ຍີ່ປຸ່ນ ໃຫ້ທຶນຊ່ວຍເຫຼືອ ກໍ່ສ້າງອາຄານຮຽນ ມ.ສ ເມືອງແມດ 

ພິທີເຊັນສັນຍາ ໃຫ້ທຶນຊ່ວຍເຫຼືອ ຈາກລັດຖະບານຍີ່ປຸ່ນ ໃນການກໍ່ສ້າງອາຄານຮຽນ ແລະ ຫ້ອງນ້ຳ ຂອງໂຮງຮຽນ ມ.ສ ເມືອງແມດ ແຂວງວຽງຈັນ ລວມມູນຄ່າທັງໝົດ 101.130 ໂດລາ ໄດ້ມີຂຶ້ນໃນວັນທີ 30 ມັງກອນ ນີ້ ທີ່ແຂວງວຽງຈັນ ລະຫວ່າງ ທ່ານ ໂຄບະຢາຊິ  ເຄນນິຈິ (Mr KOBAYASHI Kenichi ) ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະ ທ່ານ ໄມເສົາ ພົມມະຈັກ ຫົວໜ້າຫ້ອງການສຶກສາທິການ ແລະ ກິລາ ເມືອງແມດ, ໂດຍມີ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ທ່ານ ອ໊ອອ ແສງພິມ ຫົວໜ້າພະແນກ ສຶກສາທິການ ແລະ ກິລາແຂວງ, ແລະ ຜູ້ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.
ທ່ານ ຄຳພັນ ສິດທິດຳພາ ໄດ້ກ່າວສະແດງຄວາມຂອບໃຈຕໍ່ລັດຖະບານຍີ່ປຸ່ນທີ່ໄດ້ໃຫ້ການຊ່ວຍເຫຼືອດັ່ງກ່າວ ຊຶ່ງຈະເປັນການປະກອບສ່ວນສໍາຄັນເຂົ້າໃນການພັດທະນາການສຶກສາຂອງແຂວງ ກໍຄືຂອງເມືອງແມດ ໂດຍສະເພາະ ການປະຕິບັດບັນດາຄາດໝາຍຕົວຊີ້ວັດໃນຂົງເຂດຊັບພະຍາກອນມະນຸດ ແລະ ພື້ນຖານໂຄງລ່າງ ຊຶ່ງເຮັດໃຫ້ບາງຕົວຊີ້ວັດ ໄດ້ບັນລຸຕາມຄາດໝາຍທີ່ວາງໄວ້, ພ້ອມນັ້ນກໍເຮັດໃຫ້ຂະແໜງການດັ່ງກ່າວຂອງແຂວງວຽງຈັນ ໄດ້ຮັບການພັດທະນາດີຂຶ້ນ ຖ້າທຽບໃສ່ໄລຍະຜ່ານມາ.
 ທ່ານກ່າວອີກວ່າ: ໄລຍະຜ່ານມາອົງການປົກຄອງແຂວງ ກໍໄດ້ເອົາໃຈໃສ່ຊີ້ນຳພາກສ່ວນທີ່ກ່ຽວຂ້ອງເປັນເຈົ້າການໃນການບູລະນະຮັກສາ ວັດຖຸ - ສິ່ງຂອງຕ່າງໆ ທີ່ໄດ້ຮັບການຊ່ວຍເຫຼືອ ແລະ ນໍາໃຊ້ໃຫ້ຖືກເປົ້າໝາຍ ເພື່ອໃຫ້ເກີດຜົນປະໂຫຍດສູງສຸດແກ່ປະຊາຊົນ.
ທ່ານ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ກ່າວວ່າ: ການຊ່ວຍເຫຼືອສ້າງອາຄານຮຽນຄັ້ງນີ້ ຍ້ອນວ່າໂຮງຮຽນດັ່ງກ່າວເປັນໂຮງຮຽນໃຫຍ່, ນັກຮຽນ ມີຈຳນວນຫຼາຍ, ຫ້ອງຮຽນ ແລະ ຫ້ອງນ້ຳ ມີຈຳກັດ ບໍ່ພຽງພໍກັບການຊົມໃຊ້ ອີກຢ່າງເພື່ອເປັນການປະກອບສ່ວນໃນການພັດທະນາ ຊັບພະຍາກອນມະນຸດຂອງເມືອງແມດ ກໍຄືແຂວງວຽງຈັນ ໃຫ້ມີຄຸນນະພາບສູງຂຶ້ນ.
ທ່ານ ໄມເສົາ ພົມມະຈັກ ກ່າວວ່າ: ໂຄງການດັ່ງກ່າວ ປະກອບມີອາຄານຮຽນ 1 ຫຼັງ ຂະໜາດ 9 ແມັດ x 42 ແມັດ, ປະກອບມີ 6 ຫ້ອງຮຽນ ແລະ 6 ຫ້ອງນ້ຳ ຊຶ່ງຈະເລີ່ມລົງມືກໍ່ສ້າງໃນຕົ້ນເດືອນກຸມພາ 2024 ນີ້ ຊຶ່ງແມ່ນບໍລິສັດວຽງໄຊດວງປັນຍາ ເປັນຜູ້ຮັບເໝົາກໍ່ສ້າງ ໂດຍຈະໃຊ້ເວລາກໍ່ສ້າງທັງໝົດ 6 ເດືອນ ໃຫ້ສຳເລັດ.
(ຂ່າວ-ພາບ: ແກ້ວອຸດົມ)