ກະຊວງພະລັງງານແລະບໍ່ແຮ່ໄດ້ຖະແຫຼງຂ່າວກ່ຽວກັບສະພາບນໍ້າລົ້ນສັນເຂື່ອນໂຄງການເຂື່ອນໄຟຟ້ານໍ້າທາ 3ເມືອງຫຼວງນໍ້າທາແຂວງຫຼວງນໍ້າທາຄັ້ງວັນທີ9 ກັນຍາ 2024 ມີບັນດາຫົວໜ້າກົມ-ຮອງຫົວໜ້າກົມ, ຫົວໜ້າພະແນກ-ຮອງຫົວໜ້າພະແນກ ແລະ ວິຊາການຈາກກົມກ່ຽວຂ້ອງເຂົ້າຮ່ວມ.
ທ່ານ ບົວເທບ ມະໄລຄຳ ກ່າວວ່າ: ເຂື່ອນໄຟຟ້ານໍ້າຕົກນໍ້າທາ 3 ເປັນເຂື່ອນໄຟຟ້ານໍ້າຕົກຂະໜາດນ້ອຍ,ໄດ້ເລີ່ມກໍ່ສ້າງໃນເດືອນທັນວາ 1999 ແລະ ສຳເລັດເດືອນມິຖຸນາ 2005 ທີ່ມີຈຸດປະສົງໃນການສະໜອງນໍ້າໃຫ້ຊົນລະປະທານ ແລະ ຜະລິດພະລັງງານໄຟຟ້າ, ມີກໍາລັງການຕິດຕັ້ງໄຟຟ້າ1,25 ເມກາວັດ ແລະ ມີບໍລິມາດກັກເກັບນໍ້າໃນອ່າງຂະໜາດນ້ອຍ. ພາຍຫຼັງສຳເລັດການກໍ່ສ້າງໂຄງການກໍໄດ້ດຳເນີນການຜະລິດພະລັງງານໄຟຟ້າ ແລະ ສະໜອງນໍ້າໃຫ້ຊົນລະປະທານຮັບໃຊ້ພື້ນທີ່ກະສິກຳໃນຂອບເຂດເມືອງຫຼວງນ້ຳທາ ແລະ ບໍລິເວນໃກ້ຄຽງເປັນປົກກະຕິໃນເດືອນເມສາ 2020, ກະຊວງພະລັງງານ ແລະບໍ່ແຮ່ສົມທົບກັບຊ່ຽວຊານສາກົນໄດ້ລົງໄປຕິດຕາມ, ກວດກາທາງດ້ານເຕັກນິກ ແລະ ຜົນຂອງການກວດກາເຫັນວ່າ ໂຄງສ້າງຕົວເຂື່ອນຍັງມີຄວາມແຂງແຮງ, ໝັ້ນຄົງ ແລະ ສາມາດນຳໃຊ້ໄດ້ເປັນປົກກະຕິ ກ່ອນເຂົ້າລະດູຝົນປີ 2024 ກປພ ໄດ້ອອກໜັງສືສະບັບລົງວັນທີ 7 ມິຖຸນາ 2024 ເພື່ອໃຫ້ບັນດາພະແນກພະລັງງານ ແລະ ບໍ່ແຮ່ແຂວງ ແລະ ບັນດາໂຄງການເຂື່ອນໄຟຟ້າໃນທົ່ວປະເທດ, ໃຫ້ເອົາໃຈໃສ່ຕິດຕາມກວດກາເຝົ້າລະວັງເຫດການນໍ້ານອງ ແລະ ສະພາບຂອງເຂື່ອນໃນໄລຍະລະດູຝົນ, ໃຫ້ຮັບປະກັນຄວາມປອດໄພຂອງເຂື່ອນໃຫ້ມີການກະກຽມຄວາມພ້ອມຮັບມື ແລະ ຮັບປະກັນການຕອບໂຕ້ເຫດສຸກເສີນທີ່ອາດຈະເກີດຂຶ້ນໄດ້ຢ່າງທັນການ, ກປພໄດ້ລົງຊຸກຍູ້ຕິດຕາມການຈັດຕັ້ງປະຕິບັດແຜນຮັບມືສຸກເສີນຂອງໂຄງການເຂື່ອນໄຟຟ້ານໍ້າທາ 3 ໃນວັນທີ 30 ພຶດສະພາ 2024 ຮ່ວມກັບພະແນກພະລັງງານ ແລະ ບໍ່ແຮ່ແຂວງຫຼວງນ້ຳທາຢູ່ພາກສະໜາມເຂື່ອນໄຟຟ້ານໍ້າທາ 3ໃນຄັ້ງວັນທີ 26 ກໍລະກົດ 2024 ກປພ ໄດ້ອອກຖະແຫຼງຂ່າວກ່ຽວກັບການກະກຽມຄວາມພ້ອມຮັບມືສຸກເສີນຂອງເຂື່ອນໃນຂອບເຂດທົ່ວປະເທດໃນລະດູຝົນປີ 2024ກ່ອນພາຍຸໃຕ້ຝຸ່ນຢາກິຈະເຂົ້າມາລາວ, ໂດຍອີງຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີສະບັບລົງວັນທີ 7 ກັນຍາ 2024, ກປຟ ໄດ້ໄດ້ອອກໜັງສືສະບັບລົງວັນທີ 7 ກັນຍາ 2024 ເພື່ອໃຫ້ບັນດາໂຄງການເຂື່ອນໄຟຟ້າໃນຂອບເຂດທົ່ວປະເທດ ເຝົ້າລະວັງ ແລະ ກະກຽມຄວາມພ້ອມຮອງຮັບເຫດການສຸກເສີນ ແລະ ຄວາມປອດໄພຮອບດ້ານ.
