ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້ ຢູ່ສຳນັກງານອົງການ UNESCO ທີ່ນະຄອນຫຼວງປາຣີ ປະເທດຝຣັ່ງ, ຄະນະຜູ້ຕາງໜ້າ ຫວຽດນາມ ປະຈຳ UNESCO ໄດ້ຈັດຄ່ຳຄືນວັດທະນະທຳ ຫວຽດນາມ ດ້ວຍຫົວຂໍ້: “ມໍລະດົກວັດທະນະທຳແມ່ນກຳລັງໜູນໃຫ້ແກ່ສັນຕິພາບ, ສ້າງຄວາມເຂັ້ມແຂງດ້ວຍຕົນເອງ ແລະ ພັດທະນາແບບຍືນຍົງ”. ໂດຍໄດ້ດຳເນີນກ່ອນທີ່ຈະຈັດກອງປະຊຸມສະມັດຊາໃຫຍ່ຊຸດທີ 42 UNESCO ແລະ ໄດ້ດຶງດູດເອກອັກຄະລັດຖະທູດ, ຜູ້ຕາງໜ້າບັນດາປະເທດສະມາຊິກ ແລະ ການນຳ UNESCO ເກືອບ 200 ທ່ານ ເຂົ້າຮ່ວມ.

ຂ່າວລະບຸວ່າ: ກ່າວຄຳເຫັນໃນພິທີ, ທ່ານ ຮ່າກິມງອກ ຮອງລັດຖະມົນຕີການຕ່າງປະເທດ ຫວຽດນາມ ເນັ້ນໜັກວ່າ: ເຫດການນີ້ແມ່ນໂອກາດເພື່ອໃຫ້ ຫວຽດນາມ ແລະ UNESCO ຊຸກຍູ້ບົດບາດບັນດານາມມະຍົດ, ມໍລະດົກ, ວັດທະນະທຳເພື່ອການພັດທະນາແບບຍືນຍົງ ແລະ ສ້າງຄວາມເຂັ້ມແຂງດ້ວຍຕົນເອງ; ຢັ້ງຢືນການຮ່ວມມືລະຫວ່າງ ຫວຽດນາມ ແລະ UNESCO ໄດ້ກາຍເປັນແບບຢ່າງເພື່ອສັນຕິພາບ, ການຮ່ວມມື ແລະ ພັດທະນາແບບຍືນຍົງ. ທ່ານກ່າວວ່າ: ນີ້ແມ່ນໜຶ່ງໃນບັນດາເຫດການສຳຄັນ ເພື່ອໃຫ້ພວກເຮົາ ຢັ້ງຢືນການຖືເປັນສຳຄັນກ່ຽວກັບການຮ່ວມມືຂອງ ຫວຽດນາມ ກັບອົງການ UNESCO. ພິເສດແມ່ນໄລຍະທີ່ ຫວຽດນາມ ກຳລັງອອກສະໝັກເລືອກຕັ້ງເຂົ້າຄະນະກຳມະການມໍລະດົກໂລກ. ນີ້ກໍເປັນໂອກາດເພື່ອໂຄສະນານະໂຍບາຍຂອງ ຫວຽດນາມ ໃນການປະກອບສ່ວນເຂົ້າໃນການອະນຸລັກຮັກສາບັນດາມໍລະດົກໂລກເວົ້າລວມ ແລະ ຜ່ານມານັ້ນໄດ້ສົ່ງສານທີ່ວ່າ: ຫວຽດນາມ ແມ່ນສະມາຊິກທີ່ຕັ້ງໜ້າ ແລະ ມີການປະກອບສ່ວນສຳຄັນ ເມື່ອອອກສະໝັກເລືອກຕັ້ງເຂົ້າຄະນະກຳມະການມໍລະດົກໂລກຢ່າງສຳເລັດຜົນ.