ທ່ານ ໂສມ ບຸດຕະກຸນ ຮອງເຈົ້າແຂວງໆຈໍາປາສັກ ໃຫ້ສໍາພາດໃນວັນທີ 3 ກຸມພານີ້ວ່າ: ໃນນາມຕາງໜ້າອົງຄະນະພັກ-ອົງການປົກຄອງແຂວງ ແລະ ປະຊາຊົນຊາວແຂວງຈໍາປາສັກ, ຂໍແຈ້ງຂ່າວກ່ຽວກັບການຈັດງານບຸນນະມັດສະການຜາສາດຫີນວັດພູຈຳປາສັກປະຈຳປີ 2025 ທີ່ຈະຈັດຂຶ້ນໃນວັນທີ 10-12 ກຸມພາທີ່ຈະມາເຖິງນີ້, ໃນງານ ຜູ້ເຂົ້າຮ່ວມຈະໄດ້ຊົມການສະແດງບົດຟ້ອນສິລະປະພື້ນເມືອງ, ການສະແດງສິລະປະຍ້ອນຍຸກ ທີ່ບົ່ງບອກເຖິງປະຫວັດສາດຄວາມເປັນມາແຫ່ງການກໍາເນີດຂອງວັດພູຈຳປາສັກ. ພ້ອມນີ້ ກໍຈະມີການວາງສະແດງສິນຄ້າ ໜຶ່ງເມືອງ ໜຶ່ງຜະລິດຕະພັນ (ໂອດ໊ອບ), ການແຂ່ງຂັນກິລາພື້ນເມືອງຫຼາກຫຼາຍປະເພດ. ແຕ່ລະຄືນ ຍັງຈະມີການສະແດງສິລະປະຂອງນ້ອງນັກຮຽນ ແລະ ຊົມການສະແດງໝໍລຳເລື່ອງ ທີ່ເປັນເອກະລັກ ຂອງຊາວແຂວງຈໍາປາສັກ. ໃນໄລຍະດຽວກັນ ກໍຈະມີງານບຸນກາເຟ ຢູ່ເມືອງປາກຊ່ອງ. ສໍາລັບມື້ເປີດງານຢ່າງເປັນທາງການ ຈະຈັດຂຶ້ນໃນຕອນບ່າຍວັນທີ 10 ກຸມພາ ຊຶ່ງຈະມີຂະບວນແຫ່ຂອງກ້ອນກຳລັງຕ່າງໆ, ມີການສະແດງບົດຟ້ອນສິລະປະ, ການສະແດງສິລະປະລະຄອນຍ້ອນຍຸກ. ຈາກນັ້ນ, ການນໍາແຂວງຈໍາປາສັກ ກໍຈະກ່າວເປີດງານຢ່າງເປັນທາງການ. ຕໍ່ມາກໍຈະມີການລັ່ນກອງໄຊ 9 ບາດ, ພ້ອມນີ້ ກໍຈະມີການຈຸດພຸໄຟ ແສງ ສີ ສຽງ ທີ່ອະລັງການ ຕື່ມອີກ. ວັນທີ 11 ກຸມພາ ກໍຈະມີການແຂ່ງຂັນກິລາພື້ນເມືອງ ເຊັ່ນ: ກິລາປິນເສົາເອົາລາງວັນ, ກິລາແລ່ນກະເປົ໋າ ແລະ ທ່ຽວງານບຸນຕາມອັດທະຍາໄສ.
ທ່ານ ໂສມ ບຸດຕະກຸນ ກ່າວຕື່ມວ່າ: ໃນວັນທີ 12 ກຸມພາ 2025 ກົງກັບມື້ຂຶ້ນ 15 ຄໍ່າເດືອນ 3 ລາວ ຫຼື ເດືອນສາມເພັງເປັນວັນບຸນມາຄະບູຊາ ເປັນວັນບຸນທີ່ມີຄວາມສໍາຄັນທາງພະພຸດສະສາໜາ, ຕອນເຊົ້າ, ຄະນະນໍາຂັ້ນແຂວງ ກໍຈະໄດ້ນໍາພາມວນຊົນທໍາບຸນໃສ່ບາດຖວາຍສັງຄະທານ ແດ່ພະສົງ. ຕອນແລງ ກໍມີພິທີວຽນທຽນ ເນື່ອງໃນວັນມາຄະບູຊາ.
ຜາສາດຫີນວັດພູຈໍາປາສັກ ເປັນສະຖານທີ່ທີ່ເກົ່າແກ່ ແລະ ໄດ້ຖືກຈົດທະບຽນຮັບຮອງເຂົ້າເປັນມໍລະດົກໂລກໃນວັນທີ 16 ທັນວາ 2001 ໂດຍອົງການ UNESCO, ເປັນສະຖານທີ່ມີຄຸນຄ່າທາງດ້ານປະຫວັດສາດ ແລະ ວັດທະນະທໍາ ຂອງຊາດລາວເຮົາ ມາແຕ່ສະໄໝບູນຮານນະການ.
(ຂ່າວ-ພາບ: ທູນທອງໃຈ)
ຄໍາເຫັນ