົ້ນ ຮຸ່ນທີ III ສົກຮຽນ 2023-2024, ມີນັກສຶກສາທັງໝົດ 60 ສະຫາຍ ຍິງ 18 ສະຫາຍ, ຫຼັກສູດກຸ່ມວິຊາຮຽນຄື: ກຸ່ມວິຊາປັດຊະຍາ, ກຸ່ມວິຊາເສດຖະສາດການເມືອງມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາສາດ, ການເມືອງວິທະຍາ ແລະ ສັງຄົມສາດ, ແນວຄິດ ໄກສອນ ພົມວິຫານ (ການເມືອງ, ເສດຖະກິດ, ສັງຄົມ ແລະ ວັດທະນະທຳ), ກຸ່ມວິຊາພື້ນຖານການຄຸ້ມຄອງບໍລິຫານລັດ, ທິດສະດີ ແລະ ກົດໝາຍ, ເຕັກນິກບໍລິຫານ, ກຸ່ມວິຊາປະຫວັດສາດພັກ ແລະ ກໍ່ສ້າງພັກ, ກຸ່ມວິຊາບັງຄັບ ແລະ ຫົວຂໍ້ລາຍງານເພີ່ມ, ຂຽນບົດລາຍງານຈົບຂັ້ນ. ທັງນີ້ຍົກລະດັບຄວາມຮູ້ຄວາມສາມາດທັງດ້ານທິດສະດີການເມືອງ, ແນວຄິດໄກສອນ ພົມວິຫານ, ແນວທາງນະໂຍບາຍຂອງພັກ, ການຄຸ້ມຄອງຂອງລັດ ເຮັດໃຫ້ພະນັກງານມີແນວຄິດ, ທັດສະນະຫຼັກໝັ້ນຊົນຊັ້ນກໍາມະກອນ, ເຊື່ອໝັ້ນຕໍ່ການນໍາພາຂອງພັກ, ເຊື່ອໝັ້ນຕໍ່ອຸດົມການ ກໍຄືພາລະກິດປ່ຽນແປງໃໝ່ ຢ່າງມີຫຼັກການຂອງພັກ, ມີຄວາມຈົງຮັກພັກດີຕໍ່ປະເທດຊາດ ມີຄວາມຫ້າວຫັນເປັນແບບຢ່າງໃນທຸກວຽກງານ. 
    ສຳລັບການຈັດຕັ້ງປະຕິບັດການຮຽນ-ການສອນ ແມ່ນໄດ້ປະຕິບັດຕາມຫຼັກສູດຮຽນ ເປັນຕົ້ນ: ການບັນລະຍາຍ, ສຳມະນາເປັນໜ່ວຍ, ສອບເສັງແຕ່ລະວິຊາ ຫຼື ກຸ່ມວິຊາຮຽນ ໂດຍເອົາທິດສະດີມາສົມທຽບກັບພຶດຕິກຳຕົວຈິງ, ທັງຈະໄດ້ມີການປະເມີນ, ກວດກາຕາມລາຍວິຊາຮຽນ ແລະ ຂັ້ນຕອນອື່ນໆ. ໂດຍໃຊ້ເວລາຮຽນ 3 ເດືອນ ຫຼືປະມານ 70 ວັນ, ຮຽນຕົວຈິງ 60 ວັນ ເທົ່າກັບ 420 ຊົ່ວໂມງ,ນອກຈາກການຄົ້ນຄວ້າຮໍ່າຮຽນ ກໍຈະໄດ້ມີການຈັດກິດຈະກໍາ, ທັດສະນະສຶກສາ, ການແລກປ່ຽນຄວາມຮູ້ໃນດ້ານຕ່າງໆຕື່ມອີກ.
ຂ່າວ-ພາບ: ວິໄລວອນ ສິດທິໄຊ