ປາຖະກະຖາ ການຮ່ວມມືກັບອິນເດຍ ໃນໄລຍະໃໝ່

ສະຖາບັນການຕ່າງປະເທດ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດ ອິນເດຍ ປະຈໍາ ສປປ ລາວ ໄດ້ເປັນເຈົ້າພາບໃນການຈັດປາຖະກະຖາພາຍໃຕ້ຫົວຂໍ້ “ການຮ່ວມມືກັບອິນເດຍ ໃນໄລຍະໃໝ່ ເປີດກວ້າງການຮ່ວມມືກັບ ສປປ ລາວ ແລະ ອາຊຽນ ໃນວັນທີ 2 ກຸມພານີ້ ທີ່ສູນຮ່ວມມືສາກົນ ແລະ ຝຶກອົບຮົມ, ໂດຍໃຫ້ກຽດເຂົ້າຮ່ວມເປັນປະທານກ່າວເປີດຂອງ ທ່ານ ບຸນເຫຼືອ ພັນດານຸວົງ ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຜູ້ເຂົ້າຮ່ວມ ຈາກຫຼາຍພາກສ່ວນເຂົ້າຮ່ວມ.    ການຈັດປາຖະກະຖາຄັ້ງນີ້, ແມ່ນເປັນກິດຈະກໍາໜຶ່ງ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ອິນເດຍ ຄົບຮອບ 68 ປີ (2/2/1956-2/2/2024) ແນໃສ່ເພື່ອເປັນການສົ່ງເສີມການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອິນເດຍ ໃນໄລຍະຜ່ານມາ ກໍຄືເສີມຂະຫຍາຍການຮ່ວມມືທີ່ເປັນທ່າແຮງຂອງສອງປະເທດໃນອະນາຄົດ. ນອກຈາກນີ້, ກໍເພື່ອເສີມຂະຫຍາຍການຮ່ວມມື ລະຫວ່າງ ອິນເດຍ ແລະ ອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ໃນປີ 2024 ອີກດ້ວຍ, ຊຶ່ງຜູ້ເຂົ້າຮ່ວມໄດ້ຮັບຟັງ ແລະ ແລກປ່ຽນຄໍາຄິດຄໍາເຫັນຕໍ່ກັບຂົງເຂດວຽກງານຕ່າງໆ ພາຍໃຕ້ການຮ່ວມມື ລາວ-ອິນເດຍ ແລະ ອາຊຽນ-ອິນເດຍ ໃນໄລຍະຜ່ານມາ, ກາລະໂອກາດ, ສິ່ງທ້າທ້າຍ ແລະ ຂົງເຂດວຽກງານທີ່ເປັນທ່າແຮງສໍາລັບການຮ່ວມມື ລະຫວ່າງ ສອງປະເທດໃນອະນາຄົດ. 
ສປປ ລາວ ແລະ ອິນເດຍ  ໄດ້ສ້າງສາຍພົວພັນການທູດຮ່ວມກັນ ໃນວັນທີ 2 ກຸມພາ 1956. ຕະຫຼອດໄລຍະ 68 ປີຜ່ານມາ, ການພົວພັນການທູດ ລະຫວ່າງ ສອງປະເທດ ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ເປັນຮູບປະທໍາ ຊຶ່ງມີລັກສະນະມູນເຊື້ອດ້ານປະຫວັດສາດ ເນື່ອງຈາກມີຄວາມຄ້າຍຄືກັນທາງດ້ານວັດທະນະທໍາ ແລະ ສາສະໜາ, ສອງຝ່າຍໄດ້ໃຫ້ການສະໜັບສະໜູນຊຶ່ງກັນ ແລະ ກັນ, ມີການແລກປ່ຽນການຢ້ຽມຢາມກັນຢ່າງເປັນປົກກະຕິໃນລະດັບການນໍາຂັ້ນສູງຈົນເຖິງວິຊາການ, ມີການຮ່ວມ ມືກັນໃນຫຼາຍຂົງເຂດວຽກງານເຊັ່ນ: ການເມືອງ, ເສດຖະກິດ, ວັດທະນະທໍາ-ສັງຄົມ, ສາທາລະນະສຸກ, ສຶກສາ, ເຕັກໂນໂລຊີ,  ການຄ້າ-ການລົງທຶນ ແລະ ອື່ນໆ. ນອກນີ້, ທັງສອງຝ່າຍ ຍັງໄດ້ລົງນາມຮ່ວມກັນໃນນິຕິກໍາຕ່າງໆຫຼາຍສະບັບ ຊຶ່ງໃນນັ້ນ ກໍແມ່ນບົດບັນທຶກຄວາມເຂົ້າໃຈ ລະຫວ່າງ ສະຖາບັນການຕ່າງປະເທດ ຂອງ ສປປ ລາວ ແລະ ສະຖາບັນການຕ່າງປະເທດ ຂອງ ອິນເດຍ ເພື່ອເສີມຂະຫຍາຍການຮ່ວມມືສອງຝ່າຍ ໂດຍຜ່ານການຈັດຕັ້ງປະຕິບັດກິດຈະກໍາໃນຂົງເຂດຕ່າງໆ ທີ່ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ.
 (ຂ່າວ-ພາບ: ແສງຈັນ)