ໃນວັນທີ 30 ມັງກອນນີ້ ທີ່ຫ້ອງປະຊຸມພັດທະນາຊົນນະບົດ ເມືອງຄໍາເກີດ ແຂວງບໍລິຄໍາໄຊ, ຄະນະບໍລິຫານງານຊາວໜຸ່ມແຂວງບໍລິຄໍາໄຊ ໄດ້ຈັດຊຸດຝຶກອົບຮົມສ້າງຄວາມເຂັ້ມແຂງ ໃຫ້ຜູ້ຮັບຜິດຊອບວຽກງານຊາວໜຸ່ມ, ເຍົາວະຊົນ-ອະນຸຊົນທັນວາ ຂຶ້ນໂດຍການເປັນປະທານຂອງສະຫາຍ ທອງມະນີ ໂຄດປັນຍາ ກໍາມະການພັກແຂວງກໍາມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວເລຂາຄະນະບໍລິຫານງານຊາວໜຸ່ມແຂວງບໍລິຄໍາໄຊ, ມີຜູ້ຕາງໜ້າຄະນະຮັບຜິດຊອບວຽກງານຊາວໜຸ່ມຂັ້ນແຂວງ, ເມືອງ, ຊາວໜຸ່ມບ້ານເຂົ້າຮ່ວມ.
ໃນບັ້ນຝຶກອົບຮົມຄັ້ງນີ້, ສະຫາຍ ທອງມະນີ ໂຄດປັນຍາ ໄດ້ກ່າວວ່າ: ການຝຶກອົບຮົມຄັ້ງນີ້, ແມ່ນເພື່ອຍົກລະດັບຄວາມຮູ້ທາງດ້ານວິຊາການ ໃຫ້ແກ່ຜູ້ທີ່ຮັບຜິດຊອບວຽກຊາວໜຸ່ມ, ເຍົາວະຊົນ-ອະນຸຊົນທັນວາ ໃຫ້ມີຄວາມຮູ້, ຄວາມສາມາດ ທາງດ້ານວິຊາສະເພາະ ເພື່ອນໍາພາ-ຊີ້ນຳ ນໍາເອົາຄວາມຮູ້, ປະສົບການທີ່ໄດ້ຮຽນຮູ້ ລົງໄປຈັດຕັ້ງປະຕິບັດຢູ່ຂັ້ນເມືອງ, ບ້ານ, ຮາກຖານ, ໜ່ວຍຮາກຖານ ແລະ ຂັ້ນໂຮງຮຽນ ໃນການຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາ,ຕິດພັນກັບການປະຕິບັດເນື້ອໃນຂໍ້ແຂ່ງຂັນ 4 ບຸກ ຂອງຄະນະພັກ-ຄະນະຊາວໜຸ່ມວາງອອກ ແລະ ແຜນພັດທະນາເສດຖະກິດ - ສັງຄົມ ໃນແຕ່ລະໄລຍະ.ໃນໂອກາດນີ້, ສະຫາຍ ຍັງໄດ້ນໍາເອົາງົບປະມານ ແລະ ອຸປະກອນການຮຽນ ມາມອບໃຫ້ຄະນະບໍລິຫານງານຊາວໜຸ່ມເມືອງ ມີມູນຄ່າ 26 ລ້ານກີບ ເພື່ອນໍາໃຊ້ເຂົ້າໃນການເຄື່່ອນໄຫວວຽກງານຊາວໜຸ່ມ, ເຍົາວະຊົນ-ອະນຸຊົນ.
(ຂ່າວ: ວັນເພັງ)
ຄໍາເຫັນ