ປະຖະກະຖາ ບົດຮຽນການກໍ່ສ້າງພັກ, ການຄຸ້ມຄອງພັກຢ່າງເຂັ້ມງວດຮອບດ້ານ ແລະ ການກຳອຳນາດໄລຍະຍາວໃນຍຸກສະໄໝໃໝ່ຂອງພັກກອມມູນິດຢູ່ແຂວງອຸດົມໄຊ

 ຄະນະຊ່ຽວຊານ ຈາກເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ, ນໍາໂດຍ ສະຫາຍ ຫຼີວໜານ ຮອງຫົວໜ້າຄະນະຈັດຕັ້ງພັກເຂດປົກຄອງຕົນເອງຫົວໜ້າກົມຄຸ້ມຄອງລັດຖະກອນ ເຂດປົກຄອງຕົນເອງເຜົ່າຈ້ວງກວາງຊີ ພ້ອມດ້ວຍຄະນະ ໄດ້ເຄື່ອນໄຫວປະຖະກະຖາ ເອກະສານ 2 ບົດ ຢູ່ແຂວງອຸດົມໄຊ ໂດຍການເຂົ້າຮ່ວມຂອງສະຫາຍ ທອງຈັນ ໂຂງພູມຄໍາ ກຳມະການປະຈຳພັກຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ຄໍາພຽງ ຢາຈົງວາ ຮອງເລາຂາພັກແຂວງ ອຸດົມໄຊ, ມີພາກສ່ວນກ່ຽວຂ້ອງຈາກ 5 ແຂວງພາກເໜືອ ຄື: ອຸດົມໄຊ, ຜົ້ງສາລີ, ຫຼວງນໍ້າທາ, ໄຊຍະບູລີ ແລະ ແຂວງຫຼວງພະບາງເຂົ້າຮ່ວມ.
ເອກະສານທີ່ນໍາມາ ປະຖະກະຖາຄັ້ງນີ້ມີ ຄື: ບົດຮຽນ ແລະ ພຶດຕິກຳການຄຸ້ມຄອງພັກຢ່າງເຂັ້ມງວດຮອບດ້ານຂອງພັກກອມມູນິດຈີນ, ບົດຮຽນ ແລະ ພຶດຕິກໍາການກຳອຳນາດແບບໄລຍະຍາວ ໃນຍຸກສະໄໝໃໝ່ ຂອງພັກກອມມູນິດຈີນ, ຊຶ່ງລາວແລະ ຈີນ ເປັນປະເທດບ້ານໃກ້ເຮືອນຄຽງກັນ, ມີຊາຍແດນຕິດຈອດກັນ, ປະຊາຊົນສອງຊາດມີການພົວພັນມິດຕະພາບ ມາແຕ່ບູຮານນະການ, ມີມູນເຊື້ອສາມັກຄີຮັກແພງ ຊ່ວຍເຫຼືອເຊິ່ງກັນ ແລະ ກັນ; ພັກ, ລັດ ແລະ ປະຊາຊົນຈີນ ອ້າຍນ້ອງໄດ້ໃຫ້ການຊ່ວຍເຫຼືອ ແລະ ສະໜັບສະໜູນປະເທດລາວ ໃນພາລະກິດຕໍ່ສູ້ປົດປ່ອຍຊາດ, ຍ້ອນເຫັນໄດ້ຄວາມຮຽກຮ້ອງຕ້ອງການໃນສະພາບການໃໝ່ ການພົວພັນຮ່ວມມືລາວ - ຈີນ ໄດ້ຮັບການເສີມຂະຫຍາຍ ແລະ ຍົກລະດັບການພົວພັນໃຫ້ສອດຄ່ອງກັບເງື່ອນໄຂແຕ່ລະໄລຍະ ຄື: ຈາກການພົວພັນທົ່ວໄປ ກາຍມາເປັນການພົວພັນຮ່ວມມືຮອບດ້ານບົນພື້ນຖານຄວາມສະເໝີພາບ ຕ່າງຝ່າຍຕ່າງມີຜົນປະໂຫຍດ ແລະ ຍົກລະດັບການພົວພັນ ເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ຄື: “ເປັນເພື່ອນ ບ້ານໃກ້ເຮືອນຄຽງທີ່ດີ, ເປັນເພື່ອນມິດທີ່ດີ, ເປັນສະຫາຍທີ່ດີ ແລະ ເປັນຄູ່ຮ່ວມມືທີ່ດີ”.
ນີ້ກໍ່ເພື່ອແນ່ໃສໃຫ້ພະນັກງານຂອງລາວ ໄດ້ຮັບຮູ້, ເຂົ້າໃຈ ບົດຮຽນການກໍ່ສ້າງພັກ, ການຄຸ້ມຄອງພັກຢ່າງເຂັ້ມງວດຮອບດ້ານ ແລະ ການກຳອຳນາດໄລຍະຍາວໃນຍຸກສະໄໝໃໝ່ຂອງພັກກອມມູນິດຈີນ.
(ຂ່າວ: ຄຳພັນແກ້ວມະນີ)