ພະນະທ່ານສອນໄຊ ສີພັນດອນນາຍົກລັດຖະມົນຕີແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມເຫັນໃຈເຖິງ ພະນະທ່ານ ນາງ ແພທອງທານ ຊິນນະວັດນາຍົກລັດຖະມົນຕີ ແຫ່ງ ຣາຊະອານາຈັກໄທທີ່ ບາງກອກ ຊຶ່ງມີເນື້ອໃນວ່າ: ຂ້າພະເຈົ້າ ໄດ້ຮັບຂ່າວສະພາບການນໍ້າຖ້ວມ ຢູ່ ຣາຊະອານາຈັກໄທ ເຫດເນື່ອງມາຈາກປະກົດການ ລານີນາ (La Nina) ສົ່ງຜົນໃຫ້ມີຝົນຕົກໜັກເປັນບໍລິເວນກວ້າງເຮັດໃຫ້ມີດິນເຊາະເຈື່ອນເກີດໄພນໍ້າຖ້ວມກະທັນຫັນໃນຫຼາຍຈັງຫວັດທາງພາກເໜືອ ແລະ ພາກໃຕ້ ອັນໄດ້ເຮັດໃຫ້ມີຜູ້ເສຍຊີວິດ ແລະ ຊັບສິນ ຂອງປະຊາຊົນ ເສຍຫາຍເປັນຈໍານວນຫຼວງຫຼາຍ. 
    ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເປັນຫ່ວງ, ເຫັນອົກເຫັນໃຈເປັນທີ່ສຸດ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງລັດຖະບານ ແລະ ປະຊາຊົນໄທ ໂດຍສະເພາະຕໍ່ຄອບຄົວຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນຄັ້ງນີ້. ສ່ວນ ສປປ ລາວ ກໍໄດ້ຮັບຜົນກະທົບຢ່າງໜັກໜ່ວງຈາກປະກົດການດັ່ງກ່າວ ເປັນຕົ້ນແມ່ນຢູ່ທາງພາກເໜືອ ແລະ ບັນດາແຂວງລຽບຕາມແມ່ນໍ້າຂອງ. ສະນັ້ນ, ຂ້າພະເຈົ້າ ພ້ອມແລ້ວທີ່ຈະໃຫ້ການຮ່ວມມືຢ່າງໃກ້ຊິດ ກັບ ພະນະທ່ານ ເພື່ອແກ້ໄຂບັນຫາດັ່ງກ່າວ.
    ຂ້າພະເຈົ້າ ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາ ຢ່າງໃກ້ຊິດ ຂອງ ພະນະທ່ານ ກໍຄື ລັດຖະບານ ແລະ ການສະໜັບສະໜູນໃນການຮ່ວມມື ຂອງ ປະຊາຊົນໄທ ຈະສາມາດຜ່ານຜ່າຄວາມຫຍຸ້ງຍາກນີ້ ແລະ ເຮັດໃຫ້ສະພາບການກັບຄືນສູ່ປົກກະຕິໂດຍໄວ; ດ້ວຍຄວາມນັບຖືຢ່າງສູງ.