ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 5 ພະຈິກ ຜ່ານມາ, ໃນຂອບເຂດງານຕະຫຼາດນັດການນຳເຂົ້າສາກົນ ຈີນ (CIIE) ຄັ້ງທີ 6 ຢູ່ນະຄອນຊຽງໄຮ້ ປະເທດຈີນ, ທ່ານ ເຈິ່ນຮົ່ງຮ່າ ຮອງນາຍົກລັດຖະມົນຕີ ຫວຽດນາມ ໄດ້ເຂົ້າຮ່ວມ ແລະ ກ່າວຄຳເຫັນໃນເວທີປາໄສ “ພັດທະນາການລົງທຶນ ແລະ ການຄ້າສີຂຽວ - ພ້ອມກັນສ້າງຄວາມສີວິໄລຊີວະພາບທົ່ວໂລກ”.

ກ່າວຄຳເຫັນໃນເວທີປາໄສ, ທ່ານ ເຈິ່ນຮົ່ງຮ່າ ຢັ້ງຢືນວ່າ: ນີ້ແມ່ນຈຸດເວລາປະຫວັດສາດເພື່ອໃຫ້ໂລກມີການປ່ຽນແປງໃໝ່ຢ່າງວ່ອງໄວ, ຫັນປ່ຽນເສດຖະກິດແຕ່ສີເທົາເປັນສີຂຽວ. ໃນນັ້ນ, ວິສາຫະກິດເຕັກໂນໂລຊີແມ່ນ “ວັກຊິນ” ໃນວິວັດການຮັບມືກັບການປ່ຽນແປງຂອງດິນຟ້າອາກາດ ແລະ ການຫັນເປັນສີຂຽວ. ທ່ານຢັ້ງຢືນວ່າ: ຫວຽດນາມ ກຽມພ້ອມກັບບັນດາປະເທດສ້າງຂອບເຂດການຮ່ວມມືລະຫວ່າງບັນດາປະເທດພັດທະນາ ແລະ ພວມພັດທະນາໃຫ້ແກ່ການຫັນເປັນສີຂຽວ. ໂດຍແມ່ນໜຶ່ງໃນ 3 ປະເທດຜັນຂະຫຍາຍສັນຍາຄູ່ຮ່ວມມືຫັນປ່ຽນພະລັງງານຍຸຕິທຳ (JETP) ກັບບັນດາປະເທດອຸດສາຫະກຳພັດທະນາ (G7), ຫວຽດນາມ ໄດ້ຊຸກຍູ້ກົນໄກລະດົມການເງິນສີຂຽວ. ແຫຼ່ງທຶນຈາກລັດຖະບານໄດ້ມີບົດບາດນຳພາ, ກຳນົດທິດບັນດາແຫຼ່ງເງິນລົງທຶນເອກະຊົນເພື່ອຫັນບັນດາເປົ້າໝາຍຫຼຸດຜ່ອນອາຍພິດເຮືອນແກ້ວ, ຫັນເປັນສີຂຽວ ແລະ ພັດທະນາແບບຍືນຍົງໃຫ້ປະກົດຜົນເປັນຈິງ.