ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ຫຼີ ສຽງ ນາຍົກລັດຖະມົນຕີ ແຫ່ງ ສປ ຈີນ,​ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ຈະເດີນທາງເຂົ້າຮ່ວມກອງປະຊຸມສຸດຍອດອະນຸພາກພື້ນແມ່ນ້ຳຂອງ (GMS) ຄັ້ງທີ 8 ແລະ ກອງປະຊຸມສຸດຍອດ ກໍາປູເຈຍ-ລາວ-ມຽນມາ-ຫວຽດນາມ (CLMV) ຄັ້ງທີ 11. ພ້ອມທັງ ເປັນປະທານກອງປະຊຸມສຸດຍອດຂອບຍຸດທະສາດການຮ່ວມມືດ້ານເສດຖະກິດ ແມ່ນໍ້າອິຣະວະດີ-ແມ່ນ້ຳເຈົ້າພະຍາ-ແມ່ນ້ຳຂອງ (ACMECS) ຄັ້ງທີ 10 ໃນລະຫວ່າງວັນທີ 6-7 ພະຈິກ 2024 ທີ່ ນະຄອນຄຸນມິງ ສປ ຈີນ.

ຂອບການຮ່ວມມື GMS ໄດ້ສ້າງຕັ້ງຂຶ້ນໃນປີ 1992 ຊຶ່ງປະກອບມີ 6 ປະເທດສະມາຊິກ ຄື: ສປ ຈີນ (ແຂວງຢຸນນານ ແລະ ແຂວງກວາງຊີ),​ ຣາຊະອານາຈັກ ກໍາປູເຈຍ,​ ສປປ ລາວ, ສສ ມຽນມາ, ຣາຊະອານາຈັກໄທ ແລະ ສສ ຫວຽດນາມ. ກອງປະຊຸມສຸດຍອດ GMS ຄັ້ງທີ 8 ຈະຈັດຂຶ້ນພາຍໃຕ້ການເປັນປະທານຂອງ ສປ ຈີນ ເພື່ອປຶກສາຫາລື ແລະ ວາງທິດທາງກົນໄກການຮ່ວມມື GMS ໃນຕໍ່ໜ້າໃຫ້ສອດຄ່ອງກັບການພັດທະນາດ້ວຍນະວັດຕະກຳໃນຍຸກໃໝ່.

ຂອບການຮ່ວມມື CLMV ໄດ້ສ້າງຕັ້ງຂຶ້ນໃນປີ 2004 ໃນໂອກາດກອງປະຊຸມສຸດຍອດອາຊຽນ ທີ່ ນະຄອນຫຼວງວຽງຈັນ.​ ກອງປະຊຸມສຸດຍອດ CLMV ຄັ້ງທີ 11 ຈະຈັດຂຶ້ນພາຍໃຕ້ການເປັນປະທານຂອງ ສສ ມຽນມາ ເພື່ອທົບທວນຄວາມຄືບໜ້າ ແລະ ກໍານົດທິດທາງໃນຕໍ່ໜ້າເສີມສ້າງອະນຸພາກພື້ນແມ່ນໍ້າຂອງໃຫ້ມີຄວາມເຂັ້ມແຂງ ແລະ ສົມບູນພູນສຸກຍິ່ງຂຶ້ນ ໃນຕໍ່ໜ້າ.

ຂອບຍຸດທະສາດການຮ່ວມມື ACMECS ໄດ້ສ້າງຕັ້ງຂຶ້ນໃນປີ 2003. ກອງປະຊຸມສຸດຍອດ ACMECS ຄັ້ງທີ 10 ດັ່ງກ່າວ ຈະຈັດຂຶ້ນພາຍໃຕ້ການເປັນປະທານຂອງ ສປປ ລາວ ໂດຍມີເປົ້າໝາຍເພື່ອປຶກສາຫາລື ແລະ ຜັນຂະຫຍາຍວິໄສທັດຂອງບັນດາປະເທດສະມາຊິກ ກໍຄື ການເສີມສ້າງຂອບການຮ່ວມມືດັ່ງກ່າວໃຫ້ກາຍເປັນປະຊາຄົມທີ່ມີການເຊື່ອມໂຍງ ແລະ ເຊື່ອມຈອດທາງດ້ານເສດຖະກິດທີ່ໂລ່ງລ່ຽນ. ພ້ອມນີ້, ບັນດາຜູ້ນໍາປະເທດສະມາຊິກ ACMECS ຍັງຈະໄດ້ພິຈາລະນາຮັບຮອງເອົາເອກະສານສໍາຄັນຈໍານວນໜຶ່ງເພື່ອເປັນບ່ອນອີງໃຫ້ແກ່ການຮ່ວມມືດັ່ງກ່າວໃນຕໍ່ໜ້າ.

ໃນໂອກາດເດີນທາງເຂົ້າຮ່ວມກອງປະຊຸມສຸດຍອດຄັ້ງນີ້, ພະນະທ່ານ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະຈະໄດ້ໄປຢ້ຽມຢາມຫົວໜ່ວຍທຸລະກິດຈຳນວນໜຶ່ງທີ່ມາລົງທຶນຢູ່ ສປປ ລາວ ແລະ ກໍເປັນບໍລິສັດຫຼັກແຫຼ່ງ ແລະ ມີທ່າແຮງຂັບເຄື່ອນທາງດ້ານເສດຖະກິດຂອງ ສປ ຈີນ.