ປະລິມານການລົງທຶນຕໍ່ຕ່າງປະເທດຂອງຈີນສືບຕໍ່ຮັກສາຢູ່ແຖວໜ້າຂອງໂລກ

 ຖະແຫຼງການລະບຸວ່າ:ປະລິມານການລົງທຶນຕໍ່ຕ່າງປະເທດຂອງຈີນສືບຕໍ່ຮັກສາຢູ່ແຖວໜ້າຂອງໂລກ.
ຖະແຫຼງການໄດ້ສະແດງໃຫ້ເຫັນເຖິງສະພາບການລົງທຶນຕໍ່ຕ່າງປະເທດໂດຍກົງຂອງຈີນໃນປີ 2023 ຢ່າງຮອບດ້ານ, ຕົ້ນຕໍມີຈຸດພິເສດດັ່ງລຸ່ມນີ້:
ໜຶ່ງ, ປະລິມານການລົງທຶນສືບຕໍ່ຮັກສາຢູ່ແຖວໜ້າຂອງໂລກ. ສອງ,ວິສາຫະກິດຈີນທີ່ດຳເນີນທຸລະກິດຢູ່ຕ່າງປະເທດກວມປະເທດ ແລະ ເຂດແຄ້ວນທັງໝົດໃນໂລກຫຼາຍກວ່າ 80%. ສາມ, ຂົງເຂດການລົງທຶນສືບຕໍ່ເພີ່ມຂຶ້ນ, ຈຳນວນການລົງທຶນຫຼາຍກວ່າ 80% ແມ່ນຢູ່ໃນ 4 ຂົງເຂດໃຫຍ່. ສີ່, ການລົງທຶນຢູ່ອາຊີ ແລະ ອາຟຣິກາໄດ້ເພີ່ມຂຶ້ນຢ່າງວ່ອງໄວ, ການລົງທຶນໂດຍກົງຕໍ່ປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເພີ່ມຂຶ້ນຫຼາຍກວ່າ 30%. ຫ້າ, ໄດ້ປະກອບສ່ວນເຂົ້າໃນການເຕີບໂຕຂອງເສດຖະກິດໂລກນັບມື້ນັບພົ້ນເດັ່ນຂຶ້ນ.













ຈຳນວນປະຊາກອນ ສ ເກົາຫຼີຄາດວ່າຈະຫຼຸດລົງຢູ່ອັນດັບທີ 59 ໃນປີ 2072
ຂ່າວຕ່າງປະເທດລາຍງານຫວ່າງມໍ່ໆມານີ້, ຫ້ອງການສະຖິຕິຂອງ ສ ເກົາຫຼີ ລາຍງານໃຫ້ຮູ້ວ່າ: ອັນດັບຈຳນວນປະຊາກອນຂອງ ສ ເກົາຫຼີ ໃນການຈັດອັນດັບລະດັບໂລກ ອາດຈະຫຼຸດລົງ 30 ອັນດັບໃນ ໄລຍະ 5 ທົດສະວັດຂ້າງໜ້າຈົນມາຢູ່ອັນດັບທີ 59 ໃນປີ 2072.
ບົດລາຍງານລະບຸວ່າ: ຈຳນວນປະຊາກອນຂອງ ສ ເກົາຫຼີຈະຫຼຸດລົງ 30,8% ເປັນ 36 ລ້ານຄົນໃນປີ 2072, ເມື່ອທຽບກັບ 59 ລ້ານຄົນໃນປີ 2024, ໃນຂະນະທີ່ຈຳນວນປະຊາກອນໂລກຈະເພີ່ມຂຶ້ນ 25,2% ຈາກ 81,6 ຕື້ຄົນ ເປັນ 10,2 ຕື້ຄົນ ໃນປີ 2072.
ທ່າອ່ຽງການຫຼຸດລົງຂອງປະຊາກອນ ສ ເກົາຫຼີ ເປັນຜົນມາຈາກອັດຕາການເກີດຕົກຕໍ່າຊໍາເຮື້ອແລະ ຈຳນວນປະຊາກອນຜູ້ອາຍຸສູງເພີ່ມຂຶ້ນຢ່າງໄວວາ. ທ່າມກາງກະແສສັງຄົມຂອງຄົນໄວໜຸ່ມໃນ ສ ເກົາຫຼີເລືອກທີ່ຈະມີລູກຊ້າລົງຫຼືບໍ່ແຕ່ງດອງແລະບໍ່ມີລູກເລີຍ.
ອັດຕາສ່ວນຂອງຜູ້ທີ່ມີອາຍຸ 65 ປີຂຶ້ນໄປຕໍ່ປະຊາກອນທັງໝົດໃນ ສ ເກົາຫຼີຈະເພີ່ມຂຶ້ນຈາກ 19,2% ໃນປີ 2024 ເປັນ 47,7% ໃນປີ 2072, ໃນຂະນະທີ່ອັດຕາສ່ວນດັ່ງກ່າວໃນລະດັບໂລກຈະເພີ່ມຂຶ້ນຈາກ 10,2% ເປັນ 20,3% ໃນປີ2072.
ດ້ານອັດຕາສ່ວນຂອງປະຊາກອນໃນໄວເຮັດວຽກ ຫຼື ຜູ້ທີ່ມີອາຍຸ 15-64 ປີ ຕໍ່ປະຊາກອນທັງໝົດໃນ ສ ເກົາຫຼີຈະຫຼຸດລົງຈາກ 70,2% ໃນປີ 2024 ເປັນ 45,8% ໃນປີ 2072, ໃນຂະນະທີ່ອັດຕາສ່ວນດັ່ງກ່າວໃນລະດັບໂລກຈະຫຼຸດລົງຈາກ 65,1% ຢູ່ທີ່ 61,5% ໃນປີ 2072.