ປະທານອົງການກວດສອບແຫ່ງລັດ ຕ້ອນຮັບ ທູດ ສ ຕວັກກີ ປະຈຳ ສປປ ລາວ

ໃນວັນທີ 9 ເມສາ ນີ້ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ປະທານອົງການກວດສອບແຫ່ງລັດ ສປປ ລາວ ໄດ້ຕ້ອນຮັບທ່ານ ໂອຣຮັນ ເອີຊຶກ (Mr. Orhan ISIK) ເອກອັກຄະລັດ ສ ຕວັກກີ ປະຈໍາ ສປປ ລາວ ເຂົ້າຢ້ຽມຂໍ່ານັບເນື່ອງໃນໂອກາດທີ່ທ່ານມາດໍາລົງຕໍາແໜ່ງເປັນເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສ ຕວັກກີ ປະຈຳ ສປປ ລາວ.
ໃນໂອກາດດັ່ງກ່າວນີ້, ທ່ານ ວຽງທະວີສອນ ເທບພະຈັນ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ ທ່ານ ໂອຼຮັນ ເອີຊຶກ  ທີ່ໄດ້ມາດໍາລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສ ຕວກກີ ປະຈຳ ສປປ ລາວ. ບົນພື້ນຖານການພົວພັນຮ່ວມມືໃນໄລຍະຜ່ານມາທາງສະຖານເອກອັກຄະລັດຖະທູດ ສ ຕວກກີ ປະຈຳ ສປປ ລາວ ໄດ້ເອົາໃຈໃສ່ເຄື່ອນໄຫວວຽກງານການທູດຢ່າງຕັ້ງໜ້າ ຊຶ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນການທູດ ກໍຄືການຮ່ວມມືໃນດ້ານຕ່າງໆຢ່າງແໜ້ນແຟ້ນ ລະຫວ່າງ ລັດຖະບານກໍຄືປະຊາຊົນສອງຊາດ ລາວ-ຕວັກກີ ໃຫ້ມີຄວາມໜັກແໜ້ນ ແລະ ໄດ້ຮັບການພັດທະນາຂຶ້ນເລື່ອຍໆ. ໃນໂອກາດທີ່ ທ່ານ ໂອຣຮັນເອີຊຶກ ເຂົ້າຢ້ຽມຢາມຄັ້ງນີ້, ທ່ານປະທານອົງການກວດສອບແຫ່ງລັດ ໄດ້ແລກປ່ຽນບົດຮຽນ ແລະ ສະເໜີ ທ່ານ ເອກອັກຄະລັດຖະທູດ ສ ຕວັກກີປະຈໍາ ສປປ ລາວ ສືບຕໍ່ຊ່ວຍຊຸກຍູ້ ແລະ ໃຫ້ການສະໜັບສະໜູນແກ່ອົງການກວດສອບແຫ່ງລັດ ຄື:
ສະເໜີພິຈາລະນາ ໃຫ້ສະຖານທູດ ສ ຕວັກກີ ແນະນຳ ແລະ ຄົ້ນຄວ້າໂຄງການຈັດຝຶກອົມຮົມແລກປ່ຽນໃນຂົງເຂດກວດສອບແຫ່ງລັດ, ສະເໜີຊ່ວຍໃຫ້ມີກິດຈະກຳເພື່ອສ້າງຄວາມເຂັ້ມແຂງໃຫ້ອົງການກວດສອບປະຈຳພາກ ແລະ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ,ແນະນຳຊ່ອງທາງໃຫ້ອົງການກວດສອບແຫ່ງລັດ ສປປ ລາວ ແລະ ສານກວດສອບບັນຊີ ຕວັກກີ ແລະ ແລກປ່ຽນຄວາມຮູ້ຮ່ວມກັນ.
ທ່ານ ໂອຣຮັນ ເອີຊຶກ  ໄດ້ສະແດງຄວາມຂອບໃຈ ຕໍ່ທ່ານ ວຽງທະວີສອນ ເທບພະຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈຕໍ່ພັກ-ລັດຖະບານ  ສປປ ລາວ  ຕະຫຼອດຮອດປະຊາຊົນລາວບັນດາເຜົ່າ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ແລະ ອຳນວຍຄວາມສະດວກ ໄລຍະການປະຕິບັດໜ້າທີ່ການທູດຢູ່ລາວ ແລະ ໃນຕອນທ້າຍ ທ່ານ ທູດ ໄດ້ອວຍພອນໃຫ້ທ່ານປະທານອົງການກວດສອບແຫ່ງລັດ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານອັນມີກຽດຂອງທ່ານ ແລະ ເຊື່ອໝັ່ນວ່າໃນສະເພາະໜ້າ ແລະ ຍາວນານ ສ ຕວກກີ ກໍຄືສະຖານທູດ ຈະເພີ່ມທະວີສາຍພົວພັນຮ່ວມມື ແລະ ໃຫ້ການຊ່ວຍເຫຼືອອົງການກວດສອບແຫ່ງລັດ ສປປ ລາວ ໃຫ້ມີຄວາມເຂັ້ມແຂງຍິ່ງໆຂຶ້ນ.
                       ຂ່າວ: ອົງການກວດສອບແຫ່ງລັດ, ພາບ: ພູວຽງຄຳ