ຍົກລະດັບຄວາມຮູ້ວຽກງານສ້າງ ແລະ ປັບປຸງກົດໝາຍ

ສພຊ ເພື່ອຮັບປະກັນການປະຕິບັດວຽກງານສ້າງ ແລະ ປັບປຸງກົດໝາຍ ເປັນລະບົບ ແລະ ສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງແຕ່ລະພາກສ່ວນ ແລະ ເພື່ອປັບປຸງກົນໄກ, ຂັ້ນຕອນການປະຕິບັດວຽກງານໃນການເປັນເສນາທິການສ້າງ ແລະ ປັບປຸງກົດໝາຍໃຫ້ແກ່ຄະນະປະຈຳສະພາແຫ່ງຊາດ ໃຫ້ຖືກຕ້ອງ ແລະ ສອດຄ່ອງຕາມກົດໝາຍ. ໃນວັນທີ 12 ມີນາ ນີ້ ທີ່ເມືອງແກ້ວອຸດົມ ແຂວງວຽງຈັນ, ໄດ້ມີກອງປະຊຸມສຳມະນາຍົກລະດັບຄວາມຮູ້ກ່ຽວກັບວຽກງານສ້າງ ແລະ ປັບປຸງກົດໝາຍ ໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພາຍໃຕ້ການເປັນປະທານຂອງທ່ານຈະເລີນ ເຢຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ໂດຍມີວິທະຍາກອນຈາກກະຊວງຍຸຕິທໍາ, ຫ້ອງວ່າການສໍານັກງານນາຍົກລັດຖະມົນຕີແລະ ຫ້ອງວ່າການສໍານັກງານປະທານປະເທດ;ມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ຈະເລີນ ເຢຍປາວເຮີ ກ່າວວ່າ: ກອງປະຊຸມຄັ້ງນີ້ມີຄວາມໝາຍສຳຄັນຫຼາຍ ເນື່ອງຈາກວ່າພະນັກງານ-ລັດຖະກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ມີພາລະບົດບາດເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນວຽກງານສ້າງນິຕິກຳຕ່າງໆ, ວຽກງານສ້າງ ແລະ ປັບປຸງກົດໝາຍ ເປັນໜຶ່ງໃນພາລະບົດບາດສຳຄັນຕົ້ນຕໍຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ໃນໄລຍະຜ່ານມາພວກເຮົາໄດ້ຮ່ວມກັນຈັດຕັ້ງປະຕິບັດພາລະບົົດບາດດັ່ງກ່າວນີ້ ຕາມຂອບເຂດຄວາມຮັບຜິດຊອບ, ສິດ ແລະ ໜ້າທີ່ຂອງແຕ່ລະພາກສ່ວນໄດ້ດີສົມຄວນ ຊຶ່ງມາຮອດປັດຈຸບັນສະພາແຫ່ງຊາດໄດ້ຮັບຮອງເອົາຮ່າງກົດໝາຍສ້າງໃໝ່ ແລະ ປັບປຸງ 167 ສະບັບ;ແຕ່ຄຽງຄູ່ກັນນັ້ນກໍຍັງມີດ້ານອ່ອນທີ່ເລັ່ງທວງໃຫ້ພວກເຮົາຕ້ອງແກ້ໄຂ ເປັນຕົ້ນຕ້ອງບຳລຸງຍົກລະດັບຄວາມຮູ້ຄວາມສາມາດໃຫ້ແກ່ຖັນແຖວພະນັກງານ-ລັດຖະກອນ ທີ່ຮັບຜິດຊອບວຽກງານດັ່ງກ່າວ ໃຫ້ສາມາດຈັດຕັ້ງປະຕິບັດພາລະບົດບາດທີ່ເປັນເສນາທິການໃຫ້ແກ່ຄະນະປະຈຳສະພາແຫ່ງຊາດ, ຄະນະປະຈຳສະພາປະຊາຊົນຂັ້ນແຂວງ ກໍຄືທຸກພາກສ່ວນທີ່ເຮັດວຽກງານສ້າງ ແລະ ປັບປຸງກົດໝາຍ ໃຫ້ມີປະສິດທິພາບ, ປະສິດທິຜົນສູງຂຶ້ນກວ່າເກົ່າ. 
ໃນກອງປະຊຸມ, ໄດ້ຮັບຟັງການສະເໜີກ່ຽວກັບພາລະບົດບາດ, ສິດ ແລະ ໜ້າທີ່ຂອງຫ້ອງວ່າການສຳນັກງານນາຍົກລັດຖະມົນຕີ ໃນການເປັນເສນາທິການໃນວຽກງານສ້າງ ແລະ ປັບປຸງກົດໝາຍໃຫ້ແກ່ລັດຖະບານ; ພາລະບົດບາດ, ສິດ ແລະ ໜ້າທີ່ຂອງກຳມາທິການກົດໝາຍ ໃນວຽກງານສ້າງ ແລະ ປັບປຸງກົດໝາຍໃຫ້ແກ່ຄະນະປະຈຳສະພາແຫ່ງຊາດ; ພາລະບົດບາດ, ສິດ ແລະ ໜ້າທີ່ຂອງກະຊວງຍຸຕິທຳ ໃນການກວດກາຄວາມສອດຄ່ອງທາງດ້ານກົດໝາຍ; ພາລະບົດບາດ, ສິດ ແລະ ໜ້າທີ່ຂອງຫ້ອງວ່າການສຳນັກງານປະທານປະເທດ ໃນການເປັນເສນາທິການໃນວຽກງານສ້າງ ແລະ ປັບປຸງກົດໝາຍໃຫ້ແກ່ປະທານປະເທດ; ບົດຮຽນຂອງຕ່າງປະເທດ ກ່ຽວກັບຂັ້ນຕອນການສ້າງ ແລະ ປັບປຸງກົດໝາຍ ຈາກຫົວໜ້າຊ່ຽວຊານປະຈຳໂຄງການສະເຕັບສ UNDP ແລະ ເຜີຍແຜ່ຄຳແນະນຳການສ້າງແຜນການສ້າງ ແລະ ປັບປຸງກົດໝາຍ ໄລຍະ 2026-2030. ຈາກນັ້ນ, ບັນດາຜູ້ເຂົ້າຮ່ວມໄດ້ສົນທະນາແລກປ່ຽນບົດຮຽນຊຶ່ງກັນ ແລະກັນໃນແຕ່ລະຫົວຂໍ້ທີ່ທາງກອງປະຊຸມໄດ້ຍົກຂຶ້ນມາ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)