ໃນໂອກາດນີ້, ສະຫາຍ ສິນລະວົງ ຄຸດໄພທູນ ໄດ້ສະແດງຄວາມຂອບໃຈຕໍ່ ສະຫາຍ ໂຕ ເລິມ ທີ່ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະສູນກາງແນວລາວສ້າງຊາດໃນຄັ້ງນີ້, ທັງສະແດງຄວາມຊົມເຊີຍຕໍ່ ສະຫາຍ ໂຕ ເລິມ ທີ່ໄດ້ຮັບຄວາມໄວ້ວາງໃຈໃຫ້ດໍາລົງຕໍາແໜ່ງເປັນ ປະທານປະເທດ ແຫ່ງ ສສ ຫວຽດນາມ ແລະ ໄດ້ຕີລາຄາສູງຕໍ່ການເດີນທາງມາຢ້ຽມຢາມລັດຖະກິດ ທີ່ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ໄດ້ຮັບການເສີມຂະຫຍາຍ ແລະ ກ້າວເຂົ້າສູ່ລວງເລິກຍິ່ງໆຂຶ້ນ. ພ້ອມນີ້, ຍັງໄດ້ສະແດງຄວາມຊົມເຊີຍ ຕໍ່ຜົນສໍາເລັດຂອງການພົບປະສອງຝ່າຍ ລະຫວ່າງ ສະຫາຍ ປະທານປະເທດ ທອງລຸນ ສີສຸລິດ ແລະ ສະຫາຍ ປະທານປະເທດ ໂຕ ເລິມ ໃນເຊົ້າມື້ນີ້, ຊຶ່ງສອງຝ່າຍໄດ້ຮ່ວມກັນປຶກສາຫາລືຫຼາຍບັນຫາທີ່ສໍາຄັນ ທັງຍັງໄດ້ສໍາເລັດການລົງນາມໃນຫຼາຍເອກະສານທີ່ສໍາຄັນຫຼາຍສະບັບ.
ໃນໂອກາດດັ່ງກ່າວ, ສະຫາຍ ສິນລະວົງ ຄຸດໄພທູນ ຍັງໄດ້ລາຍງານໃຫ້ຊາບ ກ່ຽວກັບ ການເຄື່ອນໄຫວໂດຍຫຍໍ້ຂອງສູນກາງແນວລາວສ້າງຊາດ ກໍຄືການພົວພັນຮ່ວມມື ລະຫວ່າງ ຄະນະກໍາມະການສູນກາງແນວລາວສ້າງຊາດ ແລະ ແນວໂຮມປະເທດຊາດຫວຽດນາມ, ຊຶ່ງໄດ້ມີການພົວພັນຮ່ວມມືກັນຢ່າງສະໜິດແໜ້ນ, ມີການເຊັນບົດບັນທຶກຮ່ວມມືນໍາໃນທຸກໆ 5 ປີ, ມີການພົບປະແລກປ່ຽນເຊິ່ງກັນ ແລະ ກັນ ຢ່າງເປັນປົກກະຕິ ແລະ ຍັງໄດ້ແຈ້ງຜົນຂອງກອງປະຊຸມປະທານອົງການແນວໂຮມສາມຊາດປະເທດ ກໍາປູເຈຍ-ລາວ-ຫວຽດນາມ ຄັ້ງທີ 5 ທີ່ ນະຄອນຫຼວງວຽງຈັນ ຜ່ານມາ ທີ່ໄດ້ບັນລຸບົດບັນທຶກກອງປະຊຸມທີ່ມີເນື້ອໃນສໍາຄັນຄື: ສຶບຕໍ່ເພີ່ມທະວີດ້ານການເມືອງ ແລະ ການທູດປະຊາຊົນ, ສະໜັບສະໜູນ ແລະ ປ້ອງກັນຜົນປະໂຫຍດອັນຊອບທໍາຂອງກັນ ແລະ ກັນ, ສືບຕໍ່ເອົາການພົວພັນຂອງ 3 ພັກເປັນແກນຫຼັກຂອງການພົວພັນ ລະຫວ່າງ 3 ແນວໂຮມ; ສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ວັດທະນະທໍາ, ການທ່ອງທ່ຽວ ແລະ ກະສິກໍາ ບົນພື້ນຖານຄວາມອາດສາມາດ ແລະ ທ່າແຮງຂອງແຕ່ລະປະເທດ.
ໃນໂອກາດດຽວກັນ, ສະຫາຍ ໂຕ ເລິມ ກໍໄດ້ສະແດງຄວາມຊົມເຊີຍຕໍ່ໝາກຜົນຂອງການເຄື່ອນໄຫວ ແລະ ການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ແນວໂຮມປະເທດຊາດຫວຽດນາມ ໃນໄລຍະຜ່ານມາ, ພ້ອມທັງໄດ້ຊີ້ທິດເຍືອງທາງໃຫ້ສອງຝ່າຍ ສືບຕໍ່ປະສານສົມທົບກັນຢ່າງໃກ້ຊິດ ເພື່ອຮ່ວມກັນເຄື່ອນໄຫວໃຫ້ມີປະສິດທິພາບ ແລະ ປະສິດທິຜົນຂຶ້ນຕື່ມ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ນັບມື້ກ້າວເຂົ້າສູ່ທາງກວ້າງ ແລະ ລວງເລິກ ຢ່າງບໍ່ຢຸດຢັ້ງ.
ຂ່າວ: ກຕທ, ພາບ: ສຸກສະຫວັນ + ຕຸໄລເພັດ
ຄໍາເຫັນ