ຍົກລະດັບຄວາມຮູ້ພື້ນຖານການຜະລິດຂ່າວ ທີ່ແຂວງອຸດົມໄຊ

ຊຸດຝຶກອົບຮົມພື້ນຖານການຜະລິດຂ່າວ ໃຫ້ແກ່ນັກຂ່າວໃນໄລຍະໃໝ່ ຂອງສະຖານີວິທະຍຸ-ໂທລະພາບແຂວງ, ພະແນກການ, ອົງການອ້ອມຂ້າງ ແຂວງອຸດົມໄຊ ໄດ້ຈັດຂຶ້ນ ໃນວັນທີ 12 ກຸມພາ ນີ້, ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ້ອງທ່ຽວ (ຖວທ) ແຂວງໂດຍມີທ່ານ ອຸ່ນເຮືອນ ແກ້ວມີໄຊ ຮອງຫົວໜ້າພະແນກ ຖວທ ແຂວງ, ມີທ່ານ ບຸນເລື່ອມ ສຸວັນຄຳ ຮອງຫົວຫນ້າສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ, ກະຊວງ ຖວທ ເຂົ້າຮ່ວມ. 
    ການຝຶກອົບຮົມຄັ້ງນີ້, ເພື່ອບຳລຸງສ້າງ ແລະ ຍົກລະດັບຄວາມຮູ້ຄວາມສາມາດໃຫ້ແກ່ນັກຂ່າວສື່ມວນ ຊົນໃນການຜະລິດຂ່າວໃນໄລຍະໃໝ່ໃຫ້ມີຄວາມວ່ອງໄວທັນສະໄໝ, ທັນການ ທັນເວລາ ໃຫ້ສົມຄູ່ກັບຄຳປາໄສຂອງ ທ່ານ ທອງລຸນ ສີສຸລິດ ເລຂາທິການໃຫຍ່ພັກປະຊາຊົນປະຕິວັດລາວ ທີ່ໄດ້ເຄີຍກ່າວໄວ້ໃນໂອກາດເຂົ້າຮ່ວມງານສະຫຼອງ ວັນສີມວນຊົນ ແລະ ວັນພິມຈຳໜ່າຍຄົບຮອບ 70 ປີ ຊຶ່ງທ່ານໄດ້ກ່າວວ່າ “ສື່ມວນຊົນນັກຂີດຂຽນ ຕ້ອງເປັນຜູ້ປາກອອກແສງ, ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ທີ່ກຳຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”. 
ການຝຶກອົບຮົມໃນຄັ້ງນີ້, ປະກອບມີ 4 ວິຊາຄື: ກົດໝາຍສື່ມວນຊົນ, ພື້ນຖານການຂຽນຂ່າວມີ, ຂ່າວ ແລະ ລັກສະນະພື້ນຖານຂອງຂ່າວ, ຄວາມສໍາຄັນຂອງສື່ມວນຊົນ, ນັກຂ່າວ ແລະ ຈັນຍາບັນຂອງນັກຂ່າວ, ຂໍ້ຫ້າມສໍາລັບບຸກຄະລາກອນສື່ມວນຊົນ, ການເກັບຂໍ້ມູນຂ່າວ, ຫຼັກການຂຽນຂ່າວ. ໃຊ້ພາສາໃນວຽກງານສື່ມວນຊົນ ປະກອບມີ 3 ຫົວຂໍ້ດ້ວຍກັນຄື: ຄວາມໝາຍຄວາມສຳຄັນ ແລະ ຄວາມຈຳເປັນໃນການນໍາໃຊ້ພາສາຢ່າງຖືກຕ້ອງ. ບາງບັນຫາໃນການໃຊ້ພາສາລາວ ແລະ ການນໍາໃຊ້ພາສາໃນການຂຽນຂ່າວ. ການຕັດຕໍ່ຮູບພາບ, ວິດີໂອດ້ວຍມືຖື ໂດຍໃຊ້ແອັບຄາຍມາດສະເຕີ (kinemaster) ປະກອບມີຄື: ແນະນຳວິທີການຕິດຕັ້ງແອັບ ຜ່ານມືຖືລະບົບ Andriodແລະ IOS, ການນໍາເຂົ້າໄຟຮູບພາບ, ສຽງ, ວິດີໂອ ເພື່ອມາຕັດຕໍ່,  ອະທິບາຍສັນຍະລັກ ແລະ ວິທີການນໍາໃຊ້ເຄື່ອງມືຕາງໆໃນແອັບ; ການບັນທຶກ ແລະ ການສົ່ງອອກວິດີໂອເມື່ອສ້າງສຳເລັດແລ້ວ. 
(ຂ່າວ: ແສງອາທິດ)