ໃນວັນທີ 7 ພະຈິກ ຜ່ານມາ ທີ່ພະຣາຊະວັງ the Château de Laeken ບຣຸກແຊນ, ທ່ານ ກິ່ງໂພແກ້ວ ພົມມະຫາໄຊ ໄດ້ເຂົ້າຍື່ນສານຕາຕັ້ງຕໍ່ສົມເດັດ ພະຣາຊາ ຟີລິບ ແຫ່ງ ຣາຊະອານາຈັກ ແບນຊິກ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳຣາຊະອານາຈັກ ແບນຊິກ.
ໃນໂອກາດດັ່ງກ່າວ, ທ່ານທູດລາວ ໄດ້ໂອ້ລົມກັບ ສົມເດັດ ພະຣາຊາ ຟີລິບ ດ້ວຍບັນຍາກາດອັດທະຍາໄສໄມຕີຈິດອັນດີ ຊຶ່ງທ່ານທູດໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ທອງລຸນ ສີສຸລິດປະທານປະເທດ ແຫ່ງ ສປປ ລາວ ເຖິງ ສົມເດັດ ພຣະຣາຊາ ຟີລິບ ແລະ ປະຊາຊົນແບນຊິກ ທຸກຖ້ວນໜ້າ.  
ໃນໂອກາດດຽວກັນນີ້,ສົມເດັດ ພະຣາຊາ ຟີລິບ ກໍໄດ້ສະແດງຄວາມຂອບໃຈ ແລະ ສົ່ງຄຳອວຍພອນຢື້ຢາມ ຖາມຂ່າວຄືນເຖິງ ພະນະທ່ານປະທານປະເທດ ແຫ່ງ ສປປ ລາວ ເຊັ່ນດຽວກັນ, ທັງໄດ້ສະແດງຄວາມຍິນດີຕ້ອນຮັບ ທ່ານທູດລາວຄົນໃໝ່ ແລະ ອວຍພອນໃຫ້ທ່ານທູດ ຈົ່ງປະສົບຜົນສຳເລັດໃນການປະຕິບັດໜ້າທີ່ການທູດທຸກປະການ. 
ພ້ອມດຽວກັນນີ້, ທ່ານທູດລາວ ກໍໄດ້ສະແດງຄວາມຂອບໃຈ ຕໍ່ຄຳເວົ້າອັນຈົບງາມ ແລະ ຄຳອວຍພອນດັ່ງກ່າວ ແລະ ຢືນຢັນວ່າ ຈະປະຕິບັດໜ້າທີ່ຂອງຕົນໃຫ້ດີ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ແບນຊິກ ໃຫ້ນັບມື້ນັບດີຂຶ້ນ.
(ຂ່າວ-ພາບ: ກຕທ)