ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້ ທີ່ສຳນັກງານ ສປຊ ຢູ່ ນິວຢອກ ສະຫະລັດອາເມຣິກາ, ສະມັດຊາໃຫຍ່, ສປຊ ຊຸດທີ 78 ໄດ້ຈັດວາລະກອງປະຊຸມຄົບຄະນະປຶກສາຫາລືກ່ຽວກັບບົດລາຍງານການປະຕິບັດວຽກງານຂອງ ສານຍຸຕິທຳສາກົນ (ICJ). ທ່ານນາງ ເລທິມິງທວາ ເອກອັກຄະລັດຖະທູດ ຮອງຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ ກ່າວຄຳເຫັນໃນກອງປະຊຸມ ຢັ້ງຢືນກ່ຽວກັບຄວາມຫຼາກຫຼາຍຂອງບັນດາບັນຫາ ຊຶ່ງ ICJ ຖືວ່າ ເປັນຫຼັກຖານທີ່ຈະແຈ້ງສຳລັບລັກສະນະກວມລວມ ແລະ ສິດອຳນາດລວມຂອງສານ. ການປັບປຸງກົດໝາຍສາກົນ ແມ່ນພື້ນຖານສຳຄັນສຳລັບການຄົງຕົວໂດຍສັນຕິພາບລະຫວ່າງບັນດາປະເທດ. ເພື່ອບັນລຸໄດ້ເປົ້າໝາຍນີ້, ບັນດາປະເທດ ມີຄວາມຮັບຜິດຊອບປະຕິບັດບັນດາພັນທະຂອງຕົນຕາມກົດໝາຍສາກົນ ແລະ ປະຕິບັດຂໍ້ຕົກລົງ, ຄຳຕັດສິນຂອງບັນດາອົງການອຳນາດສານສາກົນ.

ຜູ້ຕາງໜ້າ ຫວຽດນາມ ກໍເນັ້ນໜັກເຖິງພາລະບົດບາດຂອງ ICJ ແມ່ນໃຫ້ຄຳປຶກສາຕາມຂໍ້ກຳນົດຂອງ ກົດບັດ ສປຊ ເພື່ອແນໃສ່ເຫັນແຈ້ງບັນດາແງ່ມູມດ້ານນິຕິກຳທີ່ກ່ຽວຂ້ອງເຖິງບັນດາບັນຫາໃຫຍ່ ຊຶ່ງປະຊາຄົມສາກົນມີຄວາມສົນໃຈ. ໃນນັ້ນ, ມີບັນຫາການປ່ຽນແປງຂອງດິນຟ້າອາກາດ. ຫວຽດນາມ ຖືວ່າ ບັນດາວິວັດທະນາການນີ້ ອາດຈະສົ່ງຜົນກະທົບຢ່າງເລິກເຊິ່ງຕໍ່ວິທີອະທິບາຍບັນດາພັນທະຕໍ່ສິ່ງແວດລ້ອມຕາມກົດໝາຍສາກົນ, ລວມທັງການຮັບຮອງເອົາການມອບໂອນເຕັກໂນໂລຊີສີຂຽວ ແລະ ປັບປຸງບັນດາພື້ນຖານລວມ ແນໃສ່ຮັບມືກັບການປ່ຽນແປງຂອງດິນຟ້າອາກາດ.