 |
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງຈຸດບໍລິການຈັດຫາງານແຂວງອຸດົມໄຊໃນໄລຍະຜ່ານມາ, ຊຶ່ງໄດ້ຍົກໃຫ້ເຫັນທັງຂໍ້ສະດວກ, ຜົນສຳເລັດທີ່ຍາດມາໄດ້ ແລະ ຂໍ້ຫຍຸ້ງຍາກ, ສິ່ງທ້າທາຍທີ່ຕ້ອງໄດ້ຮ່ວມກັນແກ້ໄຂ. ພ້ອມກັນນັ້ນ, ຍັງໄດ້ມີການທົບທວນຄືນເນື້ອໃນບົດບັນທຶກຈາກກອງປະຊຸມຄັ້ງທີ່ຜ່ານມາ ເພື່ອເປັນບ່ອນອີງໃນການວາງທິດທາງສືບຕໍ່, ພ້ອມດຽວກັນນີ້ ຜູ້ເຂົ້າຮ່ວມໄດ້ປຶກສາຫາລື ແລະ ປະກອບຄຳຄິດຄຳເຫັນຢ່າງກົງໄປກົງມາໃນຫົວຂໍ້ສຳຄັນທີ່ໄດ້ຍົກຂຶ້ນມາປະກອບມີ: ການປັບປຸງຄຸນນະພາບການບໍລິການຂອງຈຸດບໍລິການຈັດຫາງານ, ຊ່ອງທາງໃນການຊ່ວຍໃຫ້ຫົວໜ່ວຍແຮງງານ (ຜູ້ອອກແຮງງານ) ສາມາດເຂົ້າເຖິງຂໍ້ມູນ ແລະ ບໍລິການໄດ້ງ່າຍຂຶ້ນ, ການສົ່ງເສີມໃຫ້ບັນດາບໍລິສັດ, ໂຮງງານ ປະກາດຕຳແໜ່ງງານວ່າງຜ່ານລະບົບຂໍ້ມູນຕະຫຼາດແຮງງານ (LMIS) ໃຫ້ຫຼາຍຂຶ້ນ, ການຮ່ວມມືໃນການຈັດຫາງານ "ຕະຫຼາດນັດແຮງງານ" ເພື່ອສ້າງໂອກາດໃຫ້ຜູ້ປະກອບການ ແລະ ຜູ້ຊອກວຽກເຮັດງານທໍາໄດ້ພົບປະກັນໂດຍກົງ, ການສ້າງແຜນການຮ່ວມມື 3 ຝ່າຍ ລະຫວ່າງ ພະແນກ ຮສສ ແຂວງ, ສະຫະພັນກຳມະບານແຂວງ, ສະພາການຄ້າ ແລະ ອຸດສາຫະກໍາແຂວງ ເພື່ອຂັບເຄື່ອນວຽກງານແຮງງານໃຫ້ມີປະສິດທິພາບ.
ທ່ານ ສຸພອນ ແສງຈັນທະລາ ໄດ້ກ່າວເນັ້ນວ່າ: “ການແກ້ໄຂບັນຫາການຂາດແຄນແຮງງານ ແລະ ການສົ່ງເສີມໃຫ້ຄົນລາວມີວຽກເຮັດງານທຳທີ່ໝັ້ນຄົງ ບໍ່ແມ່ນໜ້າທີ່ຂອງພາກສ່ວນໃດໜຶ່ງໂດຍສະເພາະ, ແຕ່ເປັນຄວາມຮັບຜິດຊອບຮ່ວມກັນຂອງທັງພາກລັດ, ພາກທຸລະກິດ ແລະ ພາກສັງຄົມ. ກອງປະຊຸມໃນມື້ນີ້ ຈຶ່ງເປັນບາດກ້າວສຳຄັນໃນການເສີມສ້າງຄວາມເຂົ້າໃຈ ແລະ ຊອກຫາກົນໄກການຮ່ວມມືທີ່ແໜ້ນແຟ້ນໃນຕໍ່ໜ້າ.”
(ຂ່າວ: ແສງອາທິດ)
ຄໍາເຫັນ