ໃນວັນທີ 6 ພະຈິກ ຜ່ານມາ ອົງການກາແດງແຫ່ງຊາດລາວ ໄດ້ນຳເອົາເຕົາ ແລະ ເຄື່ອງກັ່ນຕອງນໍ້າໄປຊ່ວຍປະຊາຊົນສອງແຂວງເປົ້າໝາຍ, ເຄື່ອງຈຳນວນດັ່ງກ່າວໄດ້ຮັບການສະໜັບໜູນຈາກສະພາກາແດງຫວຽດນາມ  ຮ່ວມມືກັບ ບໍລິສັດ ຊິບໂກ (SIPCO) ສສ ຫຽວດນາມ ໄດ້ຈັດພິທີມອບເຕົາປະຢັດ ແລະ ເຄື່ອງກັ່ນຕອງນ້ຳໃຫ້ແກ່ປະຊາຊົນທີ່ນອນໃນເປົ້າໝາຍຂອງໂຄງການຢູ່ແຂວງບໍລິຄຳໄຊ ແລະ ແຂວງຄຳມ່ວນ ເປັນກຽດກ່າວມອບຂອງທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ຕາງໜ້າຮັບຂອງ ທ່ານ ບຸນຄຳ ໄຊເຢຍລໍວື້ ຄະນະປະຈຳພັກ ປະທານແນວລາວສ້າງຊາດ ແຂວງບໍລິຄຳໄຊ ແລະ ທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ໂດຍຊ້ອງໜ້າ ທ່ານ ຟາມຫງອກຍານ ຜູ້ຕາງໜ້າບໍລິສັດຊິບໂກ ສສ ຫວຽດນາມ, ຄະນະຮັບຜິດຊອບໂຄງການ ແລະ ພະນັກງານທີ່ກຽ່ວຂ້ອງເຂົ້າຮ່ວມເປັນສັກຂີພິຍານ ການມອບເຄື່ອງໃນຄັ້ງນີ້ແມ່ນແນໃສ່ ຄອບຄົວທີ່ທຸກຍາກຂາດເຂີນ, ຄອບຄົວທີ່ໃຊ້ເຕົາໄຟແບບດັ່ງເດີມຕົ້ມນ້ຳກິນ ແລະ ຕ້ອງເປັນຄອບຄົວທີ່ມີຄວາມຕ້ອງການໃຊ້ເຕົາໄຟປະຢັດພະລັງງານ, ພາຍໃຕ້ໂຄງການຊ່ວຍເຫຼືອເຕົາໄຟປະຢັດພະລັງງານຈຳນວນ 300.000 ໜ່ວຍ ແລະ ເຄື່ອງກັ່ນ ຕອງນໍ້າ 100.000 ເຄື່ອງ ໃຫ້ ສປປ ລາວ ໃນນັ້ນ ແຂວງບໍລິຄໍາໄຊໄດ້ຮັບເຕົາປະຢັດຈໍານວນ 29. 461ໜ່ວຍ, ເຄື່ອງກັ່ນຕອງນ້ຳສະອາດ ຈຳນວນ 25.088 ເຄື່ອງ ແລະ ແຂວງຄໍາມ່ວນ ໄດ້ຮັບເຕົາປະຢັດ ຈຳນວນ 33.987ໜ່ວຍ, ເຄື່ອງກັ່ນຕອງນ້ໍາສະອາດ ຈໍານວນ 24.471 ເຄື່ອງ. 
ຂ່າວ: ກາແດງ