ບົດລາຍງານລະບຸວ່າ: ການນຳເຂົ້າຄັ້ງນີ້ແມ່ນໄດ້ຮັບການນຳເຂົ້າຜ່ານຫ້ອງການສະຫະກອນກະສິກຳແຫ່ງຊາດສເກົາຫຼີ (NACF) ປະຈຳຍີ່ປຸ່ນ, ໂດຍເຂົ້າສານ 2 ໂຕນຂອງສເກົາຫຼີ ໄດ້ຈຳໜ່າຍຜ່ານຊ່ອງທາງອອນລາຍ ແລະ ຮ້ານຊັບພະສິນຄ້າທ້ອງຖິ່ນໃນເດືອນນີ້ ຊຶ່ງຖືເປັນການຂາຍເຂົ້າສານຄັ້ງທຳອິດ ໃນຍີ່ປຸ່ນ ນັບຕັ້ງແຕ່ຫ້ອງການ NACF ໄດ້ເປີດຢູ່ໃນປະເທດຍີ່ປຸ່ນ.
ເຖິງແມ່ນວ່າຈຳນວນດັ່ງກ່າວຈະເປັນອັດຕາສ່ວນຂະໜາດນ້ອຍເມື່ອທຽບກັບການບໍລິໂພກທັງໝົດຂອງຍີ່ປຸ່ນ, ແຕ່ຖືວ່າເປັນສັນຍານໃນທາງບວກສໍາລັບຂະແໜງການສົ່ງອອກຂອງ ສ ເກົາຫຼີ ຊຶ່ງກໍາລັງປະເຊີນກັບຄວາມກົດດັນຈາກນະໂຍບາຍການຄ້າຂອງປະທານາທິບໍດີສະຫະລັດ ອາເມຣິກາ.
ເຈົ້າໜ້າທີ່ຈາກຫ້ອງການ NACF ປະເທດຍີ່ປຸ່ນ ກ່າວວ່າ: ກ່ອນໜ້ານີ້, ເຂົ້າຂອງ ສ ເກົາຫຼີບໍ່ສາມາດແຂ່ງຂັນດ້ານລາຄາຢູ່ຕະຫຼາດຍີ່ປຸ່ນເນື່ອງຈາກພາສີນໍາເຂົ້າສູງ, ທ່ານກ່າວຕື່ມວ່າ: ເຂົ້າຈໍານວນ 2 ໂຕນ ງວດທໍາອິດໄດ້ຂາຍໝົດແລ້ວ ແລະ ກຽມຈະສົ່ງເຂົ້າສານຕື່ມອີກ 20 ໂຕນພາຍໃນອາທິດຕໍ່ໄປ ຊຶ່ງເມື່ອລວມເຂົ້າກັນແລ້ວຈະເປັນຈຳນວນຫຼາຍທີ່ສຸດໃນຮອບ 35 ປີ.
ທັງນີ້, ຂໍ້ມູນຂອງກະຊວງພາຍໃນຍີ່ປຸ່ນລະບຸວ່າ: ລາຄາເຂົ້າຂອງຍີ່ປຸ່ນໄດ້ເພີ່ມຂຶ້ນ 92% ໃນເດືອນມີນາ ເມື່ອທຽບກັບເດືອນດຽວກັນຂອງປີກາຍນີ້ ຊຶ່ງເປັນການເພີ່ມຂຶ້ນໄວທີ່ສຸດນັບແຕ່ມີການເກັບກຳຂໍ້ມູນໃນປີ 1971 ແລະ ໄດ້ກາຍເປັນປັດໄຈຕົ້ນຕໍທີ່ເຮັດໃຫ້ອັດຕາເງິນເຟີ້ໃນທົ່ວປະເທດເພີ່ມຂຶ້ນ.
ການຄ້າເຂົ້ານີ້ເກີດຂຶ້ນໃນໄລຍະທີ່ທັງສອງປະເທດພະຍາຍາມຮັດແໜ້ນສາຍພົວພັນດ້ານການຄ້າ. ເພື່ອຮັບມືກັບນະໂຍບາຍການຄ້າຂອງ ສະຫະລັດ ອາເມລິກາໃນເດືອນຜ່ານມາ, ຫົວໜ້າຄະນະເຈລະຈາດ້ານການຄ້າຂອງສເກົາຫຼີ, ຈີນ ແລະ ຍີ່ປຸ່ນໄດ້ຈັດກອງປະຊຸມຢູ່ສເກົາຫຼີ ແລະຢືນຢັນຄືນໃໝ່ຄຳໝັ້ນສັນຍາສະໜັບສະໜູນການຄ້າເສລີ.
ຄໍາເຫັນ