ປະກາດການຍົກຍ້າຍ-ແຕ່ງຕັ້ງ ພະນັກງານການນໍາຂອງກະຊວງພບ

ພິທີປະກາດການຈັດຕັ້ງ ຍົກຍ້າຍ - ແຕ່ງຕັ້ງ ພະນັກງານການນໍາຂອງກະຊວງ ພະລັງງານ ແລະ ບໍ່ແຮ່ (ພບ) ໄດ້ຈັດຂຶ້ນໃນຕອນແລງວັນທີ 14 ກຸມພາຜ່ານມາທີ່ລັດວິສາຫະກິດໄຟຟ້າລາວ ໂດຍການເປັນປະທານຂອງທ່ານ ໂພໄຊ ໄຊຍະສອນ ລັດຖະມົນຕີກະຊວງ ພບ ໂດຍມີບັນດາທ່ານຈາກພາກສ່ວນກ່ຽວຂ້ອງເຂົ້າຮ່ວມ ຊຶ່ງການປະກາດຄັ້ງນີ້ ທ່ານ ສີນາວາ ສຸພານຸວົງ ໄດ້ຍົກຍ້າຍໄປຮັບໜ້າທີ່ໃໝ່, ສ່ວນ ທ່ານ ຈັນທະບູນ ສຸກອາລຸນ ຂຶ້ນເປັນຮອງລັດຖະມົນຕີ ກະຊວງ ພບ.
    ໃນພິທີ, ທ່ານ ທອງຈັນ ໂຂງພູມຄໍາ ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານບັນດາເອກະສານນິຕິກຳຕ່າງໆ ທີ່ກ່ຽວຂ້ອງຄື ຄໍາສັ່ງ ເລກທີ 10/ຄລສພ, ລົງວັນທີ 5/1/2024 ວ່າດ້ວຍການຍົກຍ້າຍພະນັກງານການນໍາໄປຮັບໜ້າທີ່ໃໝ່; ຄໍາສັ່ງ ເລກທີ 01/ນຍ, ລົງວັນທີ 5/1/2024 ວ່າດ້ວຍການຍົກຍ້າຍພະນັກງານການນໍາໄປຮັບໜ້າທີ່ໃໝ່ ຊຶ່ງສອງເອກະສານແມ່ນມີເນື້ອໃນຄື: ຍົກຍ້າຍ ທ່ານ ສີນາວາ ສຸພານຸວົງ ກຳມະການປະຈໍາພັກກະຊວງ ພບ ໄປຮັບໜ້າທີ່ໃໝ່ຢູ່ ຫ້ອງວ່າການສຳນັກງານນາຍົກລັດຖະມົນຕີແລະ ຜ່ານມະຕິ ເລກທີ 07/ຄປຈ, ລົງວັນທີ 19/1/2024 ວ່າດ້ວຍການຮັບຮອງເອົາການແຕ່ງຕັ້ງ ສະມາຊິກລັດຖະບານ ຊຶ່ງໄດ້ເຫັນດີຮັບຮອງການແຕ່ງຕັ້ງ ທ່ານ ສີນາວາ ສຸພານຸວົງ ເປັນລັດຖະມົນຕີປະຈໍາຫ້ອງວ່າການສຳນັກງານນາຍົກລັດຖະມົນຕີ ຕາມການສະເໜີຂອງນາຍົກລັດຖະມົນຕີແລະ ຜ່ານລັດຖະດຳລັດ ເລກທີ 021/ປປທ, ລົງວັນທີ 29/1/2024 ວ່າດ້ວຍການແຕ່ງຕັ້ງສະມາຊິກລັດຖະບານ ຊຶ່ງໄດ້ແຕ່ງຕັ້ງ ທ່ານ ສີນາວາ ສຸພານຸວົງ ເປັນລັດຖະມົນຕີປະຈໍາຫ້ອງວ່າການສຳນັກງານນາຍົກລັດຖະມົນຕີ.
    ພ້ອມນີ້, ກໍໄດ້ຜ່ານດຳລັດ ເລກທີ 66/ນຍ, ລົງວັນທີ 5/1/2024 ວ່າດ້ວຍການແຕ່ງຕັ້ງຮອງລັດຖະມົນຕີກະຊວງ ພບ ໂດຍໄດ້ແຕ່ງຕັ້ງ ທ່ານ ຈັນທະບູນ ສຸກອາລຸນ ເປັນຮອງລັດຖະມົນຕີກະຊວງ ພບ ແລະ ຜ່ານດຳລັດ ເລກທີ 67/ນຍ, ລົງວັນທີ 5/1/2024 ວ່າດ້ວຍການແຕ່ງຕັ້ງຮອງລັດຖະມົນຕີກະຊວງ ພບ ໂດຍໄດ້ແຕ່ງຕັ້ງ ທ່ານ ຈັນສະແຫວງ ບຸນຍົງ ເປັນຮອງລັດຖະມົນຕີກະຊວງ ພບ. ພ້ອມນີ້, ກໍໄດ້ຜ່ານແຈ້ງການ ເລກທີ 03/ຄຈສພ, ລົງວັນທີ 4/1/2024 ໂດຍແຈ້ງການເຖິງຄະນະປະຈໍາພັກກະຊວງ ພບ, ເລື່ອງການແຕ່ງຕັ້ງພະນັກງານຮັບໜ້າທີ່ໃໝ່ ໂດຍໄດ້ແຕ່ງຕັ້ງ ທ່ານ ວົງສະກຸນ ຍິ່ງຍົງ ປະທານກວດກາຄະນະພັກຮາກຖານ ຜູ້ອຳນວຍການໃຫຍ່ ບໍລິສັດຜະລິດ-ໄຟຟ້າລາວ ມະຫາຊົນ ເປັນຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ.
