ໃນວາລະກອງປະຊຸມ, ຜູ້ເຂົ້າຮ່ວມໄດ້ພ້ອມກັນຄົ້ນຄວ້າ ແລະ ຮັບຮອງເອົາບົດລາຍງານການ ເມືອງ ແລະ ບົດສໍາຫຼວດການນໍາພາຂອງຄະນະພັກຊຸດເກົ່າ ທີ່ສະເໜີ ໂດຍ ສະຫາຍ ຈິນດາວົງ ໄຊຍະສິນ ຮອງເລຂາໜ່ວຍພັກທີ່ປຶກສາສຶກສາ ແລະ ວັດທະນະທໍາ ໄດ້ຕີລາຄາຄືນດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້, ພ້ອມທັງຕີລາຄາສະພາບການທີ່ພົ້ນເດັ່ນຂອງພາກພື້ນ ແລະ ສາກົນ. ໃນຊຸມປີຜ່ານມາ, ເຖິງວ່າສະພາບການພາກພື້ນ ແລະ ສາກົນມີການຜັນແປຢ່າງສັບສົນ ແລະ ຄາດຄະເນໄດ້ຍາກ ຊຶ່ງສົ່ງຜົນກະທົບທົ່ວໂລກ, ໃນນີ້ ລວມທັງ ສປປ ລາວ. ໜ່ວຍພັກສະຖານທູດ ແຫ່ງ ສປປ ລາວ ປະຈໍາ ສປ ຈີນ ໄດ້ສຸມໃສ່ນໍາພາ-ຊີ້ນໍາສະມາຊິກພັກ ແລະ ພະນັກງານພາຍໃນສະ ຖານທູດປະຕິບັດໜ້າທີ່ການເມືອງ ແລະ ວິຊາສະເພາະທີ່ການຈັດຕັ້ງຂັ້ນເທິງມອບໝາຍໃຫ້ດ້ວຍຄວາມຫ້າວຫັນ, ມີຄວາມຮັບຜິດຊອບສູງ ແລະ ໄດ້ຮັບຜົນສໍາເລັດຢ່າງໜ້າເພິ່ງພໍໃຈ ຊຶ່ງເປັນການປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດກ້າວຂຶ້ນສູ່ສັງຄົມນິຍົມເທື່ອລະກ້າວ.
ສໍາລັບໃນຕໍ່ໜ້າ (2025-2030) ໜ່ວຍພັກສະຖານທູດລາວ ທີ່ປັກກິ່ງ, ສປ ຈີນ ຈະສືບຕໍ່ເອົາໃຈໃສ່ນໍາພາ-ຊີ້ນໍາທຸກວຽກງານ ກໍຄື ແຜນການ ແລະ ຄາດໝາຍສູ້ຊົນທີ່ວາງໄວ້ຢ່າງຕັ້ງໜ້າ ເພື່ອສ້າງໜ່ວຍພັກໃຫ້ກາຍເປັນໜ່ວຍພັກ ທີ່ມີຄວາມໜັກແໜ້ນດ້ານການເມືອງ-ແນວຄິດ, ເຂັ້ມແຂງດ້ານການຈັດຕັ້ງ ແລະ ການນໍາພາເປັນເອກະພາບ, ມີແບບແຜນປະຕິບັດວຽກງານທີ່ມີປະສິດທິຜົນ, ຍົກສູງດ້ານວິຊາສະເພາະ, ເອົາໃຈໃສ່ວຽກງານຂະຫຍາຍ ແລະ ປ້ອງກັນພັກ-ພະນັກງານ ແລະ ນໍາພາ-ຊີ້ນໍາ 3 ອົງການຈັດຕັ້ງມະຫາຊົນເພື່ອສ້າງພື້ນຖານໃຫ້ແກ່ການກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນຕໍ່ໜ້າ ແນໃສ່ຕອບສະໜອງ ກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ຂອງພັກ-ລັດ.
ໃນໂອກາດນີ້, ສະຫາຍ ສົມພອນ ສີຈະເລີນ ໄດ້ເນັ້ນໜັກບາງຈຸດສໍາຄັນໃນການເຄື່ອນໄຫວວຽກງານໃນຊຸມປີຕໍ່ໜ້າ, ພ້ອມທັງເນັ້ນໜັກໃຫ້ສະມາຊິກພັກທຸກສະຫາຍ ຈົ່ງສືບຕໍ່ກໍາແໜ້ນແນວທາງ ແລະ ນະໂຍບາຍການຕ່າງປະເທດຂອງພັກ, ທັດສະນະຕ່າງໆຂອງລັດ, ສືບຕໍ່ເຊີດຊູມານະຈິດປະຕິວັດ, ພັດທະນາຕົນເອງ ແລະ ຢຶດໝັ້ນຄຸນທາດການເມືອງໃຫ້ໜັກແໜ້ນ, ຜັນຂະຫຍາຍເນື້ອໃນຈິດໃຈເປັນແຜນລະອຽດ ແລະ ແທດເໝາະໃຫ້ເປັນອັນສະເພາະ, ສືບຕໍ່ຮັກສາມູນເຊື້ອອັນດີ ແລະ ເຮັດໃຫ້ດີກວ່າເກົ່າທີ່ມີລັກສະນະຕັ້ງໜ້າ, ພ້ອມທັງຖອດຖອນບົດຮຽນໃນໄລຍະຜ່ານມາ, ຮັກສາຄວາມສາມັກຄີ, ເຮັດໃຫ້ສໍາເລັດໜ້າທີ່ທີ່ດີດ້ວຍຄຸນນະພາບສູງ ແລະ ອື່ນໆ.
(ຂ່າວ-ພາບ: ວິທະຍຸແຫ່ງຊາດ)
ຄໍາເຫັນ