ສຳນັກຂ່າວສານຫວຽດນາມ ປະຈໍາ ອິນເດຍ ລາຍງານວ່າ: ເປັນຄັ້ງທຳອິດທີ່ ລັດຖະບານ ອິນເດຍ ວາງແຜນທີ່ຈະສ້າງຝົນທຽມ ເພື່ອພະຍາຍາມປັບປຸງຄຸນນະພາບອາກາດ ໃນນະຄອນຫຼວງນີວເດລີ ທີ່ເປັນມົນລະພິດຫຼາຍທີ່ສຸດໃນໂລກ ຊຶ່ງຖືກປົກຄຸ້ມດ້ວຍໝອກຝຸ່ນຄວັນ ໃນອາທິດຜ່ານມາ.

ຂ່າວລະບຸວ່າ: ໃນສະພາບການທີ່ປະເຊີນກັບມົນລະພິດທາງອາກາດທີ່ຮ້າຍແຮງໃນປັດຈຸບັນ, ນະຄອນຫຼວງ ນີວເດລີ ໄດ້ສັ່ງໃຫ້ໂຮງຮຽນທຸກແຫ່ງປິດ, ຢຸດກິດຈະການກໍ່ສ້າງ ແລະ ປະກາດຈະກຳນົດການຈຳກັດພາຫະນະ. ທ່ານ Gopal Rai ຫົວໜ້າອົງການສິ່ງແວດລ້ອມ ນະຄອນຫຼວງນິວເດລີ ກ່າວໃນວັນທີ 8 ພະຈິກ ຜ່ານມາວ່າ: ອຳນາດການປົກຄອງທ້ອງຖິ່ນຈະພະຍາຍາມເຮັດໃຫ້ເກີດຝົນທຽມໃນເດືອນພະຈິກນີ້ ເພື່ອພະຍາຍາມຕ້ານມົນລະພິດທາງອາກາດໃນເມືອງນີ້.

ດັດຊະນີຄຸນນະພາບອາກາດຂອງ ນິວເດລີ ຖືກບັນທຶກຢູ່ທີ່ 320 ໃນຕອນເຊົ້າຂອງວັນທີ 8 ພະຈິກ ຜ່ານມາ, ເປັນລະດັບທີ່ກຸ່ມບໍລິສັດ IQAir (ບໍລິສັດທີ່ຊຽວຊານໃນດ້ານເຕັກໂນໂລຊີຂອງຄຸນນະພາບອາກາດ) ປະເທດສະວິດ ຈັດຢູ່ໃນລະດັບອັນຕະລາຍ, ກ່ອນຈະຫຼຸດລົງເປັນ 294 ໃນພາຍຫຼັງ.

ໂດຍທົ່ວໄປແລ້ວຄຸນນະພາບຂອງອາກາດໃນນະຄອນນິວເດລີ ຈະຊຸດໂຊມລົງທຸກປີກ່ອນລະດູໜາວ, ເມື່ອອາກາດເຢັນຈະເກັບເອົາມົນລະພິດຈາກແຫຼ່ງຕ່າງໆ ເຊັ່ນ: ພາຫະນະ, ອຸດສາຫະກຳ, ຂີ້ຝຸ່ນໃນການກໍ່ສ້າງ ແລະ ການເຜົາ ໄໝ້ສິ່ງເສດເຫຼືອກະສິກຳ.