    ນອກນີ້, ໃນພິທີກໍຍັງໄດ້ມີການຜ່ານຂໍ້ຕົກລົງ ເລກທີ 0545/ກງ, ລົງວັນທີ 13/2/2024 ວ່າດ້ວຍການແຕ່ງຕັ້ງຜູ້ອຳນວຍການໃຫຍ່ລັດວະສາຫະກິດໄຟຟ້າລາວ ໂດຍໄດ້ແຕ່ງຕັ້ງ ທ່ານ ວົງສະກຸນ ຍິ່ງຍົງ ອຳນວຍການໃຫຍ່ ບໍລິສັດ ຜະລິດ-ໄຟຟ້າລາວ ມະຫາຊົນ ເປັນຜູ້ອຳນວຍການໃຫຍ່ ລັດວິສາຫະກິດ ໄຟຟ້າລາວ ປ່ຽນແທນ ທ່ານ ຈັນທະບູນ ສຸກອາລຸນ ທີ່ໄດ້ຮັບແຕ່ງຕັ້ງໄປຮັບໜ້າທີ່ໃໝ່.
    ຕອນທ້າຍຂອງພິທີ, ທ່ານ ໂພໄຊ ໄຊຍະສອນ ໄດ້ມີຄໍາເຫັນໂດຍເນັ້ນບາງບັນຫາ ກໍຄືບັນຫາຮີບດ່ວນ, ພາຍຫຼັງສຳເລັດການປະກາດການຈັດຕັ້ງຄັ້ງນີ້ ແຕ່ລະບ່ອນຕ້ອງໄດ້ຄົ້ນຄວ້າ, ປຶກສາຫາລືກັນ ເພື່ອຈັດວາງພະນັກງງານ-ລັດຖະກອນຂອງຕົນເຂົ້າໃສ່ຕຳແໜ່ງງານຕ່າງໆໃຫ້ລະອຽດ, ສອດຄ່ອງກັບຄວາມຮູ້-ຄວາມສາມາດ ແລະ ຄຸນສົມບັດຂອງແຕ່ລະຄົນ ຊຶ່ງການວາງບຸກຄະລາກອນນີ້ຕ້ອງຮັບປະກັນ ແລະ ແນໃສ່ເຮັດໃຫ້ວຽກງານສາມາດຂັບເຄື່ອນໄປສູ່ບາດກ້າວໃໝ່, ຄຸນນະພາບໃໝ່ ແລະ ມີບັນຍາກາດໃໝ່; ຊຶ່ງຢາກໃຫ້ມີບາດກ້າວຫັນປ່ຽນໄປສູ່ຄຸນນະພາບໃໝ່ທີ່ສູງຂຶ້ນນັ້ນ ບັນຫາສຳຄັນ ແມ່ນຕ້ອງເອົາໃຈໃສ່ປັບປຸງການນໍາພາ, ແບບແຜນຄຸ້ມຄອງບໍລິຫານ ແລະ ວິທີການເຮັດວຽກໃຫ້ມີຄຸນນະພາບ ຕາມທັດທະນະຂອງ ປະທານ ໄກສອນ ພົມວິຫານ: “ແບບແຜນເຮັດວຽກ ແມ່ນການສັງລວມບັນດາວິທີ, ມາດຕະການຂອງພະນັກງານນໍາພາ-ຄຸ້ມຄອງ ແລະ ໄດ້ສະແດງອອກໂດຍການປະພຶດ, ການກະທໍາຕົວຈິງ ຊຶ່ງແມ່ນການຫັນເອົາເນື້ອໃນສັງລວມ, ຕັ້ງແຕ່ອາລົມຈິດໄປເຖິງມານະຈິດ, ຊີວະທັດ ແລະ ໂລກະທັດ. ດັ່ງນັ້ນ, ແບບແຜນເຮັດວຽກ ຈຶ່ງເປັນມູນພາກອັນໜຶ່ງທີ່ປະກອບສ່ວນສ້າງເປັນຄຸນສົມບັດ ແລະ ຄວາມສາມາດຂອງແຕ່ລະຄົນ”. ພ້ອມດຽວກັນນີ້, ກໍຍັງເນັ້ນໃຫ້ພ້ອມກັນເອົາໃຈໃສ່ເຮັດວຽກການເມືອງ-ແນວຄິດໃຫ້ດີ, ເຮັດໃຫ້ເປັນປົກກະຕິ, ຫັນໄປສູ່ລວງເລິກ ເຮັດໃຫ້ມີຄວາມໜັກແໜ້ນ ແລະ ມີການຫັນປ່ຽນ, ຕ້ອງພະຍາຍາມສ້າງທຸກເງື່ອນໄຂ ເພື່ອໃຫ້ພະນັກງານລັດຖະກອນ ແຕ່ລະຄົນໄດ້ຮັບການບໍາລຸງ ແລະ ຍົກລະດັບທິດສະດີປະຕິວັດ, ແນວທາງການເມືອງຂອງພັກ, ລະບຽບກົດໝາຍຂອງລັດ ຕິດພັນກັບການຍົກລະດັບ ແລະ ຄວາມສໍານິຊໍານານທາງດ້ານວິຊາສະເພາະ, ການຝຶກຝົນຫຼໍ່ຫຼອມດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດໃຫ້ໜັກແໜ້ນ.
(ຂ່າວ-ພາບ: ສຸກສະຫວັນ)