ຍ້ອນອິດທິພົນຂອງພາຍຸຢາກິເຮັດໃຫ້ມີຝົນຕົກໜັກ ໂດຍສະເພາະຢູ່ເຂດພາກເໜືອຂອງລາວ, ເຮັດໃຫ້ມີປະລິມານນ້ຳຫຼາຍໄຫຼທະລຸລົງສູ່ສາຍນ້ຳຕ່າງໆຢູ່ແມ່ນໍ້າຂອງ ແລະ ສາຍນໍ້າສາຂາເພີ່ມຂຶ້ນຢ່າງຫຼວງຫຼາຍ ແລະ ວ່ອງໄວ, ໃນໄລຍະທີ່ນໍ້າຈະມາແຮງນັ້ນໂຄງການເຂື່ອນໄຟຟ້ານ້ຳທາ3 ໄດ້ປະຕິບັດແຜນຮັບມືສຸກເສີນມີການປະສານຫາການນໍາຂັ້ນທ້ອງຖິ່ນ ແລະ ບ້ານທີ່ຢູ່ທ້າຍເຂື່ອນ (ຜ່ານຊ່ອງທາງໂທລະສັບ WhatsAp ທີ່ມີ ແລະ ບ້ານທີ່ຢູ່ລຸ່ມເຂື່ອນໄດ້ມີການແຈ້ງເຕືອນຜ່ານໂທລະໂຄ່ງວິທະຍຸຊຸມຊົນ ເພື່ອຮັບຊາບ ແລະ ປະຕິບັດການຮັບມື ແລະ ໂຄງການໄດ້ປະຕິບັດຂັ້ນຕອນການບໍລິຫານຈັດການນ້ຳເພື່ອຄວາມປອດໄພຂອງເຂື່ອນ ໂດຍໄດ້ເປີດປະຕູລະບາຍນ້ຳ,ແຕ່ມາເຖິງຕອນເຊົ້າຂອງວັນທີ 9 ກັນຍາ 2024 ໄດ້ເກີດມີນໍ້ານອງ ພ້ອມທັງມີເສດໄມ້ຈຳນວນຫຼວງຫຼາຍໄຫຼມາເຮັດໃຫ້ປະຕູລະບາຍນໍ້າບໍ່ສາມາດລະບາຍນ້ຳ ແລະ ເສດໄມ້ອອກໄດ້ຖ່ວງທັນຈຶ່ງເຮັດໃຫ້ນໍ້າລົ້ນສັນເຂື່ອນ.
ລວມຄວາມວ່າ: ຍ້ອນອິດທິພົນຂອງພາຍຸຢາກິ ເຮັດໃຫ້ບັນດາປະເທດພາກພື້ນໃນອາຊີຕາເວັນອອກສ່ຽງໃຕ້ ໄດ້ແກ່: ລາວ, ຫວຽດນາມ, ມຽນມາ ແລະ ໄທ ລວມທັງຈີນ ໄດ້ຮັບຜົນກະທົບຈາກພາຍຸດັ່ງກ່າວຢ່າງຮ້າຍແຮງ ສຳລັບລາວແມ່ນຫຼາຍແຂວງທາງພາກເໜືອໄດ້ຮັບຜົນກະທົບເຮັດໃຫ້ລະດັບນໍ້າ ແລະ ມວນນໍ້າຢູ່ແມ່ນ້ຳຂອງ ແລະ ສາຂາມີມວນນ້ຳເພີ່ມຂຶ້ນຢ່າງວ່ອງໄວເປັນຕົ້ນ ແມ່ນໍ້າຂອງ, ນໍ້າອູ, ນໍ້າທາ, ນໍ້າຄານ, ນໍ້າແບ່ງ ແລະ ສາຍນ້ຳອື່ນໆ. ສະນັ້ນ ເຫດການທີ່ນໍ້າຖ້ວມຢູ່ແຂວງຫຼວງນໍ້າທາຈຶ່ງບໍ່ແມ່ນເກີດມາຈາກໂຄງການເຂື່ອນໄຟຟ້ານໍ້າທາ3 ແຕ່ແມ່ນເກີດມາຈາກອິດທິພົນຂອງພະຍຸຢາກິ.
(ຂ່າວ: ແສງຈັນ ຮຽບຮຽງ; ແຫຼ່ງຂໍ້ມູນ: ກະຊວງພະລັງງານ)
ຄໍາເຫັນ