ຂ່າວຕ່າງປະເທດລາຍງານ ໃນວັນທີ 8 ພະຈິກ ຜ່ານມາ, ສູນບໍລິການດ້ານການປ່ຽນແປງສະພາບພູມອາກາດຂອງສະຖາບັນໂຄເປີນິຄັສແຫ່ງສະຫະພາບເອີຣົບ ໄດ້ເປີດເຜີຍບົດລາຍງານໂດຍລະບຸວ່າ: ໃນເດືອນຕຸລາຜ່ານມາ ເປັນເດືອນທີ່ໂລກມີອຸນຫະພູມສະເລ່ຍສູງທີ່ສຸດ ເມື່ອທຽບກັບຍຸກກ່ອນການປະຕິວັດອຸດສາຫະກຳ.

ບົດລາຍງານລະບຸວ່າ: ໃນເດືອນຕຸລາຜ່ານມາ, ອຸນຫະພູມສະເລ່ຍສູງປະມານ 1,7 ອົງສາ ເມື່ອທຽບກັບຄ່າສະເລ່ຍອຸນຫະພູມໃນເດືອນຕຸລາໃນໄລຍະຍຸກກ່ອນການປະຕິວັດອຸດສາຫະກຳ. ອຸດຫະພູມສະເລ່ຍຂອງໂລກຕັ້ງແຕ່ເດືອນມັງກອນ 2023 ສູງກວ່າຍຸກກ່ອນປະຕິວັດອຸດສາຫະກຳໃນລະຫວ່າງປີ 1850-1900 ປະມານ 1,43 ອົງສາ ແລະ ເປັນສະຖິຕິສູງທີ່ສຸດນັບຕັ້ງແຕ່ປີ 1940 ແລະ ຍິ່ງເພີ່ມຄວາມເປັນໄປໄດ້ວ່າ ປີ 2023 ຈະເປັນປີທີ່ໂລກມີອຸນຫະພູມສະເລ່ຍສູງທີ່ສຸດເປັນປະຫວັດສາດ.

ນອກຈາກນີ້, ອຸນຫະພູມສະເລ່ຍຂອງນໍ້າທະເລເທິງໂລກໃນເດືອນຕຸລາຜ່ານມາ ໂດຍບໍ່ລວມອຸນຫະພູມໃນພາກພື້ນຂົ້ວໂລກຢູ່ທີ່ 20,79 ອົງສາ ເປັນສະຖິຕິສູງທີ່ສຸດເຊັ່ນກັນ ບົດລາຍງານຂອງສະຖາບັນໂຄເປີນິຄັສລະບຸຕື່ມວ່າ 90% ຂອງຄວາມຮ້ອນສ່ວນເກີນທີ່ມະຫາສະໝຸດກຳລັງດູດຊັບເປັນຜົນມາຈາກກິດຈະກຳ ຊຶ່ງເກີດຂຶ້ນໂດຍມະນຸດ.