ໃນວັນທີ 9 ພະຈິກນີ້, ກະຊວງໂຍທາທິການ ແລະຂົນສົ່ງ ສປປ ລາວ ໄດ້ເປັນເຈົ້າພາບຈັດກອງປະຊຸມລັດຖະມົມຕີ ຂົນສົ່ງອາຊຽນຄັ້ງທີ 29 ແລະ ກອງປະຊຸມປິ່ນອ້ອມ ຂຶ້ນທີ່ ແຂວງຫຼວງພະບາງ, ໂດຍເປັນປະທານຂອງ ທ່ານ ງາມປະສົງ ເມືອງມະນີລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ສປປ ລາວ, ມີ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ, ພ້ອມດ້ວຍເລຂາທິການໃຫຍ່ອາຊຽນ, ມີບັນດາລັດຖະມົນຕີຂົນສົ່ງອາຊຽນ ແລະບັນດາຄະນະລັດຖະມົນຕີຈາກປະເທດຄູ່ຮ່ວມມືກັບອາຊຽນ ເຊັ່ນ: ສປ ຈີນ, ສເກົາຫຼີ ແລະຍີ່ປຸ່ນ ເຂົ້າຮ່ວມ.
ກອງປະຊຸມໃນຄັ້ງນີ້ ມີຄວາມສຳຄັນໃນການສ້າງຄວາມພ້ອມໃຫ້ ສປປ ລາວ ຊຶ່ງໄດ້ມີການປຶກສາຫາລືບັນຫາສຳຄັນ ເພື່ອສະໜັບສະໜູນການເປັນເຈົ້າພາບອາຊຽນ ໃນປີ 2024 ຂອງ ສປປ ລາວ ພາຍໃຕ້ຫົວຂໍ້ ເພີ່ມທະວີການເຊື່ອມຈອດ-ເຊື່ອມໂຍງ ແລະ ຄວາມທົນທານ ຊຶ່ງມີ 12 ບັນຫາທີ່ຈະໄດ້ພິຈາລະນາ ແລະຮັບຮອງ ປະກອບມີ: ບຸລິມະສິດ ແລະ ວຽກຈຸດສຸມປະຈໍາປີ 2024; ແຜນແມ່ບົດກ່ຽວກັບການຄຸ້ມຄອງການຈະລາຈອນທາງອາກາດອາຊຽນ (ສະບັບທີ3); ອະນຸສັນຍາທີ 3 ວ່າດ້ວຍຄວາມສາມາດໃນການກວດສອບຄວາມປອດໄພຂອງເຈົ້າໜ້າທີ່ການບິນແຫ່ງຊາດ - ສັນຍາຮັບຮູ້ຊຶ່ງກັນ ແລະກັນ ຂອງໃບອະນຸຍາດປະຕິບັດໜ້າທີ່ຂອງນັກບິນພາຍໃນອາຊຽນ; ແຜນຈັດຕັ້ງປະຕິບັດວຽກງານການບິນອາຊຽນແບບຍືນຍົງ ແລະ ແຜນງານປະຈຳ ປີ 2023 -2024; ເນື້ອໃນບົດບັນທຶກຄວາມເຂົ້າໃຈ ໃນການພັດທະນາຕາໜ່າງເສັ້ນທາງຫຼວງອາຊຽນ; ນະໂຍບາຍຂໍ້ແນະນຳ ກ່ຽວກັບການເພື່ອປັບປຸງ ພື້ນຖານໂຄງລ່າງລົດໄຟຟ້າ ແລະ ສະຖານນີສາກອາຊຽນ; ເອກະສານແນະນຳ ກ່ຽວກັບທ່າເຮືອທັນສະໄໝ; ຂໍ້ແນະນຳ ເພື່ອກະກຽມຄວາມພ້ອມ ເພື່ອຮັບມືກັບວິກິດການໃນອະນາຄົດຕໍ່ໜ້າ ເປັນຕົ້ນແມ່ນສືບຕໍ່ສົ່ງເສີມການບໍລິຫານທ່າເຮືອ ແລະການອໍານວຍຄວາມສະດວກໃນການປ່ຽນ ແລະການສົ່ງລູກເຮືອກັບຄືນ; ຖະແຫຼງການຮ່ວມ ກອງປະຊຸມຄັ້ງທີ 22 ລະຫວ່າງ ອາຊຽນ-ສປ ຈີນ; ແຜນງານຫຼວງພະບາງ ການຮ່ວມມືດ້ານຄົມມະນາຄົມຂົນສົ່ງ ອາຊຽນ-ຢີ່ປຸ່ນ 2024-2033 ເພື່ອສືບຕໍ່ແຜນງານປາກເຊ 2014-2023; ຖະແຫຼງການຮ່ວມ ກ່ຽວກັບການຮ່ວມມືຮອບດ້ານການຂົນສົ່ງແບບອັດສະລິຍະ ລະຫວ່າງ ອາຊຽນ  ສເກົາຫຼີ; ຖະແຫຼງການຮ່ວມກອງປະຊຸມຂັ້ນລັດຖະມົນຕີລະຫວ່າງຂະແໜງຄົມມະນາຄົມຂົນສົ່ງ ແລະ ຂະແໜງທ່ອງທ່ຽວ.
ຂ່າວ-ພາບ: ທະນູສີນ