ໜັງສືພິມ ປະຊາຊົນ ອວຍພອນ ໜັງສືພິມ ເຍິນເຢິນ ໂອກາດປີໃໝ່ຫວຽດນາມ

ເນື່ອງໃນໂອກາດ ບຸນປີໃໝ່ປະຈໍາຊາດຂອງຫວຽດນາມ (ບຸນເຕັດ) ໃນວັນທີ 2 ກຸມພາ ນີ້ ທີ່ນະຄອນຫຼວງວຽງຈັນ,  ຄະນະບັນນາທິການ ແລະ ພະນັກງານຂອງ ໜັງສືພິມປະຊາຊົນ ສຽງຂອງສູນກາງພັກປະຊາຊົນປະຕິວັດລາວ ນໍາໂດຍ ທ່ານ ສີວັນ ຫອມໄຊຍະເດດ ຮອງຫົວໜ້າບັນນາທິການໃຫຍ່ ໜັງສືພິມປະຊາຊົນ ໄດ້ນໍາເອົາກະຕ່າຂະໜົມ ແລະ ນໍ້າໝາກໄມ້ ມາອວຍພອນ ໜັງສືພິມ ເຍິນເຢິນ ປະຈໍາລາວ.  ຮັບການອວຍພອນຄັ້ງນີ້, ໂດຍ ທ່ານ ຈິງ ກວັກ ຢຸງ ຫົວໜ້າ ສຳນັກງານ ໜັງສືພິມ ເຍິນເຢິນ ສຽງຂອງສູນກາງພັກ, ລັດ ແລະ ປະຊາຊົນຫວຽດນາມ ປະຈໍາ ລາວ.
ທ່ານ ສີວັນ ຫອມໄຊຍະເດດ ກໍໄດ້ນໍາເອົາຄໍາເວົ້າອັນຈົບງາມ ມາອວຍພອນໄຊໃຫ້ແກ່ໜັງສືພິມ ເຍິນເຢິນ ຊຶ່ງໄດ້ຝາກຄໍາອວຍພອນເຖິງຄະນະພັກ, ຄະນະນໍາ ກໍຄື ຄະນະບັນນາທິການ ແລະ ພະນັກງານທົ່ວໜັງສືພິມ ເຍິນເຢິນ ທັງຢູ່ຫວຽດນາມ ແລະ ປະຈໍາຢູ່ ຕ່າງປະເທດ ຂໍໃຫ້ທຸກໆທ່ານ, ທຸກສະຫາຍອ້າຍນ້ອງຫວຽດນາມ ມີສຸຂະພາບແຂງແຮງ ມີຜົນສຳເລັດໃນວຽກງານ ນັບມື້ນັບມີຜົນສຳເລັດອັນໃໝ່ ແລະ ໃຫຍ່ຫຼວງກວ່າເກົ່າ. ພ້ອມກັນນີ້, ກໍໄດ້ກ່າວສະແດງຄວາມຂອບໃຈ ຕໍ່ໜັງສືພິມເຍິນເຢິນ ກໍຄື ສຳນັກງານທີ່ປະຈໍາຢູ່ ສປປ ລາວ ທີ່ໄດ້ປະສານງານ ໃຫ້ການຊ່ວຍເຫຼືອ ຊຶ່ງກັນ ແລະ ກັນ ຕະຫຼອດໄລຍະຜ່ານມາ ແລະ ຫວັງວ່າການຮ່ວມມືຂອງສອງໜັງສືພິມພວກເຮົາ ຈະສືບຕໍ່ເສີມຂະຫຍາຍ ນັບມື້ນັບຮັດແໜ້ນ ແລະ ແຕກດອກອອກຜົນ ຍິ່ງໆຂຶ້ນ.
ໂອກາດດຽວກັນ, ທ່ານ ຈິງ ກວັກ ຢຸງ ກໍໄດ້ຕາງໜ້າຄະນະພັກ, ຄະນະນໍາ ກໍຄື ຄະນະບັນນາທິການ ແລະ ພະນັກງານຂອງໜັງສືພິມເຍິນເຢິນ ກ່າວຂອບໃຈຕໍ່ຄໍາອວຍພອນອັນຈົບງາມ ແລະ ຕີລາຄາສູງຕໍ່ການຮ່ວມມືຂອງສອງໜັງສືພິມພວກເຮົາ ໃນຕະຫຼອດໄລຍະຜ່ານມາ. ພວກເຮົາ, ຍັງຈະສືບຕໍ່ເຮັດໃຫ້ສາຍພົວພັນການຮ່ວມມືກັນ ໄດ້ຂະຫຍາຍຕົວຢ່າງບໍ່ຢຸດຢັ້ງ ແລະ ຈະສ້າງເງື່ອນໄຂໃນການສືບຕໍ່ຊ່ວຍເຫຼືອໜັງສືພິມປະຊາຊົນໃນດ້ານຕ່າງໆ ໂດຍສະເພາະໂຄງການພັດທະນາເວບໄຊ ແລະ ໄອຊີທີຂອງໜັງສືພິມປະຂາຊົນ ທີ່ກຳລັງດຳເນີນຢູ່ໃນປັດຈຸບັນ. (ຂ່າວ-ພາບ: ສຸກສະຫວັນ)