ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ໄດ້ນໍາພາຜູ້ຕາງໜ້າ ຈາກລັດຖະບານທີ່ໃຫ້ທຶນການແກ້ໄຂບັນຫາລະເບີດບໍ່ທັນແຕກຢູ່ ສປປ ລາວ ເຊັ່ນ: ການາດາ, ອຽກລັງ, ຍີ່ປຸ່ນ, ສ ເກົາຫຼີ, ລຸກຊຳບວກ, ນູແວນເຊລັງ,  ສ ອາເມຣິກາ ພ້ອມດ້ວຍຄະນະຈາກສູນກາງ   ເຂົ້າຢ້ຽມຂໍານັບທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ  ໃນວັນທີ 8 ພະຈິກນີ້ ທີ່ຫ້ອງວ່າການປົກຄອງແຂວງຊຽງຂວາງ ໃນໂອກາດທີ່ຄະນະດັ່ງກ່າວເດີນທາງມາເຄື່ອນໄຫວຢ້ຽມຢາມໂຄງການເກັບກູ້ລະເບີດບໍ່ທັນແຕກ ຢູ່ແຂວງຊຽງຂວາງ ລະຫວ່າງວັນທີ 8-10 ພະຈິກນີ້.
    ໂອກາດນີ້, ທ່ານເຈົ້າແຂວງຊຽງຂວາງ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ທ່ານ ຮອງລັດຖະມົນຕີກະຊວງການຕ່າງປະເທດ ທີ່ໄດ້ນໍາພາຄະນະດັ່ງກ່າວ ເດີນທາງມາຢ້ຽມຢາມແຂວງຊຽງຂວາງເພື່ອຕິດຕາມເບິ່ງການຈັດຕັ້ງປະຕິບັດໂຄງການເກັບກູ້ລະເບີດບໍ່ທັນແຕກຢູ່ແຂວງຊຽງຂວາງຄັ້ງນີ້ທີ່ໄດ້ຮັບທຶນສະໜັບສະໜູນຈາກບັນດາປະເທດດັ່ງກ່າວ ໂດຍຜ່ານອົງການສະຫະປະຊາຊາດ ຊຶ່ງໄດ້ຕິດພັນກັບບັນດາກິດຈະກຳຕ່າງໆຂອງໂຄງການ ເປັນຕົ້ນ ການກວດກູ້, ສະໜັບສະໜູນຊ່ວຍເຫຼືອ ໂຄສະນາເຜີຍແຜ່ຜົນຮ້າຍຈາກລະເບີດບໍ່ທັນແຕກໃຫ້ປະຊາຊົນບ້ານເປົ້າໝາຍລວມທັງການສ້າງຄວາມເຂັ້ມແຂງຢູ່ຂັ້ນບ້ານ ແລະ ອື່ນໆ. ພ້ອມນີ້, ທ່ານເຈົ້າແຂວງຊຽງຂວາງຍັງໄດ້ລາຍງານສະພາບລວມກ່ຽວກັບການພັດທະນາເສດຖະກິດ-ສັງຄົມຂອງແຂວງກໍຄືການເອົາໃຈຈັດຕັ້ງປະຕິບັດວຽກງານດັ່ງກ່າວຜ່ານມາໃຫ້ຄະນະດັ່ງກ່າວຊາບໂດຍສະເພາະການໂຄສະນາເຜີຍແຜ່ຜົນຮ້າຍຈາກລະເບີດບໍ່ທັນແຕກຢູ່ບ້ານເປົ້າໝາຍ ແລະ ອື່ນໆ.
   ໂອກາດດຽວກັນນີ້, ທ່ານ ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຕໍ່ທ່ານເຈົ້າແຂວງຊຽງຂວາງ ພ້ອມທັງລາຍງານ ແລະ ສະເໜີຈຸດປະສົງຂອງການເດີນທາງມາເຄື່ອນໄຫວຢ້ຽມຢາມແຂວງຊຽງຂວາງຄັ້ງນີ້ໃຫ້ທ່ານເຈົ້າແຂວງຊາບຕື່ມອີກ.
(ຂ່າວ-ພາບ: ວັນເພັງ)