 |
ພິທີດັ່ງກ່າວ ທ່ານ ຄຳໄຫຼ ສີປະເສີດ ໄດ້ກ່າວວ່າ ເພື່ອເປັນການສືບຕໍ່ຍົກລະດັບ ຄວາມສາມາດ ດ້ານວຽກງານກວດກາພັກ, ກວດກາລັດ, ສະກັດກັ້ນ ຕ້ານການສໍ້ລາດບັງຫຼວງ ໃຫ້ແກ່ພະນັກງານກວດກາ ທົ່ວປະເທດ ຂອງ ສປປ ລາວ. ການປາຖະກະຖາຖ່າຍທອດບົດຮຽນ ໃນຄັ້ງນີ້ ແມ່ນຜົນຂອງການຮ່ວມມື ໃນວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ລະຫວ່າງ ຄະນະກວດກາສູນກາງພັກ, ອົງການກວດກາລັດແຫ່ງລັດ ສປປ ລາວ ກັບ ຄະນະກຳມະການກວດກາສູນກາງພັກກອມມູນິດຫວຽດນາມ ແລະ ຄະນະກວດກາລັດຖະບານ ສສ ຫວຽດນາມ ຕາມບົດບັນທຶກ ທີ່ໄດ້ລົງນາມຮ່ວມກັນ ໃນປີ 2022 ທີ່ຜ່ານມາ.
ການປາຖະກະຖາດັ່ງຄັ້ງນີ້ໄດ້ດໍາເນີນໄປເປັນເວລາ 1 ວັນເຕັມ ຊຶ່ງຜູ້ເຂົ້າຮ່ວມຈະໄດ້ຮັບຟັງ ການບັນລະຍາຍ ຈາກຄະນະຊ່ຽວຊານວຽກງານກວດກາ, ຜູ້ມີປະສົບການຈາກ ສສ ຫວຽດນາມ ຊຶ່ງຈະໄດ້ລົງເລິກ ບາງເນື້ອໃນ ບົດຮຽນ ຂອງພັກກອມມູນິດຫວຽດນາມ ກ່ຽວກັບວຽກງານກວດກາພັກ, ວຽກງານກວດກາລັດ, ວຽກງານຕ້ານການສໍ້ລາດບັງຫຼວງ ແລະ ການຫັນເປັນທັນສະໄໝ ໃນວຽກງານກວດກາ ແລະ ບັນຫາອື່ນໆທີ່ຜູ້ເຂົ້າຮ່ວມມີຄວາມສົນໃຈ. ພ້ອມນີ້ ທ່ານຍັງໄດ້ຮຽກຮ້ອງ ມາຍັງບັນດາພະນັກງານກວດກາຂອບເຂດທົ່ວປະເທດ ຈົ່ງໄດ້ເອົາໃຈໃສ່ເຂົ້າຮ່ວມຢ່າງສຸດກົກສຸດປາຍ, ພ້ອມທັງ ຕິດຕາມ ຮັບຟັງການບັນລະຍາຍ, ຕັ້ງຄໍາຖາມ, ສົນທະນາ ແລະ ແລກປ່ຽນບົດຮຽນນໍາ ບັນດາຄະນະຜູ້ຊ່ຽວຊານ ເພື່ອສາມາດເກັບກ່ຽວບົດຮຽນ, ປະສົບການໃໝ່ ແລະ ສາມາດນຳໄປໝູນໃຊ້ ເຂົ້າໃນວຽກງານຕົວຈິງ ຂອງແຕ່ລະຂະແໜງການຢ່າງມີປະສິດທິຜົນ ແລະ ເຮັດໃຫ້ການປາຖະກະຖາໃນຄັ້ງນີ້ ມີຜົນສໍາເລັດຕາມຈຸດປະສົງ ລະດັບຄາດໝາຍ.
ພ້ອມນີ້ ທ່ານ ຫວຽນ ດິ່ງ ຮອກ ກໍໄດ້ກ່າວວ່າ: ພວກເຮົາຮູ້ສຶກດີໃຈ ແລະ ຮູ້ສຶກຂອບໃຈຢ່າງຈິງໃຈໃນການຕ້ອນຮັບຢ່າງອົບອຸ່ນ ຕໍ່ຄະນະຊ່ຽວຊານຂອງພວກເຮົາ. ການຢ້ຽມຢາມຄັ້ງນີ້ມີຈຸດປະສົງເພື່ອເສີມສ້າງຄວາມສາມັກຄີ ແລະ ສົ່ງເສີມການຮ່ວມມືລະຫວ່າງສອງຝ່າຍຂອງຄະນະກຳມະການກວດກາສູນກາງພັກ, ອົງການກວດກາລັດຖະບານ ສສ ຫວຽດນາມ ແລະ ຄະນະກວດກາສູນກາງພັກ ແລະ ອົງການກວດກາແຫ່ງລັດ ສປປ ລາວ. ມີນີ້ພວກເຮົາຈະແລກປ່ຽນປະສົບການກັບບັນດາທ່ານກ່ຽວກັບວຽກງານກວດ ກາພັກ, ວຽກງານກວດກາລັດ, ວຽກງານຕ້ານການສໍ້ລາດບັງຫຼວງແລະ ການຫັນເປັນທັນສະໄໝໃນວຽກງານກວດກາ ແລະ ວຽກງານຕິດຕາມກວດກາຂອງຄະນະກຳມະການກວດກາສູນກາງຂອງພັກກອມມູນິດຫວຽດນາມ ແລະ ກ່ຽວກັບການປັບໂຄງສ້າງການຈັດຕັ້ງພາຍຫຼັງກອງປະຊຸມໃຫຍ່ຄັ້ງທີ XIV ຂອງພັກ ກອມມູນິດຫວຽດນາມ.
ພ້ອມນີ້ຍັງໄດ້ກ່າວຕື່ມອີກວ່າພວກເຮົາຈະພະຍາຍາມຖອດຖອນບົດຮຽນທີ່ພວກເຮົາມີໃຫ້ພະນັກງານກວດກາ ສປປ ລາວ ໃນຄັ້ງນີ້ໃຫ້ໄດ້ຫຼາຍທີ່ສຸດເທົ່າທີ່ຈະເຮັດໄດ້.
(ຂ່າວ: ຕູ່ນ່າ)
ຄໍາເຫັນ