ຍີ່ປຸ່ນ ກຽມຂະຫຍາຍການພັດທະນາພະລັງງານລົມນອກແຄມຝັ່ງ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ລັດຖະບານຍີ່ປຸ່ນໄດ້ອະນຸມັດຮ່າງການແກ້ໄຂກົດໝາຍທີ່ມີຢູ່ ເພື່ອອະນຸຍາດໃຫ້ມີການດຳເນີນໂຄງການພັດທະນາພະລັງງານລົມນອກແຄມຝັ່ງໃນເຂດເສດຖະກິດສະເພາະ (EEZ) ຖືວ່າເປັນການເຄື່ອນໄຫວທີ່ສຳຄັນຂອງປະເທດໃນການບັນລຸເປົ້າໝາຍຄວາມເປັນກາງທາງກາກບອນພາຍໃນປີ 2050.
    ຍີ່ປຸ່ນຕັ້ງເປົ້າໝາຍທີ່ຈະມີໂຄງການພະລັງງານລົມນອກແຄມຝັ່ງ ຊຶ່ງມີກຳລັງການຜະລິດໄຟຟ້າ 10 ກິກກະວັດພາຍໃນປີ 2030 ແລະ ເພີ່ມເປັນ 45 ກິກກະວັດພາຍໃນປີ 2040 ເພື່ອທົດແທນເຊື້ອໄຟຟອດຊິວລວມເຖິງຖ່ານຫີນ ແລະ ແກັສທຳມະຊາດແຫຼວ (LNG) ໃນອັດຕາສ່ວນພະລັງງານຂອງປະເທດ ໂດຍມີກັງຫັນລົມລອຍນ້ຳເປັນສ່ວນສຳຄັນ. ກະຊວງເສດຖະກິດ, ການຄ້າ ແລະ ອຸດສາຫະກຳຍີ່ປຸ່ນກັບກະຊວງທີ່ດິນ, ໂຄງສ້າງພື້ນຖານ, ການຂົນສົ່ງ ແລະ ການທ່ອງທ່ຽວຍີ່ປຸ່ນລະບຸໃນຖະແຫຼງການຮ່ວມວ່າ: ກົດໝາຍໃໝ່ຈະອະນຸຍາດໃຫ້ຕິດຕັ້ງກັງຫັນລົມໃນທະເລ ຊຶ່ງຢູ່ໄກຈາກນ່ານນ້ຳອານາເຂດ ແລະ ນ່ານນ້ຳພາຍໃນຂອງປະເທດໃນປັດຈຸບັນ. ທ່ານ ເຄນ ໄຊໂຕະ ລັດຖະມົນຕີກະຊວງອຸດສາຫະກຳຍີ່ປຸ່ນກ່າວວ່າ: ຮ່າງແກ້ໄຂຂອງກົດໝາຍສະບັບນີ້ຈະເຮັດໃຫ້ເຮົາສາມາດສ້າງໂຄງການຂະໜາດໃຫຍ່ທີ່ໝັ້ນຄົງໃນພື້ນທີ່ທະເລໄດ້ ກົດໝາຍໃໝ່ນີ້ຈະເລັ່ງການຂະຫຍາຍຕົວຂອງໂຄງການພະລັງງານລົມນອກແຄມຝັ່ງ. ທັງນີ້, ບໍລິສັດພະລັງງານລະດັບໂລກຫຼາຍແຫ່ງຕ່າງກໍຮຽກຮ້ອງໃຫ້ຍີ່ປຸ່ນເພີ່ມການປະມູນ ແລະ ເຮັດໃຫ້ການລົງທຶນໜ້າດຶງດູດຍິ່ງຂຶ້ນເນື່ອງຈາກການແຂ່ງຂັນໃນກຸ່ມຜູ້ຈັດຫາທີ່ດິນເພີ່ມຂຶ້ນທົ່ວໂລກ ຕະຫຼອດຈົນບົດບັນທຶກການປ່ຽນແປງກົດໝາຍ EEZ.
    ທ່ານ ໄຊໂຕະ ລະບຸຕື່ມວ່າ: ຄວາມຍິນຍອມຈາກຊຸມຊົນການປະມົງຖືວ່າເປັນສິ່ງສຳຄັນສຳລັບການອະນຸມັດໂຄງການ ເນື່ອງຈາກຍີ່ປຸ່ນເປັນທັງຜູ້ສົ່ງອອກ ແລະ ຜູ້ບໍລິໂພກຜະລິດຕະພັນທາງທະເລລາຍໃຫຍ່. ປັດຈຸບັນ, ຍີ່ປຸ່ນມີໂຄງການຜະລິດໄຟຟ້າຈາກພະລັງງານລົມນອກແຄມຝັ່ງຂະໜາດນ້ອຍກວ່າ 0,5 ກິກກະວັດ ແລະ ກຳລັງພັດທະນາທົ່ງກັງຫັນລົມລອຍນໍ້າຈຳນວນໜຶ່ງ ໂດຍມີຈຸດປະສົງເພື່ອການສາທິດເປັນຫຼັກ.