ນີ້ແມ່ນການເຄື່ອນໄຫວຢ້ຽມຢາມທ້ອງຖິ່ນຄັ້ງທຳອິດຂອງທ່ານ ສີຈິ້ນຜິງ ພາຍຫຼັງສຳເລັດກອງປະຊຸມສອງສະພາປະຈຳປີ 2025 ແລະ ເປັນຄັ້ງທີ 3 ທີ່ທ່ານ ສີຈິ້ນຜິງ ຢ້ຽມຢາມແຂວງກຸ້ຍໂຈ່ວຫຼັງຈາກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນທີ່ຈັດຂຶ້ນເມື່ອປີ 2012.
ກຸ້ຍໂຈ່ວເປັນແຂວງທີ່ມີຫຼາຍຊົນເຜົ່າອາໄສຢູ່ຮ່ວມກັນ, ລວມມີ 56 ຊົນເຜົ່າດຳລົງຊີວິດຢູ່ແຂວງນີ້. ພາລະກິດສຳຄັນອັນໜຶ່ງຂອງທ່ານ ສີຈິ້ນຜິງ ໃນການເຄື່ອນໄຫວຢ້ຽມຢາມແຂວງກຸ້ຍໂຈ່ວເທື່ອນີ້ກໍຄືຊອກຮູ້ສະພາບຊີວິດການເປັນຢູ່ຂອງປະຊາຊົນທ້ອງຖິ່ນວ່າເປັນແນວໃດ.
ໃນຫຼາຍປີມານີ້, ບ້ານເຜົ່າຕົ້ງຈ້າວຊິງ ໄດ້ອອກແຮງພັດທະນາຂະແໜງການທ່ອງທ່ຽວ, ໄດ້ພັດທະນາໂຮງແຮມ, ເຮືອນພັກ, ຮ້ານກິນດື່ມຫຼາຍກວ່າ 400 ແຫ່ງ, ສ້າງວິສາຫະກິດຜະລິດເຄື່ອງຫັດຖະກຳທີ່ເປັນມູນເຊື້ອຫຼາຍກວ່າ 60 ແຫ່ງ, ສ້າງວຽກເຮັດງານທຳໃຫ້ປະຊາຊົນຫຼາຍກວ່າ 2.000 ຄົນ. ປີກາຍນີ້, ບ້ານດັ່ງກ່າວໄດ້ຕ້ອນຮັບນັກທ່ອງທ່ຽວ 1,027,000 ເທື່ອຄົນ, ໄດ້ເພີ່ມຂຶ້ນ 63.4% ເມື່ອທຽບໃສ່ໄລຍະດຽວກັນຂອງປີ 2023; ລາຍຮັບສັງລວມດ້ານການທ່ອງທ່ຽວບັນລຸເຖິງ 1 ຕື້ 20 ລ້ານຢວນ, ເພີ່ມຂຶ້ນ 63.8%; ລາຍຮັບດ້ານເສດຖະກິດລວມໝູ່ຂອງບ້ານບັນລຸເຖິງ 2,450,000 ຢວນ, ລາຍຮັບທີ່ສາມາດຈັບຈ່າຍໄດ້ສະເລ່ຍຕາມຫົວຄົນມີປະມານ 41,600 ຢວນ, ໄດ້ເພີ່ມຂຶ້ນ 12.3% ເມື່ອທຽບໃສ່ໄລຍະດຽວກັນຂອງປີ 2023.
ກ່ອນນີ້ 10 ປີເມື່ອຕອນເຄື່ອນໄຫວຢ້ຽມຢາມບ້ານຮວ່າມ້າວ ແຂວງກຸ້ຍໂຈ່ວ, ທ່ານ ສີຈິ້ນຜິງ ເຄີຍເວົ້າວ່າ: “ນະໂຍບາຍຂອງສູນກາງພັກຈະດີ ຫຼື ບໍ່ດີ, ແມ່ນຕ້ອງເບິ່ງວ່າປະຊາຊົນຈະຍິ້ມ ຫຼື ເສົ້າ. ຖ້າວ່າປະຊາຊົນທັງຫຼາຍມີຮອຍຍິ້ມແລ້ວກໍເປັນນະໂຍບາຍທີ່ດີ, ຄວນຢຶດໝັ້ນ; ຖ້າວ່າຍັງມີຜູ້ໃດຮູ້ສຶກໂສກເສົ້າ, ສະແດງໃຫ້ເຫັນວ່ານະໂຍບາຍນີ້ຍັງຕ້ອງການປັບປຸງໃຫ້ສົມບູນຂຶ້ນ.” ປັດຈຸບັນ, ມາດຕະຖານດັ່ງກ່າວຍັງຄົງເປັນມາດຕະຖານຂອງທົ່ວປະເທດຈີນໃນການປະຕິບັດວຽກງານກ່ຽວກັບ “ກະສິກຳ, ຊົນນະບົດ ແລະ ຊາວກະສິກອນ”.
ຄໍາເຫັນ